ءوز ۇلتىنىڭ تىلىندە ويلانبايتىن جاننىڭ قازاق قامىن ويلايتىنىنا ەشكىم سەنە قويمايدى. قر ءماجىلىسىنىڭ دەپۋتاتى، اقىن، ءتىل مايدانىندا بەلۋاردان تالاس-تارتىسقا تۇسكەن قازىبەك يسا وتكىر ماسەلەنى العا تارتتى. ول مەملەكەتتىك تىلگە ميى جەتپەيتىندەردى قىزمەتكە كىم السا، العان ادامنىڭ ءوزى اۋدارماشى بولسىن دەگەن تالاپتى بيلىككە تىكەسىنەن قويدى. بۇل جايلى "ادىرنا" ۇلتتىق پورتالى حابارلادى.
اقىن، قر ءماجىلىسىنىڭ دەپۋتاتى قازىبەك يسا بيلىكتىڭ باسىن ۇستاپ، تۋعان ءتىلىن cىرتقا يتەرىپ جۇرگەندەرگە قاتىستى جويقىن پىكىر ءبىلدىردى.
- مەملەكەتتىك قىزمەتتە مەملەكەتتىك ءتىلدى بىلمەيتىندەر قاپتاپ ءجۇر! مەملەكەتتىك ءتىلدى بىلمەي مەملەكەتتىك قىزمەتتە، ۇكىمەت پەن مينيسترلىكتە باسشىلىققا دەيىن، پرەزيدەنت اكىمشىلىگى مەن اكىمدىكتەردە جوعارى لاۋازىمدى قىزمەتتەردى قالاي اتقاراتىنىنا 31 جىلدا دا باسىمىز جەتپەي قويدى!
شىنىن ايتقاندا، بۇل 31 جىلدا بيلىك مەملەكەتتىك ءتىلدى تابانعا تاپتاپ، ياعني مەملەكەتتى، تاۋەلسىز قازاق ەلىن قورلاۋمەن كەلە جاتىر! وتكەن اپتانىڭ باسىندا، 14 قاراشاداعى پارلامەنت ماجىلىسىندە وتكەن “بالىق ءوندىرۋ مەن شارۋاشىلىعىن دامىتۋ” تاقىرىبىنا ارنالعان ۇكىمەت ساعاتىندا مەملەكەتتىك تىلدە سويلەي المايتىن “بالىق” ۆيتسە-مينيسترلەردىڭ “شەرۋى” ءوتتى… قازاقشا قويىلىپ جاتقان دەپۋتاتتار سۇراقتارىنا رەسەي دۋماسىنا كەلگەندەي رەسەي تىلىندە زۋىلداپ جاۋاپ بەرىپ جاتتى. ولار، اتاپ ايتقاندا، قر اۋىل شارۋاشىلىعى ۆيتسە-ءمينيسترى جەڭىس وسەرباي جانە قازاقستان رەسپۋبليكاسى ۇقك شەكارا قىزمەتى ديرەكتورىنىڭ ءبىرىنشى ورىنباسارى ايدار ايمۋرزيندەر. ۇلتتىق ەكونوميكا ۆيتسە-ءمينيسترى تيمۋر جاقسىلىقوۆ، - دەدى دەپۋتات.
كەيىننەن تۋعان ءتىل مايدانگەرى قازىبەك يسا بيلىكتەگى ازاماتتاردىڭ قازاقشا قويعان ساۋالدى ساناسىندا وربىتە الماي، شاتىپ-بۇتىپ، شاتقاياقتاعانىن جازدى.
- ەلنۇر بەيسەنباەۆتىڭ اۋىلداعى بالىقشىلاردىڭ جاعدايى تۋرالى سۇراعىنا تيمۋر جاقسىلىقوۆتىڭ جازىپ العان دايىن قازاقشا جاۋابى جاڭىلىسىپ كەتتى. “ديپلوممەن اۋىلعا” باعدارلاماسى تۋرالى جالپى قىسقا مالىمەتتى قازاقشا ءبىرىنشى سىنىپ وقۋشىسىنداي ەجىكتەپ زورعا وقىپ بەردى. بۇرىس جاۋاپقا قاناعاتتانباعان دەپۋتات ەلنۇر بەيسەنباەۆ: «قۇرمەتتى ۆيتسە-مينيستر مىرزا، مەن سىزدەن «ديپلوممەن اۋىلعا» باعدارلاماسىنىڭ قالاي ىسكە اسقانىن سۇراعان جوقپىن. مەن سىزدەن: «قانشا بالىقشىنى دايارلادىڭىزدار؟ قانشا بالىقشى ديپلوم الىپ، اۋىلعا باردى؟ قانشا بالىقشى ءۇي جانە الەۋمەتتىك قولداۋ الدى؟ 2009-دان بەرى 13 جىلدا قانشا بالىقشىعا قولداۋ كورسەتتىڭىز؟» - دەپ سۇرادىم. ال «ديپلوممەن اۋىلعا» باعدارلاماسىن ءبىز سىزدەن ارتىق بىلەمىز. قانشا قاراجات ءبولىنىپ، قالاي ىسكە اسىپ جاتقانىن. قانشا بالىقشى باردى، سونىمەن؟ سىزدە ەسەبى بار ما؟»-دەپ سۇراقتىڭ توتەسىنە كوشتى، - دەپ جازدى دەپۋتات.
سونىمەن قاتار، پارلامەنتتەگى ورەسكەل قاتەلىكتى ايىپتاپ، باسسىزدىقتى دوعارۋ قاجەت ەكەندىگىن تالاپ ەتتى.
- زاڭ شىعارۋشى ورگان - قازاقستان پارلامەنتىندە قازاق ەلىنىڭ مەملەكەتتىك ءتىلى عانا ءجۇرۋى كەرەك! رەسەي دۋماسىنىڭ ءتىلى ەمەس! ول ءۇشىن پارلامەنتتەگى “مەيلى، ورىسشا ايتا بەرسىن”، بارىمىزگە تۇسىنىكتى تىلدە سويلەي بەرسىن”-دەگەن جالپاقشەشەيلىكتى دوعارۋ كەرەك! بۇل بىرىنشىدەن، مەملەكەتتىك ءتىلىمىزدى “جۇرت تۇسىنبەيتىن ءتىل” دەڭگەيىنە ءتۇسىرىپ، قورلاۋ، ەكىنشىدەن، ونداي قاجەتتىلىك بولماسا، وزگە تىلدىلەر بۇدان 100 جىلدان كەيىن دە مەملەكەتتىك ءتىلدى ۇيرەنبەيدى!..ارتىندا ميلليوندار تۇرعان، مەملەكەتتىك ءتىل تۋرالى زاڭدى تالاپ ەتكەن اشىق حاتقا ەستيتىن مەملەكەتىمىز ادىلەتتى قازاقستاندا ادىلەتتى قارايدى دەپ سەنەمىز، - دەدى ءسوز سوڭىندا قازىبەك يسا.
"ادىرنا" ۇلتتىق پورتالى
