قازاقستان مەن ەۋروپالىق وداق تۇراقتى شيكىزات، باتارەيالار جانە «جاسىل» سۋتەك قۇنى تىزبەگى سالاسىنداعى ستراتەگيالىق ارىپتەستىك بويىنشا ءوزارا تۇسىنىستىك تۋرالى مەموراندۋم بەكىتتى. بۇل تۋرالى قر پرەمەر-ءمينيسترىنىڭ ءباسپاسوز قىزمەتى حابارلادى، دەپ جازادى "ادىرنا" ۇلتتىق پورتالى.
قۇجاتقا مىسىردا كليماتتىڭ وزگەرۋى جونىندەگى جاھاندىق كونفەرەنتسيانىڭ (COP27) الەم كوشباسشىلارى ءسامميتى اياسىندا قر پرەمەر-ءمينيسترى ءاليحان سمايىلوۆ پەن ەۋروپالىق كوميسسيا پرەزيدەنتى ۋرسۋلا فون دەر ليايەن قول قويدى.
پرەمەر-مينيستر ءوز سوزىندە جاڭا مەموراندۋمنىڭ ماڭىزدىلىعىن اتاپ ءوتتى.
«قۇجاتقا قول قويۋ قازاقستاننىڭ ەو ونەركاسىپتىك اليانستارىمەن قارجىلىق جانە تەحنولوگيالىق ىنتىماقتاستىعىن ورناتۋىنا جاعداي جاسايدى. جالپى، ءبىزدىڭ ەلىمىز ەۋروپالىق بيزنەس ءۇشىن تارتىمدىلىعى جوعارى قاجەتتى فاكتورلاردىڭ بارىنە يە، ونىڭ ىشىندە ارتاراپتاندىرىلعان ەنەرگيا كوزدەرى مەن جوعارى ترانزيتتىك-كولىكتىك الەۋەت بار», — دەدى ءاليحان سمايىلوۆ.
سونداي-اق ول ەۋروپالىق وداق – قازاقستاننىڭ ەڭ ءىرى جانە ماڭىزدى ساۋدا سەرىكتەسى بولىپ قالا بەرەتىنىن، ەلىمىزدىڭ سىرتقى ساۋداداعى ۇلەسىنىڭ شامامەن 30%-ى ەۋرووداققا تيەسىلى ەكەنىن ايتتى.
«سونىمەن قاتار بۇگىندە ينۆەستيتسيالىق ىنتىماقتاستىقتى ارتتىرۋ جانە ءوزارا ساۋدا كولەمىن ۇلعايتۋ بويىنشا ايتارلىقتاي الەۋەت بارىن كورىپ وتىرمىز», — دەدى پرەمەر-مينيستر.
ءوز تاراپىنان ۋرسۋلا فون دەر ليايەن ەۋرووداق قازاقستان ەكونوميكاسىنىڭ ەڭ ءىرى ينۆەستورلارىنىڭ ءبىرى بولىپ تابىلاتىنىن، سونداي-اق بۇگىن قول قويىلعان مەموراندۋم بۇل قاتىناستاردى ودان ءارى كەڭەيتە تۇسەتىنىن اتاپ ءوتتى.
«ءبىز وسىعان دەيىن قالىپتاسقان ءوزارا تەرەڭ قارىم-قاتىناسىمىزدىڭ جاڭا پاراعىن اشتىق. ەۋروپالىق وداق پەن قازاقستان كوپ جىلدان بەرى بەرىك ەكونوميكالىق بايلانىستاردى دامىتىپ كەلەدى. ءبىز ستراتەگيالىق وندىرىستىك تىزبەكتەرىمىزدىڭ ينتەگراتسياسىن نىعايتۋ باعىتىندا بىرگە جۇمىس ىستەيمىز. بۇل سيرەك كەزدەسەتىن جەر ەلەمەنتتەرىن وندىرۋگە، اككۋمۋلياتور وندىرىسىنە جانە "جاسىل" سۋتەككە قاتىستى», — دەدى ۋرسۋلا فون دەر ليايەن.
ونىڭ ايتۋىنشا، بۇل وندىرىستىك تىزبەكتەر بۇكىل الەمدە «جاسىل» جانە تسيفرلىق وزگەرىستەردىڭ قوزعالتقىشتارى بولىپ تابىلادى.
«مىسالى، ءبىز اككۋمۋلياتورلاردىڭ ەلەكتروموبيلدەر ءۇشىن نەمەسە جاڭارتىلاتىن ەنەرگيانى ساقتاۋ ءۇشىن قانشالىقتى ماڭىزدى ەكەنىن بىلەمىز. سوندىقتان ءدال قازىر ىنتىماقتاستىعىمىزدى نىعايتۋ ءۇشىن قولايلى ءسات», — دەدى ەۋروپالىق كوميسسيا پرەزيدەنتى. ول ءوزارا تۇسىنىستىك تۋرالى مەموراندۋم ۇزاق مەرزىمدى ارىپتەستىك قاتىناستاردى دامىتۋعا باعىتتالعانىن اتاپ ءوتتى.
"ادىرنا" ۇلتتىق پورتالى
