Oqýshylarǵa lyq tolǵan mekteptiń dırektory óz kabıtetiniń kiltin muǵalimderge ustatyp, jumys ornyn jertólege aýystyrdy. Atalmysh bilim shańyraǵyna oqýshylar syımaı, dáliz ben kıim qoıatyn bólmeler de synypqa aınalǵan. Bul jaıly "Adyrna" ulttyq portaly " Liter.kz "-ke silteme kórsete otyryp habarlady.
Aqtóbedegi Eset batyr aýdany (el ishinde - Nur sıtı), Dinmuhammed Qonaev atyndaǵy bilim ordasy oqýshyǵa lyq toly. Qazir mektep 3 603 balany (talaby boıynsha - 2400 oqýshy bolýy tıis) eki aýysymda oqytyp jatyr. Bastaýyshta 460 oqýshy bar. Jalpy - 19 cynyp. Oqýshylardy synyptarǵa bólý jumysy da aýqymdanyp, "T" synybyna deıin ashylǵan. Jyl saıynǵy mektep talapkerleriniń sany 400-500-ge artyp otyr.
Mektep dırektory Abzal Tájimishevtiń ózi jyly, jaıly bólmesin 11-cynyptyń oqýshylaryna tabystap, astyńǵy qabatqa túsken.
- 1 qyrkúıekten beri osyndamyn. Normatıv boıynsha bir aýysymda 1 200 oqýshy bolýy tıis, ıaǵnı eki aýysymda – 2 400. Al bizde 3 603 oqýshy oqıdy, ıaǵnı 1 203 oqýshy bul normatıvten artyq. Biz paıdalanýǵa bolatyn barlyq bólmeler: kıim-keshek bólmelerin, dálizdi, jertóleni qoldandyq, - dedi Tájimishev.
Qazirgi kúni jertólede dombyrada úıirmesiniń kabınetin jasaý jumystary qyzý júrip jatyr. Onda 100 oqýshy oqıdy. Mektep ujymy tize qosyp, ózderi jertólede kabınet jasaqtap jatyr, er muǵalimder eden quıyp, kerege sylap, gıpsokartonnan qabyrǵalar ornatýda.
Máseleniń sheshimin tabý úshin mekteptiń irgesinen ekinshi ǵımarat salý qajet. Biraq ázirge buǵan qatysty jobalaý-smetalyq qujattama daıyn. Mektep ákimshiligi JSQ-nyń saraptamamen aınalysyp jatqanyn aıtty. Ákimdik qyzmetkerleriniń aıtýynsha, úrdis 45 kúnge sozylyp,is-qaǵazdarmen jumys bıyl tolyq aıaqtalady.
"Adyrna" ulttyq portaly
