تۇركياعا قاشقان رەسەيلىكتەر بانك كارتاسىن اشا الماي، اۋرە-cارساڭعا ءتۇسىپ جاتىر

3293
Adyrna.kz Telegram

تۇركياعا اۋعان رەسەي قاشقىندارىنا ەرەكشە قىزمەتتى ەشكىم كورسەتىپ جاتقان جوق. ولار قاراپايىم بانك كارتاسىن اشا الماي اۋرەگە ءتۇسىپ جاتىر. وعان موبيليزاتسيادان قاشقانداردىڭ سانى ارتۋى سەبەپ بولعان. تۇركياداعى قارجىلىق ورتالىقتار ءبارىنىڭ بىردەي كوڭىلىن تاۋىپ ۇلگەرەر ەمەس، دەپ حابارلايدى "ادىرنا" ۇلتتىق پورتالى "يزۆەستيا" باسىلىمىنا سىلتەمە نۇسقاپ. 

رەسەيلىكتەردىڭ بىرەۋى بانك كارتاسىن اشۋ ءۇشىن ىستامبۇلدى شىر كوبەلەك اينالىپ، 15 ءىرى بانك بولىمشەسىنىڭ تابالدىرىعىن توزدىرعان. ول  تۇركيادا ءبارىنىڭ قارجىعا كەلىپ تىرەلەتىنىن ايتىپ، نالىعان. ءبىر قارجىلىق ورتالىقتار ودان بانك كارتاسىن اشۋ ءۇشىن كوميسسيا تالاپ ەتسە، كەيبىرى تۇركيادا جۇمىس ىستەۋگە رۇقساتى بار انىقتامانى كورسەتۋدى سۇراعان. بۇعان قاتىستى:

- بىزدەن بانكتەردىڭ ءبىرى 5 مىڭ دوللار كولەمىندە دەپوزيت، تاعى بىرەۋى 2 مىڭ ليرا كولەمىندە قايتارىمسىز كوميسسيا تولەۋدى تالاپ ەتتى (شامامەن 107 دوللار), - دەپ جازادى "گازەتا.Ru".

"كوپتەگەن رەسەي قاشقىندارى تۇركياداعى "Denizbank" قىزمەتىنە جۇگىنۋدە. اتالمىش بانكتە جاڭا كارتا الۋ ءۇشىن 10 مىڭ ليرا كولەمىندە دەپوزيت اشۋىڭ قاجەت. ونىڭ ءوزى رەسەيلىكتەردىڭ بارىنە قولجەتىمدى ەمەس", - دەپ جازدى "يزۆەستيا".

ورايى كەلگەندە ايتا كەتەيىك، قازاقستاندا رەسەيلىك قاشقىندارعا ايرىقشا جاعداي جاسالعان.

ولاردىڭ اياعىن جەرگە تيگىزبەي، ەلگە ورنالاستىرۋ جانە بانك كارتاسىن اشۋى جايلى جۋرناليست جولىمبەت ماكىش بىلاي دەپ جازدى:

"قالاداعى بولىمشەلەردە ادام كوپ بولعاندىقتان رەسەيلىكتەردىڭ ءبىرازىن وسىندا اكەپ توگىپ، «Palace» مينيماركەتىندە ولارعا بانك كارتاسىن بەرەتىن بولىمشە اشىپتى. مىناۋ سونداعى كەزەكتە تۇرعانداردىڭ سۋرەتى. "Freedom" بانكتىڭ كارتاسىن اشتىرىپ جاتىر مۇندا ولار. بۇل بانك وتكەندە عانا قازاقستاننىڭ ازاماتتىعىن العان تيمۋر تۋرلوۆقا قارايدى. اقشا اۋدارىپ، تولەم جاساعىسى كەلگەن ءوزىنىڭ جەرلەستەرىنە (رەسەيلىكتەرگە) سانكتسيانى اينالىپ وتەتىندەي كەرەمەت مۇمكىندىك جاساپ بەرىپتى تيمۋر تۋرلوۆ مىرزاڭ..."

بۇعان قاتىستى كوڭىلى كۇپتى كوپتەگەن قازاقستاندىقتار "وسى بانككە نەسيە بويىنشا تەلەفون شالسام، "وپەراتور بوس ەمەس" دەپ المايدى", "بىزدە وسىنداي ۇزىن سونار كەزەك بولعان-دى. نە سەبەپ ەكەنىن ەندى تۇسىندىك",  "ەە، ازاماتتىق الىپ الىپ،بانك اشىپ جاتقانى ما؟" دەپ پىكىر بىلدىرگەن ەدى.

"ادىرنا" ۇلتتىق پورتالى  

پىكىرلەر