جامبىل وبلىسىندا 111 ميلليون تەڭگەگە سالىنعان سپورت زال قاڭىراپ بوس تۇر، دەپ حابارلايدى "ادىرنا" ۇلتتىق پورتالى "حابار 24"-كە سىلتەپ.
جاڭا جىل قارساڭىندا جۋالى اۋدانى كارىقورعان اۋىلىنداعى سپورت زالى سالتاناتتى تۇردە كوپكە تانىستىرىلعان. دەنە شىنىقتىرۋ مەكەمەسى ونداعان جىل قاراۋسىز قالعان عيماراتتان اشىلىپ ەدى. ونىڭ قۇرىلىسىنا "اۋىل – ەل بەسىگى" باعدارلاماسى بويىنشا 111 ميلليون تەڭگەدەن استام قارجى جۇمسالعانى بەلگىلى بولدى. دەگەنمەن عيماراتتى تەكسەرىس كەزىندە جوندەۋ ساپاسىز جۇرگىزىلگەنى انىقتالدى.
“بۇل سپورت كەشەنىن قالپىنا كەلتىرۋ جۇمىستارى ناشار جۇرگىزىلدى. جوبالىق-سمەتالىق قۇجاتتامانى تەكسەرىپ، سپورتتىق قۇرال-جابدىق قامتاماسىز ەتىلمەگەنىن انىقتادىق. تاپسىرىس بەرۋشىنىڭ ايتۋىنشا، ولار سپورتتىق قۇرال-جابدىقتاردى جامبىل وبلىسىنىڭ دەنە شىنىقتىرۋ باسقارماسى ۋادە ەتكەنىن ايتادى”، – دەدى جۋالى اۋداندىق قوعامدىق كەڭەسىنىڭ مۇشەسى تالعات قۋاتبەكوۆ.
قۇرىلىستىڭ ساپاسىز بولعانىن اۋىل تۇرعىندارى دا ايتۋدا.
“باسىندا سمەتانى قاتە قۇراستىردىق دەدى. كارىز جۇيەسى تارتىلماعان، جارتى جولدا تاستاپ كەتكەن. تارازدان كوميسسيا كەلىپ، وسى كەمشىلىكتەردىڭ بارلىعىن انىقتادى. عيمارات كۇزەتىلمەيدى. ول بۇدان بىلاي بوس قتۇرا بەرسە، جويىلادى.”، – دەدى كارىقورعان اۋىلىنىڭ تۇرعىنى داۋرەن ۇسىپبەكوۆ.
عيماراتتا سىلاق قۇلاپ، قوقىس شاشىلىپ، جارىقسىز قالعان. ال جابدىقتالماعان بوس بولمەلەر سول كۇيى قالىپ كەتكەن. اۋداندىق سپورت ءبولىمى باسشىسىنىڭ ايتۋىنشا، اۋا رايىنىڭ قولايسىزدىعىنان عيماراتتى قالپىنا كەلتىرۋ جۇمىستارى كەيىنگە قالدىرىلىپتى. بۇل نىساندى سپورت ءبولىمى باقىلاۋعا الۋى كەرەك بولعان، دەگەنمەن ءالى ورىندالماعان.
قوعامدىق كەڭەس بارلىق كەمشىلىكتەردى كەپىلدىكپەن مەردىگەر جوياتىنىن ايتادى. جەرگىلىكتى بيلىك شتات جاساقتاپ، بيۋدجەتتىك ءوتىنىم بەرۋدى جوسپارلاپ وتىر. اۋداندىق ءماسليحات ماقۇلداسا، ءبىر ايدان كەيىن سپورت زالى اشىلادى دەپ كۇتىلۋدە.
