وقۋشىلارعا لىق تولعان مەكتەپتىڭ ديرەكتورى ءوز كابيتەتىنىڭ كىلتىن مۇعالىمدەرگە ۇستاتىپ، جۇمىس ورنىن جەرتولەگە اۋىستىردى. اتالمىش ءبىلىم شاڭىراعىنا وقۋشىلار سىيماي، ءدالىز بەن كيىم قوياتىن بولمەلەر دە سىنىپقا اينالعان. بۇل جايلى "ادىرنا" ۇلتتىق پورتالى " Liter.kz "-كە سىلتەمە كورسەتە وتىرىپ حابارلادى.
اقتوبەدەگى ەسەت باتىر اۋدانى (ەل ىشىندە - نۇر سيتي), دىنمۇحاممەد قوناەۆ اتىنداعى ءبىلىم ورداسى وقۋشىعا لىق تولى. قازىر مەكتەپ 3 603 بالانى (تالابى بويىنشا - 2400 وقۋشى بولۋى ءتيىس) ەكى اۋىسىمدا وقىتىپ جاتىر. باستاۋىشتا 460 وقۋشى بار. جالپى - 19 cىنىپ. وقۋشىلاردى سىنىپتارعا ءبولۋ جۇمىسى دا اۋقىمدانىپ، "ت" سىنىبىنا دەيىن اشىلعان. جىل سايىنعى مەكتەپ تالاپكەرلەرىنىڭ سانى 400-500-گە ارتىپ وتىر.
مەكتەپ ديرەكتورى ابزال تاجىمىشەۆتىڭ ءوزى جىلى، جايلى بولمەسىن 11-cىنىپتىڭ وقۋشىلارىنا تابىستاپ، استىڭعى قاباتقا تۇسكەن.
- 1 قىركۇيەكتەن بەرى وسىندامىن. نورماتيۆ بويىنشا ءبىر اۋىسىمدا 1 200 وقۋشى بولۋى ءتيىس، ياعني ەكى اۋىسىمدا – 2 400. ال بىزدە 3 603 وقۋشى وقيدى، ياعني 1 203 وقۋشى بۇل نورماتيۆتەن ارتىق. ءبىز پايدالانۋعا بولاتىن بارلىق بولمەلەر: كيىم-كەشەك بولمەلەرىن، ءدالىزدى، جەرتولەنى قولداندىق، - دەدى تاجىمىشەۆ.
قازىرگى كۇنى جەرتولەدە دومبىرادا ۇيىرمەسىنىڭ كابينەتىن جاساۋ جۇمىستارى قىزۋ ءجۇرىپ جاتىر. وندا 100 وقۋشى وقيدى. مەكتەپ ۇجىمى تىزە قوسىپ، وزدەرى جەرتولەدە كابينەت جاساقتاپ جاتىر، ەر مۇعالىمدەر ەدەن قۇيىپ، كەرەگە سىلاپ، گيپسوكارتوننان قابىرعالار ورناتۋدا.
ماسەلەنىڭ شەشىمىن تابۋ ءۇشىن مەكتەپتىڭ ىرگەسىنەن ەكىنشى عيمارات سالۋ قاجەت. بىراق ازىرگە بۇعان قاتىستى جوبالاۋ-سمەتالىق قۇجاتتاما دايىن. مەكتەپ اكىمشىلىگى جسق-نىڭ ساراپتامامەن اينالىسىپ جاتقانىن ايتتى. اكىمدىك قىزمەتكەرلەرىنىڭ ايتۋىنشا، ءۇردىس 45 كۇنگە سوزىلىپ،ءىس-قاعازدارمەن جۇمىس بيىل تولىق اياقتالادى.
"ادىرنا" ۇلتتىق پورتالى
