قازاقستاندىقتارعا وڭتۇستىك كورەيادا زاڭدى تۇردە جۇمىس ىستەۋگە رۇقسات بەرىلۋى مۇمكىن. بۇل تۋرالى وڭتۇستىك كورەيا رەسپۋبليكاسىنىڭ سىرتقى ىستەر ءمينيسترى پاك جينمەن كەزدەسۋدەن كەيىن سىرتقى ىستەر ءمينيسترى مۇرات نۇرتىلەۋ مالىمدەدى، دەپ حابارلايدى “ادىرنا” ۇلتتىق پورتالى.
بۇگىنگى كەزدەسۋ بارىسىندا وڭتۇستىك كورەيا رەسپۋبليكاسىنىڭ سىرتقى ىستەر ءمينيسترى پاك جين مىرزامەن مەملەكەتارالىق بايلانىستىڭ ماڭىزىن ەسكەرىپ، ەكى ەل ازاماتتارىنىڭ ەڭبەك جانە كوشى-قون قۇقىقتارىن قامتاماسىز ەتۋ ماسەلەسىن ورتاعا سالدىق. ءوز تاراپىمنان، قازاقستان ازاماتتارىنىڭ كورەيادا زاڭدى جۇمىس ىستەۋى ماسەلەسىنە ءمان بەرىپ، اسىرەسە، اتالعان ەلدىڭ «ەڭبەككە رۇقسات بەرۋ جۇيەسىنىڭ» تىزىمىنە قازاقستاندى قوسۋى ەلىمىز ءۇشىن اسا ماڭىزدى ەكەنىنە نازار اۋداردىم، - دەدى مۇرات نۇرتىلەۋ بريفينگتە.
سونداي-اق، مينيستر وڭتۇستىك كورەيامەن ساياسي ديالوگ، ساۋدا-ەكونوميكالىق جانە مادەني-گۋمانيتارلىق ىنتىماقتاستىق ءورىسىن كەڭەيتۋ - ەكى ەلگە ورتاق ءىس ەكەنىن ايتتى.
پاك جينمەن قويان-قولتىق جۇمىس ىستەۋگە دايىن ەكەنىمدى تاعى قۋاتتاپ، ەكىجاقتى قارىم-قاتىناسىمىزدى جاڭا بەلەسكە شىعارۋعا ورتاق كۇش سالاتىنىمىزعا كامىل سەنىمدىمىن،- - دەدى ول.
