پرەزيدەنت قاسىم-جومارت توقاەۆ پارلامەنت پالاتالارىنىڭ بىرلەسكەن وتىرىسىندا ءماجىلىس پەن سەناتتىڭ 30 جىلداعى قىزمەتىنە جوعارى باعا بەردى، دەپ حابارلايدى "ادىرنا" ءتىلشىسى.
اقوردا دەرەگىنشە، مەملەكەت باسشىسى قوس پالاتالى پارلامەنتتىڭ تاۋەلسىز قازاقستاننىڭ قالىپتاسۋى مەن دامۋىنا ەلەۋلى ۇلەس قوسقانىن اتاپ ءوتتى. ونىڭ ايتۋىنشا، زاڭ شىعارۋشى ورگان وسى ۋاقىت ىشىندە ەلدىڭ قۇقىقتىق جۇيەسىن جەتىلدىرۋگە، مەملەكەتتىلىكتى نىعايتۋعا جانە نارىقتىق ەكونوميكانى دامىتۋعا باعىتتالعان 3,5 مىڭعا جۋىق زاڭ قابىلداعان.
«30 جىل ىشىندە اسا قاجەت 3,5 مىڭعا جۋىق زاڭ قابىلداندى. ونىڭ ءاربىر ونىنشىسىنىڭ باستاماشىسى – دەپۋتاتتار. زاڭ شىعارۋ جۇيەسىنىڭ قالىپتاسۋىنا حالقىمىزعا جانە حالىقارالىق قاۋىمداستىققا كەڭىنەن تانىمال ساياساتكەرلەر، كورنەكتى مەملەكەت جانە قوعام قايراتكەرلەرى اتسالىستى»، – دەدى پرەزيدەنت.
پرەزيدەنت قاسىم-جومارت توقاەۆ ولاردىڭ ەڭبەگى پارلامەنت تاريحىندا ەرەكشە ءىز قالدىرىپ، حالىق جادىندا ساقتالاتىنىن ايتتى.
پرەزيدەنتتىڭ سوزىنشە، بۇل بىرلەسكەن وتىرىس تاۋەلسىز قازاقستان تاريحىنداعى تۇتاس ءبىر كەزەڭنىڭ اياقتالعانىن بىلدىرەدى. ول پارلامەنتتىڭ زامان تالابىنا بەيىمدەلىپ، قوعام سۇرانىسىنا جەدەل جاۋاپ بەرەتىن سىندارلى ينستيتۋت رەتىندە قالىپتاسقانىن اتاپ ءوتتى.
سونىمەن قاتار، مەملەكەت باسشىسى جوعارى پارلامەنتتىك مادەنيەتتى قازاقستاننىڭ دامۋىنىڭ ماڭىزدى كورسەتكىشتەرىنىڭ ءبىرى رەتىندە باعالادى.
