پاۆلودار وبلىسىنىڭ ماي اۋدانىندا تاعى دا ءشوپ ورتەنىپ جاتىر. بۇل تۋرالى Pavlodarnews.kz. جاريالادى، دەپ حابارلايدى “ادىرنا” ۇلتتىق پورتالى.
ءورت باسكول اۋىلدىق وكرۋگىنە قاراستى جاڭاتىلەك اۋىلىنىڭ جانىنداعى ەرتىس وزەنىنىڭ جاعاسىندا تۇتانعان. جاڭا شابىلعان 70 تونناعا جۋىق ءشوپتىڭ جانىپ جاتقانى تۋرالى حابار وبلىستىق توتەنشە جاعدايلار دەپارتامەنتىنە كەشە كەلىپ تۇسكەن.
“23 قازان كۇنگى ساعات 10:30-داعى جاعداي بويىنشا ءورت 5 وشاقتا 140 گەكتارعا جۋىق اۋماقتا تىركەلگەن”، - دەدى دەپارتامەنت وكىلدەرى.
1-وشاق – 15 گەكتار، 2-وشاق – 25 گەكتار، 3-وشاق – 37 گەكتار، 4-وشاق – 39 گەكتار، 5-وشاق – 24 گەكتار.
“قولايسىز اۋا رايىنا بايلانىستى ءورتتى ءسوندىرۋ قيىنعا سوعىپ جاتىر. وعان قوسا، 23 قازاندا پاۆلودار وبلىسىندا داۋىلدى ەسكەرتۋ جاريالاندى. جەل كۇشەيىپ، جىلدامدىعى سەكۋندىنا 23-28 مەترگە دەيىن جەتتى. اۋىلدارعا قاۋىپ جوق”، - دەپ مالىمدەدى وبلىستىق تجد.
قازىر ءورت بولعان جەردە تجد-دان 4 تەحنيكا، 23 ادام، باسكول ءورت ءسوندىرۋ بەكەتىنىڭ، كوكتوبە ورمان شارۋاشىلىعىنىڭ، مايسەرۆيس كاسىپورنىنىڭ قىزمەتكەرلەرى جانە ەرىكتى 50 ادام ءجۇر.
