ەرتىس-بايان وڭىرىندەگى قازاق ءتىلدى بىردەن-ءبىر وبلىستىق گازەت، اتا باسىلىم «Saryarqa samaly» «URKER-2022» ۇلتتىق بايگەسىنىڭ جەڭىمپازى اتاندى.
وسىدان 93 جىل بۇرىن اتاقتى تۇركىتانۋشى، بەلگىلى عالىم، فيلولوگ بەيسەنباي كەنجەباەۆ گازەتتىڭ نەگىزىن قالاعان ەدى. ودان كەيىن دە كوپتەگەن ءىرى تارلاندار باسىلىمدا ەڭبەك ەتتى. ولاردىڭ قاتارىندا ءازىلحان نۇرشايىقوۆ، رامازان توقتاروۆ، مۇزافار الىمباەۆ، قابدىكارىم ىدىرىسوۆ باستاعان باسقا دا بەلگىلى تۇلعالار بار.
— شىن مانىندە قازىر ايماقتاردا وزەكتى ماسەلە كوپ. وڭىرلىك جۋرناليستيكا وكىلدەرى سول پروبلەمالاردى زەرتتەپ، تالداپ، ساراپقا سالىپ، قوعام مەن بيلىك الدىندا كوتەرۋگە تىرىسىپ جاتىر. سول اۋقىمدى ءىستىڭ باعاسى وسى سىيلىق بولسا كەرەك. ەكىنشىدەن، بۇل - ءبىز ءۇشىن اماناتتىڭ ورىندالۋى. ءبىزدى تاربيەلەگەن الدىڭعى بۋىن ارداگەر جۋرناليستەر بار. بۇل – گازەتتىڭ دامۋىنا زور ەڭبەك سىڭىرگەن ارداگەر-جۋرناليستەردىڭ، بۇگىنگى ۇجىمنىڭ، تۇراقتى اۆتورلار مەن وقىرمانداردىڭ بارلىعىنا ورتاق ولجا! - دەيدى باسىلىمنىڭ باس رەداكتورى نۇربول جايىقباەۆ.
قاراشاڭىراق، پاۆلودار وبلىستىق «Saryarqa samaly» گازەتىنىڭ بۇل قۋانىشىنا وراي ءار وڭىردەن جاناشىر وقىرمانداردان اق تىلەك، جىلى لەبىزدەر كوپتەپ كەلۋدە. وسى ساناتتا رەسمي قۇتتىقتاۋىن جولداعان قر پارلامەنتى سەناتىنىڭ دەپۋتاتى التىنبەك نۇحۇلى باسىلىم جەتىستىگىن جوعارى باعالادى.
— ۇلتتىق بايگەدە بۇلايشا وزا شابۋ – بارلىق اقپارات قۇرالىنىڭ ماڭدايىنا جازىلعان ەمەس. بۇل تابىس جەكە گازەتتىڭ عانا ەمەس، پاۆلودار وبلىسىنىڭ جۋرناليستيكاسىنىڭ جەتىستىگى، ايتا بەرسەك، تۇتاس وبلىستىڭ قۋانىشى! — دەدى حالىق قالاۋلىسى.
بۇگىندە وبلىستىق باسىلىم زامان اعىمىنان قالماي، وقىرمانعا ساپالى اقپارات جەتكىزۋدىڭ بارلىق جولدارىن تەرەڭ مەڭگەرگەن. گازەتتىڭ عالامتورداعى رەسمي سايتى مەن الەۋمەتتىك جەلىلەردەگى پاراقشالارى دا سۇرانىسقا يە.
باسىلىم ۇجىمى وقىرمانمەن تىكەلەي جۇمىس ىستەۋگە كوشكەن. ەل-ەلدى ارالاپ، اۋدان، اۋىلداردا زاماناۋي فورماتتا كەزدەسۋلەر وتكىزۋدە. ونىڭ ىشىندە، تانىمدىق ءىس-شارالار، كونتسەرتتىك، ويىن-ساۋىق شارالارى، ۇتىس ويىندارى ۇيىمداستىرىلۋدا. وسىلايشا، وركەنيەتتى قوعامدا ءباسپاسوزدىڭ ءوز ورىنى بار ەكەنىن دالەلدەپ كەلەدى.
ۇجىم الداعى ۋاقىتتا دا وسى بەلەستە قالىپ، جەتىستىكتى ەسەلەۋ ءۇشىن ايانىپ قالماق ەمەس.
"ادىرنا" ۇلتتىق پورتالى
