بۇل تۋرالى وقۋ-اعارتۋ ءمينيسترى اسحات ايماعامبەتوۆ مالىمدەدى، دەپ حابارلايدى «ادىرنا» ءتىلشىسى.
«مەملەكەت باسشىسى الەۋمەتتىك وسال وتباسىلاردان شىققان بالالاردى قولداۋ جانە ءبىلىم بەرۋدىڭ ينكليۋزيۆتىلىگىن دامىتۋ جونىندە تاپسىرما بەردى.
وسى تاپسىرما اياسىندا ءتيىستى بۇيرىققا قول قويدىم. بۇل قۇجات الەۋمەتتىك وسال وتباسىلاردان شىققان بالالارعا مامانداندىرىلعان مەكتەپتەرگە ءتۇسۋ ءۇشىن 15 پايىز كۆوتا الۋعا مۇمكىندىك بەرەدى.
ياعني ەندى وسىنداي وتباسىلاردان شىققان 1500-عا دەيىن بالا جاڭا كۆوتا بويىنشا «بيل»، «دارىن» جانە ت.ب. مەكتەپتەرگە وقۋعا تۇسە الادى»،—دەدى ۆەدومستۆو باسشىسى.
ايتۋىنشا، جاڭا بۇيرىقتىڭ ارقاسىندا الەۋمەتتىك وسال وتباسىلاردان شىققان بالالار وسىنداي مامانداندىرىلعان مەكتەپتەرگە قابىلدانعان.
«تۇرمىسى تومەن بولعاندىقتان قوسىمشا ءبىلىم الۋعا مۇمكىندىگى جوق بالالار ءۇشىن وسىنداي مەكتەپتەردە وقۋعا مۇمكىندىك بەرۋ ولاردىڭ بولاشاقتاعى جەتىستىكتەرىنە وڭ اسەر ەتەتىنىنە سەنىم بار.
بۇعان دەيىن ۇلتتىق قوعامدىق سەنىم كەڭەسىنىڭ ۇسىنىستارى اياسىندا كوللەدجدەر مەن جوعارى وقۋ ورىندارىنا تۇسۋگە وسىعان ۇقساس كۆوتالاردى ەنگىزگەن بولاتىنبىز. سول شەشىمنىڭ ارقاسىندا مىڭداعان بالالار وقۋعا ءتۇستى.
ءبىز جاس دارىندارعا دا، ءوزىن ءالى كورسەتە الماعاندارعا دا تەڭ جاعداي جاساۋىمىز كەرەك. ال ۇستازدارىمىز وزات بالالارعا دا، وقۋدا ۇلگەرىمى ناشار بولسا دا، قولداۋ مەن جىلى سوزگە مۇقتاج بالالارعا دا مەيىرىممەن قارايدى دەپ ۇمىتتەنەمىن»،—دەپ ءسوزىن تولىقتىردى ول.
