وسكەمەن گارنيزونىنداعى وقۋ-جاتتىعۋ پوليگونىنىڭ باستىعى كاپيتان راي ورازبەكوۆ قولونەر شەبەرى رەتىندە قالىڭ جۇرتقا تانىمال. زايسان قالاسىنىڭ تۋماسى وقۋشى كەزىنەن سۋرەتكە بەيىم ەدى. ول الماتى قالاسىنداعى قۇرلىق اسكەرلەرىنىڭ اسكەري ينستيتۋتىنىڭ كۋرسانتى اتانعان شاعىندا دا بويىنداعى ونەرىن جوعالتپادى. كەرىسىنشە دامىتىپ، سۋرەت سالۋدان بولەك، ءمۇسىن جاساۋعا ماشىقتاندى. الايدا، ءبىلىم ورداسىندا شىعىستىڭ شىمىرى بۇل قاسيەتىمەن تانىلا قويمادى.
2019 جىلى گۆاردەيسك گارنيزونىنىڭ 30212 اسكەري بولىمىنەن وسكەمەن قالاسىنداعى 27943 اسكەري بولىمىنە اۋىسقان شاقتا عانا تالانتى توبە تانىتادى. وڭىرلىك قولباسشىلىقتان ءاربىر اسكەري بولىمگە قالاشىقتا قاردان ءمۇسىن جاساڭدار دەگەن تاپسىرما بەرىلەدى. قارۋلاستار قاتارىندا ءوز جۇمىسىن اياقتاپ بولعان رايدىڭ تۋىندىسىن تەكسەرۋشى توپ باقىلايدى. ارنايى توپ ىشىندە 27943 اسكەري ءبولىمىنىڭ كومانديرى پولكوۆنيك ەرجان مەيىرمانوۆ بار بولاتىن. ول رايدىڭ قاردان جاسالعان ءمۇسىنىن كورىپ اڭ-تاڭ بولادى. رايدىڭ ايتۋىنشا، وسى ساتتەن باستاپ اسكەري بولىمدەگىلەر دە ونىڭ تۇرعىزعان قارسۇلباسىنا تاڭىرقاپ، «سەن اسكەري قىزمەتكەر ەمەس، ناعىز ءمۇسىنشى بولاتىن ادامسىڭ عوي» دەگەن كورىنەدى.
- اراعا كۇن سۋىتپاي اسكەري ءبولىم كومانديرى وزىنە شاقىرىپ، ءمۇسىندى قاردان ەمەس، باسقا دا ۇزاق ساقتالاتىن قاتتى زاتتاردان جاساپ كورۋىمدى سۇراپ، ۇسىنىس ءبىلدىردى. اسكەري ءبولىم قاسىم قايسەنوۆ ەسىمىمەن اتالعان سوڭ، ماعان قازاق باتىرىنىڭ ءبيۋستىن تۇرعىزۋ قاجەت ەدى. بۇل مەنىڭ ومىرىمدەگى اسا ۇلكەن جاۋاپكەرشىلىككە تولى ساتتەردىڭ ءبىرى بولدى. سەبەبى قاردان جاسالعان ءمۇسىن كۇن جىلىعاندا ەرىپ كەتەتىن، ال ەندىگى كىرىسەتىن تۋىندىم ەرىپ كەتپەيدى، امبە اسكەري ءبولىمنىڭ كورىكتى جەرىنە قويىلماق. بىر اپتا بولماي مەن قاسىم قايسەنوۆتىڭ ءبىر ەمەس، ەكى ءمۇسىنىن جاساپ شىعاردىم، – دەيدى 27943 اسكەري ءبولىمى وقۋ-جاتتىعۋ پوليگونىنىڭ باستىعى كاپيتان راي ورازبەكوۆ.
كومانديرى شەبەرحاناعا كەلىپ، ونىڭ مۇسىن جاساۋداعى شەبەرلىگىنە كوڭىلى تولىپ، تاعى دا بىرەۋ كەرەك دەيدى. ءبىر مۇسىنگە ءبىر-ەكى اي ۋاقىت جۇمسالعان. ال اسكەري قىزمەتتە تاپسىرما جەدەل ءارى بۇلجىتپاي اتقارىلۋى ءتيىس. ءبىر اپتادا جاسالعان باتىردىڭ ەكى ءمۇسىنى دە اسكەري ءبولىم تورىنەن ورىن تاپتى. بىرەۋى گارنيزونداعى داڭقتى جاۋىنگەر اتىنداعى مۋزەيگە قويىلسا، ەكىنشىسى اسكەري ءبولىمنىڭ كىرە بەرىسىندەگى اللەيادان تۇراق تاپتى. الايدا، قازاقتىڭ ماڭدايىنا بىتكەن باتىردىڭ قوس ءبيۋستىن تۇرعىزعاننان كەيىن دە اسكەري قىزمەتشى دامىل تاپپاي، وسكەمەندەگى اسكەري قالاشىقتا ساياباق بوي كوتەرگەن، دەمالىس ورنىنا اسكەري وتباسىنىڭ ءمۇسىنى قاجەت بولىپ، ول بۇل ەسكەرتكىشتى ءبىر اپتاعا جەتكىزبەي سومداپ شىعادى. ەل كوڭىلىنەن شىققان ەسكەرتكىشكە بۇگىندە قالا تۇرعىندارى مە كەلگەن قوناقتار بارىپ، تاماشالاپ، سۋرەتكە ءتۇسىپ ءجۇر. الايدا راي ورازبەكوۆ بولسا، قولونەردى جەكە ءحوببيىم دەيدى ەكەن.
27943 اسكەري ءبولىمى پوليگونىنىڭ باستىعى بۇدان كەيىن دە بىرقاتار ىلكىمدى ىستەردىڭ سەبەپشىسى اتانادى. وتكەن جىلى شاحارداعى سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتى قابىرعاسىنان اسكەري كافەدرا اشىلادى. وسىعان وراي، قابانباي باتىردىڭ ءبيۋستىن جاساپ شىعارادى. كاپيتان بۇل تۋىندىسىن دا سوزباققا سالمايدى. نەبارى ءبىر اپتا وتپەي دايىن بولادى.
رايدىڭ قولونەردەن بولەك، اسكەري سالادا اتقارعان جەمىستى ىستەرى جەتەرلىك. وقۋ-جاتتىعۋ پوليگونى باستىعى قازىرگى كۇندە قاۋىرت جۇمىسىنىڭ قىزۋ قارقىنىندا قولونەرمەن اينالىسۋدى ءبىر شەتكە ىسىرىپ قويعان. «اسكەري قىزمەت مەن ءۇشىن ءبىرىنشى ورىندا» دەيدى ول. ساۋساعىنان بال تامعان شەبەر جايىندا وڭىردەگى قولباسشىلىقتا جاعىمدى پىكىردە.
– «شىعىس» وڭىرلىك قولباسشىلىعىنا قاراستى تورت پوليگون بولسا، ەڭ وزىعى راي باسقاراتىن وقۋ-جاتتىعۋ الاڭقايى دەپ سانايمىن. سەبەبى ول بىلتىر عانا پوليگون باستىعى بولىپ تاعايىندالدى. اسكەري قىزمەتشى نەبارى قىسقا ۋاقىتتىڭ ىشىندە وقۋ-جاتتىعۋ الاڭىن ادام تانىماستاي وزگەرتتى. پوليگوندا دوڭگەلەكتى تەحنيكاعا ارنالعان اۆتودروم جوق ەدى. تاياۋدا ارنايى اۆتودروم ىسكە قوسىلدى. پوليگونداعى ەلەكتر باعانالارىن جاڭارتىپ، جارىق تا ورناتتى. وقۋ-جاتتىعۋ الاڭىندا ورنالاسقان اسكەري نىسانداردىڭ ءبىرازىن قايتا جوندەدى. ءتىپتى ەسكى عيمارتتاردىڭ ءوزى ادەمىلەنىپ، بارلىعى گۇلدەنگەن. اباتتاندىرۋ جۇمىستارى جۇرگىزىلگەن. اسكەري نىساندار جاڭا شاتىر جابىندىسىمەن جابدىقتالعان. مەن رايدىڭ تاپسىرمانى جەدەل ورىندايتىندىعىنا تاڭ قالدىم. ول تەك ءمۇسىن جاساۋدا عانا ەمەس، كەز كەلگەن ىستى جىلدام ءارى ساپالى ورىندايدى، – دەيدى «شىعىس» وڭىرلىك قولباسشىلىعىنىڭ جاۋىنگەرلىك دايارلىق باسقارماسىنىڭ اعا وفيتسەرى مايور قانات كاپانوۆ.
الماس قىلىش قىن تۇبىندە جاتپايدى دەگەندەي، راي بويىنداعى ونەرى اسكەري سالادا دا ءوز ارناسىن تاپتى. ال، وتباسىدا ءۇش بالانىڭ ارداقتى اكەسى اتانعان ازاماتتىڭ ۇستانىمى ادام بوپ ومىرگە كەلگەن سوڭ، ادامگەرشىلىكتى بيىك ۇستاۋ ەكەن.
اباي وڭىرلىك گارنيزونىنىڭ ءباسپاسوز قىزمەتى
"ادىرنا" ۇلتتىق پورتالى
