Bul týraly Oqý-aǵartý mınıstri Ashat Aımaǵambetov málimdedi, dep habarlaıdy «Adyrna» tilshisi.
«Memleket basshysy áleýmettik osal otbasylardan shyqqan balalardy qoldaý jáne bilim berýdiń ınklıýzıvtiligin damytý jóninde tapsyrma berdi.
Osy tapsyrma aıasynda tıisti buıryqqa qol qoıdym. Bul qujat áleýmettik osal otbasylardan shyqqan balalarǵa mamandandyrylǵan mektepterge túsý úshin 15 paıyz kvota alýǵa múmkindik beredi.
Iaǵnı endi osyndaı otbasylardan shyqqan 1500-ǵa deıin bala jańa kvota boıynsha «BIL», «Daryn» jáne t.b. mektepterge oqýǵa túse alady»,—dedi vedomstvo basshysy.
Aıtýynsha, jańa buıryqtyń arqasynda áleýmettik osal otbasylardan shyqqan balalar osyndaı mamandandyrylǵan mektepterge qabyldanǵan.
«Turmysy tómen bolǵandyqtan qosymsha bilim alýǵa múmkindigi joq balalar úshin osyndaı mektepterde oqýǵa múmkindik berý olardyń bolashaqtaǵy jetistikterine oń áser etetinine senim bar.
Buǵan deıin Ulttyq qoǵamdyq senim keńesiniń usynystary aıasynda kolledjder men joǵary oqý oryndaryna túsýge osyǵan uqsas kvotalardy engizgen bolatynbyz. Sol sheshimniń arqasynda myńdaǵan balalar oqýǵa tústi.
Biz jas daryndarǵa da, ózin áli kórsete almaǵandarǵa da teń jaǵdaı jasaýymyz kerek. Al ustazdarymyz ozat balalarǵa da, oqýda úlgerimi nashar bolsa da, qoldaý men jyly sózge muqtaj balalarǵa da meıirimmen qaraıdy dep úmittenemin»,—dep sózin tolyqtyrdy ol.
