فۋتبولدان قازاقستان قۇراماسى ۇلتتار ليگاسى س جولى بويىنشا پلەي-وفف ساتىسى جارتىلاي فينالىندا گرەكيادان جەڭىلدى. وسىلايشا ەلىمىز 2024 جىلعى ەۋروپا چەمپيوناتىنىڭ جولداماسىنا ىلىنبەدى، دەپ حابارلايدى «ادىرنا» ءتىلشىسى.
21 ناۋرىز كۇنى افينا قالاسىندا وتكەن ماتچ 0:5 ەسەبىمەن اياقتالدى.
گرەكيالىق فۋتبولشىلار ويىندى بەلسەندى باستادى. 9-مينۋتتا اناستاسيوس باكاسەتاس پەنالتيدى مۇلتىكسىز ورىنداپ، ءوز قۇراماسىن العا شىعاردى. 15-مينۋتتا ديميتريس پەلكاس، 37-مينۋتتا فوتيس يواننيديس، 40-مينۋتتا ديميتريس كۋربەليس ەسەپتى ەسەلەي ءتۇستى.
ەكىنشى تايمدا قازاقستان قۇراماسىنىڭ ويىنشىسى ەركىن تاپالوۆ اۆتوگول سوعىپ، ماتچ قازاقستان كومانداسىنىڭ ءىرى جەڭىلىسىمەن اياقتالدى.
ەندى گرەكيا قۇراماسى ۇلتتار ليگاسى س جولى بويىنشا پلەي-وفف ساتىسى فينالىندا 26 ناۋرىزدا گرۋزيامەن وينايدى. سول كۇنى ليۋكسەمبۋرگ پەن قازاقستان كوماندالارى جولداستىق كەزدەسۋ وتكىزەدى.