Twitter كومپانياسىنىڭ يەسى بولعاننان كەيىن يلون ماسك كادر ساياساتىن قايتا قاراۋعا شەشىم قابىلدادى. ول قىزمەتكەرلەردىڭ جارتىسىنا جۋىعىن جۇمىستان شىعارۋدى جوسپارلاپ وتىر. بۇل تۋرالى Bloomberg جاريالادى، دەپ حابارلايدى “ادىرنا” ۇلتتىق پورتالى.
اگەنتتىك سۇحباتتاستارىنىڭ ايتۋىنشا، 7,5 مىڭ جۇمىسشىنىڭ 3,7 مىڭعا جۋىعى قىسقارتىلاتىن بولادى. بۇل رەتتە شتاتتا قالعان قىزمەتكەرلەرگە قاشىقتان جۇمىس ىستەۋگە تىيىم سالىنادى. بۇل شارالار شىعىنداردى ازايتۋعا باعىتتالعان.
ماسك بۇعان دەيىن ءوز اككاۋنتىندا “جارناما بەرۋشىلەر ءسوز بوستاندىعىن نەمەسە ساياسي دۇرىستىقتى قولداۋ كەرەك پە؟” دەگەن ساۋالناما جاريالاعان بولاتىن. داۋىس بەرگەندەردىڭ باسىم بولىگى ءبىرىنشى نۇسقانى تاڭدادى.
ايتا كەتەيىك، يلون ماسك Twitter-ءدى ساتىپ الۋ كەلىسىمىن 27 قازاندا اياقتادى. كەلىسىمشارت سوماسى 44 ميلليارد دوللاردى قۇرادى. كاسىپكەردىڭ ءوزى ساتىپ الۋ شەشىمىن ادامزاتقا كومەكتەسۋ نيەتىمەن ءتۇسىندىردى. ول وركەنيەت ءۇشىن سالاۋاتتى اتموسفەرادا ءارتۇرلى پىكىرلەردى تالقىلاۋعا بولاتىن ءبىر تسيفرلىق پلاتفورمانىڭ بولۋى ماڭىزدى دەپ سانايتىنىن اتاپ ءوتتى.
