ەلىمىزدە «ۇزدىك پەداگوگ-2022» رەسپۋبليكالىق بايقاۋىنىڭ 64 جەڭىمپازى 190 ملن تەڭگەدەن استام قاراجات الدى. ياعني، ءار مۇعالىمگە 3 ميلليون تەڭگە تابىستالدى، دەپ حابارلايدى «ادىرنا» ءتىلشىسى ۆەدومستۆونىڭ ءباسپاسوز قىزمەتىنە سىلتەمە جاساپ.
سالتاناتتى ماراپاتتاۋ ءراسىمى ەلورداداعى Radisson Hotel Astana قوناقۇيىندە ءوتتى. ءىس-شارادا مەكتەپتەر مەن كوللەدجدەردىڭ ۇزدىك مۇعالىمدەرىنە اقشالاي سەرتيفيكاتتار مەن توسبەلگىلەردى وقۋ-اعارتۋ ءمينيسترى اسحات ايماعامبەتوۆ تابىس ەتتى.
مينيستر ارىپتەستەرىن «ۇزدىك پەداگوگ» اتاعىمەن قۇتتىقتاپ، ءوز ىسىنە ادالدىعى مەن ءبىلىم سالاسىن دامىتۋعا قوسقان ۇلەستەرى ءۇشىن العىسىن ءبىلدىردى. سونداي-اق مينيستر ۇستازدارعا قيىن بولسا دا، بىراق ۇلى كاسىپتە جاڭا تابىس مەن جەتىستىك تىلەدى.
«مۇعالىم ماماندىعى قاي كەزەڭدە بولماسىن ەڭ قاستەرلى ماماندىقتاردىڭ ءبىرى سانالادى. ال بۇگىن، ارىپتەستەر، سىزدەر احمەت بايتۇرسىنوۆ، ىبىراي التىنسارين سىندى كورنەكتى اعارتۋشىلاردىڭ يگى ءىسىن جالعاستىرىپ كەلەسىزدەر. پرەزيدەنتىمىز قاسىم-جومارت توقاەۆ سايلانعان كۇننەن باستاپ ۇستازدارعا ۇلكەن كوڭىل ءبولىپ كەلەدى. 2019 جىلى «پەداگوگ مارتەبەسى تۋرالى» زاڭ قابىلداندى. پرەزيدەنتتىڭ تىكەلەي تاپسىرماسى بويىنشا جىل سايىن تاربيەشىلەردىڭ، مۇعالىمدەردىڭ، كوللەدج وقىتۋشىلارىنىڭ جالاقىسى كوتەرىلىپ كەلەدى. زاڭ ۇستازداردى مىندەتىنە جاتپايتىن فۋنكتسيالاردان بوساتۋعا مۇمكىندىك بەردى.
جولداۋدى جۇزەگە اسىرۋ اياسىندا 2023 جىلدىڭ قاڭتارىنان باستاپ تاربيەشىلەر مەن مۇعالىمدەردىڭ جالاقىسى تاعى 25%-عا وسەدى. قازىر ارىپتەستەردىڭ كوپشىلىگى اپتاسىنا 6 كۇن ەمەس، 5 كۇن جۇمىس ىستەيدى. سونداي-اق ەڭبەك ءوتىلى 25 جىلدان اساتىن ارىپتەستەر ارنايى مەدالدارمەن ماراپاتتالادى. ال ءبىز بۇدان دا قولايلى جاعداي جاساۋ ءۇشىن جۇمىستى جالعاستىرا بەرمەكپىز. رەسپۋبليكالىق «ۇزدىك پەداگوگ» بايقاۋى ءوز سالاسىنىڭ ۇزدىكتەرىن انىقتاپ، ەڭبەگىڭىزدى، تاجىريبەڭىز بەن ءبىلىمىڭىزدى باعالاۋعا سەپتىگىن تيگىزەدى. سىزدەر كاسىبي مامانسىزدار. سىزدەرگە زور دەنساۋلىق، اماندىق تىلەيمىن»، - دەدى مينيستر اسحات ايماعامبەتوۆ قۇتتىقتاۋ سوزىندە.
بايقاۋدىڭ رەسپۋبليكالىق كەزەڭىندە اۋداندىق، قالالىق جانە وبلىستىق كەزەڭدەردىڭ قورىتىندىسى بويىنشا 123 مۇعالىم «ۇزدىك پەداگوگ – 2022» اتاعى ءۇشىن سىنعا ءتۇستى. بايقاۋدىڭ بارلىق كەزەڭىن تسيفرلاندىرۋدىڭ ارقاسىندا بيىل بايقاۋعا مۇعالىمدەردىڭ رەكوردتىق سانى، ياعني 5,5 مىڭنان استام مۇعالىم قاتىستى.
