الماتىدا شاڭىراق كوتەرگەن ەكى جاس ۇيلەنۋ تويىن الماتى قالاسىندا ورنالاسقان №1 بالالار ۇيىنە ارنادى، دەپ حابارلايدى “ادىرنا” ۇلتتىق پورتالى
Azattyq Ruhy پورتالىنىڭ مالىمەتىنشە، اتالمىش بالالار ۇيىندە قازىرگى ۋاقىتتا 80-نەن اسا بالا تاربيەلەنىپ جاتىر. جاستار مۇندا ۇيلەنۋ تويىنىڭ شاعىن ءتۇرىن وتكىزىپ، تويدىڭ اسەرىن شىنايى تۇردە سەزىنۋىنە مۇمكىندىك سىيلادى. جاستار اراسىندا سوڭعى ۋاقىتتارى زور قىزىعۋشىلىققا يە بولعان ماكليۋبە تاماعىن اكەلىپ، ۇلكەن تورتتى دا دوڭگەلەتە بىرگە كەستى.
«بۇگىن بالالار ۇيىنە كەلىپ ۇيلەنۋ تويىنىڭ شاعىن ءتۇرىن ۇيىمداستىردىق. بۇل ويىمدى كوپتەن بەرى جوسپارلاپ ءجۇر ەدىم. تۇركيا ەلىندە شاڭىراق كوتەرگەن ەكى جاستىڭ بالالار ۇيىنە بارىپ، قايىرىمدىلىقپەن اينالىسقانىن ەستىدىم. سوندا وسى يدەيا ساپ ەتە قالدى. ليمۋزين جالداپ، ارتىق شىعىنعا باتىپ، ىسىراپ جاساعانشا قوعامعا از دا بولسىن پايدا اكەلۋدى ويلادىق، بالالاردىڭ دا شىنايى قۋانىشىن، كۇلكىسىن كورگىمىز كەلدى. نيەتىمنىڭ ارتىندا وتباسىلىق قۇندىلىقتاردى ناسيحاتتاۋ دەگەن وي جاتىر. بۇگىنگى جاس - ەرتەڭگى ەل تىزگىنىن ۇستار ازامات. ال وتان وتباسىنان باستالاتىنى بەلگىلى. وتباسىنا مەيىرىمدىلىك تانىتقان ادامنان ەرتەڭ بىلىكتى مامان، ەلىنە جاناشىر ازامات ءوسىپ شىعادى.
ويعا العان ءىسىم قالاي وتەدى دەپ قوبالجىپ ەدىم، بالالاردىڭ كوڭىلىنەن شىققان سياقتى. جۇزدەرىندەگى شىنايى كۇلكىنى، قۋانىشتى بايقادىق. قاسىمىزعا كەلىپ، تىلەكتەرىن ايتىپ، قۇشاقتاپ كەتتى. بالا پەرىشتە عوي، ءبارىن شىنايى كورسەتەدى. اتا-انا ماحابباتىنان ەرتە ايىرىلسا دا جۇزدەرىنەن كۇلكى كەتپەيدى. ارقايسىسىنىڭ بولاشاعى جارقىن، باقىتتى بولۋىن تىلەيمىن! ال ءوزىم جوسپارىمنىڭ جۇزەگە اسقانىنا قۋانىپ وتىرمىن»، - دەدى كۇيەۋ جىگىت ماديار قايراتۇلى.
قوس جاس بۇلدىرشىندەرگە ارناپ تانىمال مۋلتفيلم، فيلم كەيىپكەرلەرىنىڭ كيىمىن كيگەن انيماتورلاردى جالداپ، ءتۇرلى سايىستار وتكىزدى.
«ءوز باسىم ىسىراپ جاساعاندى ۇناتپايمىن. جولداسىم ەكەۋىمىز ءسوز بايلاسىپ، اق نەكەمىزدى قيعاننان كەيىن بالالارعا ارناپ شاعىن توي وتكىزۋ تۋرالى يدەياسىن ايتتى. مەن دە بىردەن قۋانا كەتتىم. ۇيلەنۋدى جوسپارلاپ جۇرگەن وزگە جاستارعا بۇل ءىسىمىز ۇلگى بولادى دەگەن ويدامىن»، - دەدى قالىڭدىق بەنازير ەرىكقىزى.
شاعىن تويدىڭ سوڭىندا كۇيەۋ جىگىت پەن قالىڭدىق ارنايى ازىرلەنگەن تورتتى كەسىپ، ءدام تاتقاننان كەيىن بالالارعا ۇلەستىرىپ بەردى
