Pavlodar oblysyndaǵy mektepter áli oqý jylyna daıyn emes. Bul týraly belsendi Ońǵar Qabden Facebook paraqshasyna jarııalady, dep habarlaıdy “Adyrna” ulttyq portaly.
Aıtýynsha, sáýirde bastalǵan jóndeý jumystary áli de bitpegen.
“Pavlodar oblysynda bıyl 46 mektep kúrdeli jóndeýden ótken. Qyryq alty mektep degenińiz árbir bes mekteptiń bireýi degen sóz. Sol úshin 9 mıllıard 200 mıllıon teńge bólingen. Jóndeýdi erte bastap ketý úshin sáýir aıynda jóndeýden ótýge tıis mektepterdiń oqýshylary sabaqty basqa mektepten oqypty. Sáýirden beri bes aı ótse de kóp mektep jańa oqý jylyna daıyn emes. Bul týraly oblys ákimi Ábilqaıyr Sqaqov "bir merdiger kompanııa onnan astam mektepti alyp alǵan. Sondyqtan úlgermegen" dep ótkende jaýap ta bergen. Bul merdiger kompanııalar kimdiki?
Biletinder bireýi eks-oblys ákimi Baqaýovqa qarasty deıdi. Endi bir merdiger kompanııa Shymkentten kelgen. Iaǵnı, burynǵy bilim basqarmasynyń basshysyna qatysty kompanııa desedi. Anyq-qanyǵyn quzyrly oryndar anyqtaı jatar. Mekteptegi jóndeýdi tezirek bitirý úshin ata-analardan aqsha jınaý deregi de tirkelipti. Buny aıtqan ata-analar balalary úshin aty-jónderin ataýdan bas tartty.
Myna sýrettegi mektepter erteń qalaı alǵashqy qońyraýdy soqpaq?”, dep jazdy Ońǵar Qabden.
Jýrnalıst Esenbek Sanatuly da mektep qurylysy týraly jazba qaldyrdy.
“Soǵan qaramastan erteń alǵashqy
qońyraýda mektepte soǵamyz dep otyr. Mektep (bálkim odan joǵary mekeme) basshylyǵy muǵalimderdi jumysqa salyp jatyr. Keıbir mektepter qosymsha qara kúsh jaldap oǵan ata-analardan aqsha jınaǵan. Mysaly, Pavlodardaǵy №5 mekteptiń ár synyby 15 myń teńgeden jınaǵan. Tıpa, tazalaýshy jaldaımyz depti. Al, №9 mekteptiń ata-analary 5 myń teńgeden qosýǵa májbúr bolǵan. Bul aqparatty aıtqan ata-analar aty jónderin atamaýdy surady. Óıtkeni, erteń balalary qýdalaýǵa
ushyraıdy. Ertis, Aqsý, Pavlodar, Sharbaqty, Ýspen aýdandarynda jáne oblys ortalyǵynda jóndeý júrip jatqan mektepterdegi jarty jylda bitpegen jumysty jarty kúnniń ishinde aıaqtaıdy, degenge sený qıyn. Qanshama aqsha!
Kóp tenderdi eki merdiger kompanııa utyp alǵan. Onyń biriniń quryltaıshysy eks-ákim. Al, kóp jerde «shymkenttik» dep atalyp júrgen kompanııa basqarmanyń burynǵy basshysyniki-mys”, dep jazdy ol.
”Adyrna” ulttyq portaly
