جولداۋداعى الەۋمەتتىك باسىمدىقتار ەل دامۋىنا جاڭا مۇمكىندىكتەر اشادى

155
Adyrna.kz Telegram
https://www.adyrna.kz/storage/uploads/Nt7jqfPGcVsRDjjjmrufreT5VXVYP6xw4Z8aqEig.jpg

پرەزيدەنت قاسىم-جومارت توقاەۆتىڭ بيىلعى جولداۋى قازاقستاننىڭ الەۋمەتتىك-ەكونوميكالىق دامۋىنىڭ باسىم باعىتتارىن ايقىنداپ، حالىقتىڭ ءومىر ساپاسىن ارتتىرۋعا باعىتتالعان ماڭىزدى مىندەتتەردى بەلگىلەدى.

الەۋمەتتىك ينفراقۇرىلىمدى جاڭعىرتۋ، ادام كاپيتالىن دامىتۋ، شاعىن جانە ورتا بيزنەستى قولداۋ، جاڭا جۇمىس ورىندارىن اشۋ جانە 2027 جىلدى «جالپىحالىقتىق اۋقىمدى قۇرىلىس جىلى» دەپ جاريالاۋ باستاماسى ەل دامۋىنىڭ جاڭا مۇمكىندىكتەرىنە جول اشادى.

بۇل باستامالاردىڭ ماڭىزى تەك ەكونوميكالىق وسىممەن شەكتەلمەيدى. جاڭا مەكتەپتەر مەن مەديتسينالىق مەكەمەلەر سالۋ، الەۋمەتتىك قىزمەتتەردىڭ قولجەتىمدىلىگىن ارتتىرۋ جانە وڭىرلەردىڭ ينفراقۇرىلىمىن دامىتۋ ازاماتتاردىڭ ءال-اۋقاتىن جاقسارتۋعا، الەۋمەتتىك مۇمكىندىكتەردى كەڭەيتۋگە جانە قوعامنىڭ تۇراقتى دامۋىنا ىقپال ەتەدى.

وسى ورايدا الەۋمەتتانۋشى مەدەت كۋدابەكوۆ پرەزيدەنت جولداۋىندا بەلگىلەنگەن الەۋمەتتىك ساياساتتىڭ باسىمدىقتارى، ادام كاپيتالىن نىعايتۋدىڭ ماڭىزى، شاعىن جانە ورتا بيزنەستى دامىتۋدىڭ مۇمكىندىكتەرى مەن «حالىقتىق قۇرىلىس» باستاماسىنىڭ قوعامعا ىقپالى تۋرالى پىكىر ءبىلدىردى.

— پرەزيدەنت قاسىم-جومارت توقاەۆ جولداۋىندا الەۋمەتتىك ينفراقۇرىلىمدى دامىتۋعا، جاڭا مەكتەپتەر، اۋرۋحانالار مەن پەريناتالدى ورتالىقتار سالۋعا ەرەكشە باسىمدىق بەردى. مەملەكەت باسشىسىنىڭ بۇل باستامالارى حالىقتىڭ تۇرمىس ساپاسىن ارتتىرۋعا جانە وڭىرلەردىڭ تەڭگەرىمدى دامۋىنا قانداي مۇمكىندىكتەر اشادى؟

— پرەزيدەنت قاسىم-جومارت توقاەۆتىڭ جولداۋىندا كوتەرىلگەن الەۋمەتتىك ينفراقۇرىلىمدى دامىتۋ، الەۋمەتتىك ساياساتتى جاڭعىرتۋ، ادام كاپيتالىن نىعايتۋ، شاعىن جانە ورتا بيزنەستى قولداۋ جانە 2027 جىلدى «جالپىحالىقتىق اۋقىمدى قۇرىلىس جىلى» دەپ جاريالاۋ جونىندەگى باستامالار قازاقستاننىڭ الەۋمەتتىك-ەكونوميكالىق دامۋىنىڭ ءوزارا بايلانىستى باعىتتارى. مەنىڭ ويىمشا، بۇل باستامالاردىڭ باستى ەرەكشەلىگى – ەكونوميكالىق ءوسىمدى حالىقتىڭ كۇندەلىكتى ومىرىندەگى ناقتى وزگەرىستەرمەن بايلانىستىرۋىندا. ويتكەنى مەملەكەتتىڭ دامۋ دەڭگەيى تەك ماكروەكونوميكالىق كورسەتكىشتەرمەن ەمەس، ازاماتتاردىڭ ساپالى ءبىلىم الۋ، مەديتسينالىق كومەككە قول جەتكىزۋ، لايىقتى جۇمىس تابۋ جانە قولايلى الەۋمەتتىك ورتادا ءومىر ءسۇرۋ مۇمكىندىكتەرىمەن ولشەنەدى.

پرەزيدەنتتىڭ جاڭا مەكتەپتەر، اۋرۋحانالار، پەريناتالدى ورتالىقتار جانە باسقا دا الەۋمەتتىك نىساندار سالۋعا باسىمدىق بەرۋى حالىقتىڭ ءومىر ءسۇرۋ ساپاسىن ارتتىرۋعا باعىتتالعان ماڭىزدى قادام دەپ سانايمىن.

الەۋمەتتىك ينفراقۇرىلىم – قوعامنىڭ تۇراقتى دامۋىنىڭ نەگىزگى شارتتارىنىڭ ءبىرى. ونىڭ قولجەتىمدىلىگى ازاماتتاردىڭ الەۋمەتتىك مۇمكىندىكتەرىنە، ەڭبەككە ارالاسۋىنا جانە بولاشاققا دەگەن سەنىمىنە تىكەلەي اسەر ەتەدى. اسىرەسە اۋىلدىق جەرلەر مەن شاعىن قالالاردا الەۋمەتتىك نىسانداردىڭ جەتكىلىكسىزدىگى قالا مەن اۋىل اراسىنداعى ءومىر ساپاسىنىڭ ايىرماشىلىعىن تەرەڭدەتۋى مۇمكىن. سوندىقتان جاڭا الەۋمەتتىك نىساندار سالۋ وڭىرلەر اراسىنداعى تەڭسىزدىكتى ازايتىپ، حالىقتىڭ تۇرعىلىقتى جەرىنە قاراماستان ساپالى ءبىلىم مەن مەديتسينالىق قىزمەت الۋىنا مۇمكىندىك بەرەدى. الايدا بۇل جەردە ءبىر ماڭىزدى ماسەلەنى اتاپ وتكىم كەلەدى. الەۋمەتتىك ينفراقۇرىلىمدى دامىتۋ تەك عيماراتتار سالۋمەن شەكتەلمەۋى كەرەك. جاڭا مەكتەپتەر مەن اۋرۋحانالار ءتيىستى ماماندارمەن قامتاماسىز ەتىلىپ، الەۋمەتتىك قىزمەت كورسەتۋ مەكەمەلەرىندە كاسىبي كادرلار جۇمىس ىستەۋى قاجەت. بۇل ماسەلە مەنىڭ «الەۋمەتتىك قىزمەت كورسەتۋ جۇيەسىن جاڭعىرتۋ جاعدايىنداعى الەۋمەتتىك جۇمىس كادرلارىمەن قامتاماسىز ەتۋدى الەۋمەتتانۋلىق تالداۋ» تاقىرىبىنداعى ديسسەرتاتسيالىق زەرتتەۋىممەن تىكەلەي بايلانىستى. زەرتتەۋ بارىسىندا الەۋمەتتىك سالاداعى كادر تاپشىلىعى، مامانداردىڭ تۇراقتاماۋى، ەڭبەكاقى دەڭگەيىنىڭ تومەندىگى جانە كاسىبي بىلىكتىلىكتى ارتتىرۋ مۇمكىندىكتەرىنىڭ شەكتەۋلىلىگى سياقتى جۇيەلى ماسەلەلەر انىقتالدى. سوندىقتان الەۋمەتتىك ينفراقۇرىلىمدى دامىتۋ مەن ونى كاسىبي كادرلارمەن قامتاماسىز ەتۋ ءبىرتۇتاس مەملەكەتتىك ساياسات رەتىندە قاراستىرىلۋى ءتيىس.

— مەملەكەت باسشىسى الەۋمەتتىك ساياساتتىڭ باستى ماقساتى ازاماتتاردى تولەمدەرگە تاۋەلدى ەتۋ ەمەس، ولاردىڭ ءال-اۋقاتى مەن ءومىر ساپاسىن ارتتىرۋ ەكەنىن اتاپ ءوتتى. پرەزيدەنت ۇسىنعان بۇل ءتاسىل قوعامنىڭ الەۋمەتتىك جاۋاپكەرشىلىگىن قالىپتاستىرۋعا جانە الەۋمەتتىك مەملەكەتتىڭ جاڭا مودەلىن دامىتۋعا قالاي ىقپال ەتەدى؟

— مەملەكەت باسشىسىنىڭ الەۋمەتتىك ساياساتتىڭ ماقساتى ازاماتتاردى تولەمدەرگە تاۋەلدى ەتۋ ەمەس، ولاردىڭ ءال-اۋقاتى مەن ءومىر ساپاسىن ارتتىرۋ بولۋى كەرەك دەگەن ۇستانىمىن قولدايمىن. سونىمەن بىرگە الەۋمەتتىك تولەمدەردى تەك الەۋمەتتىك تاۋەلدىلىكتى قالىپتاستىراتىن قۇرال رەتىندە قاراستىرۋ دۇرىس ەمەس. الەۋمەتتىك تولەمدەر دە ينفراقۇرىلىمدى دامىتۋ، جاڭا جۇمىس ورىندارىن اشۋ جانە حالىقتىڭ ءومىر ءسۇرۋ ساپاسىن ارتتىرۋ سياقتى الەۋمەتتىك ساياساتتىڭ ماڭىزدى تەتىكتەرىنىڭ ءبىرى.

ەڭ باستىسى – الەۋمەتتىك تولەمدەر بەلسەندى الەۋمەتتىك شارالارمەن قاتار جۇزەگە اسىرىلۋى كەرەك. مىسالى، جاردەماقىلار ازاماتتارعا بەلگىلى ءبىر ۋاقىت ارالىعىندا قارجىلىق تۇراقتىلىقتى ساقتاۋعا، قايتا دايارلاۋ كۋرستارىنان وتۋگە، جاڭا ماماندىق يگەرۋگە جانە ەڭبەك نارىعىنداعى وزگەرىستەرگە سايكەس كاسىبي باعىتىن وزگەرتۋگە مۇمكىندىك بەرەدى. ياعني، الەۋمەتتىك قولداۋ ادامنىڭ ەڭبەك نارىعىنا قايتا ورالۋىنا جاعداي جاساۋى ءتيىس. سونىمەن قاتار الەۋمەتتىك تولەم الاتىن ازاماتتاردىڭ بارلىعى بىردەي ەڭبەك ەتۋدەن باس تارتقان ادامدار ەمەس ەكەنىن ەسكەرۋ قاجەت. وسى تۇرعىدان العاندا، الەۋمەتتىك ينفراقۇرىلىمدى دامىتۋ الەۋمەتتىك تولەمدەرگە دەگەن قاجەتتىلىكتى تومەندەتۋدىڭ ماڭىزدى شارتتارىنىڭ ءبىرى بولىپ تابىلادى. ەگەر ازاماتتىڭ بالاسىن ورنالاستىراتىن بالاباقشاسى نەمەسە جاقىندارىنا كۇتىم كورسەتەتىن الەۋمەتتىك قىزمەت ورتالىعى بولسا، ول ەڭبەك نارىعىنا بەلسەندى ارالاسىپ، تۇراقتى تابىس تابۋعا مۇمكىندىك الادى. دەمەك، الەۋمەتتىك مەملەكەتتىڭ جاڭا مودەلىندە الەۋمەتتىك تولەمدەر مەن بەلسەندى الەۋمەتتىك ساياسات ءبىرىن-ءبىرى تولىقتىرۋى قاجەت. مەملەكەتتىڭ مىندەتى – ازاماتتاردى الەۋمەتتىك كومەكتەن ايىرۋ ەمەس، ولاردىڭ الەۋمەتتىك تولەمدەرگە مۇقتاجدىعىن ازايتاتىن جاعداي قالىپتاستىرۋ.

— جولداۋدا ادام كاپيتالىن دامىتۋ، بالالاردىڭ ساپالى ءبىلىم مەن مەديتسينالىق كومەك الۋىنا جاعداي جاساۋ ماسەلەلەرىنە ايرىقشا ءمان بەرىلدى. پرەزيدەنتتىڭ وسكەلەڭ ۇرپاقتىڭ بولاشاعىنا باعىتتالعان بۇل ساياساتى قازاقستاننىڭ الەۋمەتتىك الەۋەتىن نىعايتۋدا قانداي ءرول اتقارادى؟

— پرەزيدەنت جولداۋىندا بالالاردىڭ ساپالى ءبىلىم الۋىنا، مەديتسينالىق كومەككە قول جەتكىزۋىنە جانە ولاردىڭ جان-جاقتى دامۋىنا ەرەكشە ءمان بەرىلۋى وتە ورىندى. سەبەبى ادام كاپيتالى – مەملەكەتتىڭ ەڭ ماڭىزدى ستراتەگيالىق رەسۋرسى. بۇگىنگى بالالاردىڭ ءبىلىم دەڭگەيى، دەنساۋلىعى جانە الەۋمەتتىك مۇمكىندىكتەرى ەرتەڭگى قوعامنىڭ ەكونوميكالىق جانە ينتەللەكتۋالدىق الەۋەتىن ايقىندايدى. سوندىقتان ءبىلىم بەرۋ مەن دەنساۋلىق ساقتاۋ سالاسىنا سالىنعان ينۆەستيتسيانى تەك الەۋمەتتىك شىعىن رەتىندە ەمەس، ەلدىڭ بولاشاعىنا باعىتتالعان ۇزاق مەرزىمدى ينۆەستيتسيا رەتىندە قاراستىرۋىمىز كەرەك. بۇل جەردە بالالاردىڭ تەك ءبىلىم الۋىنا نەمەسە مەديتسينالىق كومەكپەن قامتاماسىز ەتىلۋىنە عانا ەمەس، ولاردىڭ قاۋىپسىز ءارى قولايلى الەۋمەتتىك ورتادا وسۋىنە دە نازار اۋدارۋ قاجەت. مىسالى، مەكتەپتەن تىس ءبىلىم بەرۋ، سپورت، مادەنيەت، شىعارماشىلىق جانە بوس ۋاقىتتى ءتيىمدى ۇيىمداستىرۋ ورتالىقتارىنىڭ قولجەتىمدىلىگى جاس ۇرپاقتىڭ الەۋمەتتەنۋىنە، قابىلەتتەرىن دامىتۋىنا جانە قوعامعا بەيىمدەلۋىنە ىقپال ەتەدى. اسىرەسە الەۋمەتتىك جاعدايى تومەن وتباسىلاردان شىققان بالالار ءۇشىن مۇنداي مۇمكىندىكتەردىڭ ماڭىزى زور. ويتكەنى الەۋمەتتىك ينفراقۇرىلىمنىڭ قولجەتىمدىلىگى باستاپقى مۇمكىندىكتەردەگى تەڭسىزدىكتى ازايتىپ، بالالاردىڭ ءوز الەۋەتىن تولىق جۇزەگە اسىرۋىنا جاعداي جاسايدى.

مەنىڭ ويىمشا، ادام كاپيتالىن دامىتۋ ساياساتى ءبىلىم بەرۋ، دەنساۋلىق ساقتاۋ، الەۋمەتتىك قورعاۋ جانە جاستار ساياساتى باعىتتارىن ءوزارا بايلانىستىرا وتىرىپ جۇزەگە اسىرىلۋى ءتيىس. بۇل قازاقستاننىڭ بولاشاقتاعى باسەكەگە قابىلەتتىلىگىن ارتتىرىپ قانا قويماي، الەۋمەتتىك تۇراقتىلىقتىڭ دا بەرىك نەگىزىن قالىپتاستىرادى.

— پرەزيدەنت شاعىن جانە ورتا بيزنەستى دامىتۋ، جاڭا جۇمىس ورىندارىن اشۋ جانە ەڭبەك ونىمدىلىگىن ارتتىرۋ مىندەتتەرىن بەلگىلەدى. بۇل باستامالار حالىقتىڭ ەكونوميكالىق بەلسەندىلىگىن ارتتىرىپ، ازاماتتاردىڭ ءوز مۇمكىندىكتەرىن جۇزەگە اسىرۋىنا جانە قوعامداعى ورتا تاپتىڭ قالىپتاسۋىنا قالاي اسەر ەتەدى؟

— پرەزيدەنتتىڭ شاعىن جانە ورتا بيزنەستى دامىتۋ، جاڭا جۇمىس ورىندارىن اشۋ جانە ەڭبەك ونىمدىلىگىن ارتتىرۋ جونىندەگى مىندەتتەرى دە الەۋمەتتىك ساياساتپەن تىكەلەي بايلانىستى. مەنىڭ ويىمشا، ەگەر ەكونوميكالىق جانە الەۋمەتتىك ينفراقۇرىلىم كەشەندى تۇردە داميتىن بولسا، «حالىقتىق قۇرىلىس» باستاماسى شاعىن جانە ورتا بيزنەستىڭ دامۋىنا ەلەۋلى سەرپىن بەرە الادى.

بىرىنشىدەن، اۋقىمدى قۇرىلىس جۇمىستارى جاڭا ەكونوميكالىق مۇمكىندىكتەر قالىپتاستىرادى. قۇرىلىس ماتەريالدارىن ءوندىرۋ، تاسىمالداۋ، قوعامدىق تاماقتانۋ، ساۋدا جانە قىزمەت كورسەتۋ سالالارىندا شاعىن جانە ورتا بيزنەس سۋبەكتىلەرىنە سۇرانىس ارتادى. بۇل جاڭا كاسىپكەرلىك باستامالاردىڭ پايدا بولۋىنا جانە قوسىمشا جۇمىس ورىندارىنىڭ اشىلۋىنا ىقپال ەتەدى.

ەكىنشىدەن، تاجىريبە كورسەتكەندەي، حالىقتىڭ ءومىر ءسۇرۋ ساپاسى ارتقان سايىن تاۋارلار مەن قىزمەتتەرگە دەگەن سۇرانىس تا وزگەرەدى. حالىقتىڭ تۇرمىستىق جاعدايى جاقسارعان كەزدە دەمالىس، مادەنيەت، سپورت، ساۋدا، قوعامدىق تاماقتانۋ جانە تۇرمىستىق قىزمەت كورسەتۋ سالالارىنداعى سۇرانىس كوبەيەدى.

مىسالى، جاڭا تۇرعىن اۋدانداردا مەكتەپتەر، بالاباقشالار، سپورت كەشەندەرى، مادەني ورتالىقتار مەن قوعامدىق كەڭىستىكتەردىڭ پايدا بولۋى وسى نىسانداردىڭ اينالاسىندا جاڭا كاسىپكەرلىك قىزمەت تۇرلەرىنىڭ دامۋىنا مۇمكىندىك بەرەدى.

ۇشىنشىدەن، بۇل ۇدەرىس وڭىرلەردىڭ ەكونوميكالىق بەلسەندىلىگىن ارتتىرىپ، جەرگىلىكتى كاسىپكەرلەردىڭ قالىپتاسۋىنا جاعداي جاسايدى. اسىرەسە شاعىن قالالار مەن اۋىلدىق جەرلەردە الەۋمەتتىك جانە ينجەنەرلىك ينفراقۇرىلىمنىڭ دامۋى كاسىپكەرلىك قىزمەتتى كەڭەيتۋگە، حالىقتى جۇمىسپەن قامتۋعا جانە جەرگىلىكتى ەكونوميكانىڭ الەۋەتىن نىعايتۋعا مۇمكىندىك بەرەدى.

تورتىنشىدەن، الەۋمەتتىك ينفراقۇرىلىمنىڭ دامۋى ازاماتتاردىڭ ەكونوميكالىق بەلسەندىلىگىنە تىكەلەي اسەر ەتەدى. بالاباقشالار مەن الەۋمەتتىك قىزمەت كورسەتۋ ورتالىقتارىنىڭ جەتكىلىكتى بولۋى وتباسى مۇشەلەرىنىڭ، اسىرەسە كۇتىم مىندەتتەرىن اتقاراتىن ادامداردىڭ ەڭبەك نارىعىنا ارالاسۋىنا جاعداي جاسايدى.

وسىلايشا، شاعىن جانە ورتا بيزنەستىڭ دامۋى تەك كاسىپكەرلەر سانىنىڭ ارتۋىن عانا ەمەس، ازاماتتاردىڭ تۇراقتى تابىس تابۋىن، ەكونوميكالىق دەربەستىگىن جانە قوعامداعى ورتا تاپتىڭ قالىپتاسۋىن بىلدىرەدى.

مەنىڭشە، ورتا تاپتىڭ قالىپتاسۋى ءۇشىن ادامدارعا جۇمىس ورىندارىن ۇسىنۋمەن قاتار، ءوز كاسىبىن اشۋعا، قىزمەت كورسەتۋ سالاسىندا جۇمىس ىستەۋگە جانە ەكونوميكالىق باستامالارىن جۇزەگە اسىرۋعا مۇمكىندىك بەرەتىن قولايلى ورتا قالىپتاستىرۋ قاجەت.

— پرەزيدەنت قاسىم-جومارت توقاەۆ 2027 جىلدى «جالپىحالىقتىق اۋقىمدى قۇرىلىس جىلى» دەپ جاريالاۋدى ۇسىنىپ، «حالىقتىق قۇرىلىس» باستاماسىن كوتەردى. بۇل شەشىمنىڭ قوعام ءۇشىن الەۋمەتتىك ماڭىزى قانداي؟ اۋقىمدى قۇرىلىس جۇمىستارى حالىقتىڭ ءومىر ساپاسىن جاقسارتىپ، وڭىرلەردىڭ دامۋىنا جانە ازاماتتاردىڭ بولاشاققا دەگەن سەنىمىن نىعايتۋعا قالاي ىقپال ەتەدى؟

— پرەزيدەنت قاسىم-جومارت توقاەۆتىڭ 2027 جىلدى «جالپىحالىقتىق اۋقىمدى قۇرىلىس جىلى» دەپ جاريالاۋ تۋرالى ۇسىنىسى مەن «حالىقتىق قۇرىلىس» باستاماسىن قوعامنىڭ الەۋمەتتىك-ەكونوميكالىق دامۋىنا باعىتتالعان ماڭىزدى قادام رەتىندە باعالايمىن. بۇل باستامانىڭ ءمانى تەك جاڭا عيماراتتار مەن ينفراقۇرىلىمدىق نىساندار سالۋمەن شەكتەلمەيدى. ونىڭ نەگىزگى ناتيجەسى حالىقتىڭ ءومىر ساپاسىن جاقسارتۋ، وڭىرلەردىڭ دامۋ مۇمكىندىكتەرىن كەڭەيتۋ جانە ازاماتتاردىڭ بولاشاققا دەگەن سەنىمىن نىعايتۋ بولۋى ءتيىس. مەنىڭ ديسسەرتاتسيالىق زەرتتەۋىمنىڭ ناتيجەلەرى وسى ماسەلەمەن تىكەلەي بايلانىستى. زەرتتەۋ بارىسىندا الەۋمەتتىك ينفراقۇرىلىمنىڭ تيىمدىلىگى تەك ماتەريالدىق-تەحنيكالىق جاعدايعا ەمەس، سونىمەن قاتار كاسىبي كادرلاردىڭ الەۋەتىنە، الەۋمەتتىك قىزمەتتەردىڭ قولجەتىمدىلىگىنە جانە ەڭبەك جاعدايلارىنا تاۋەلدى ەكەنى انىقتالدى.

اتاپ ايتقاندا، ساراپشىلارمەن جۇرگىزىلگەن سۇحباتتاردا الەۋمەتتىك سالاداعى كادر تاپشىلىعى، مامانداردىڭ تۇراقتاماۋى، كاسىبي بىلىكتىلىكتى ارتتىرۋ مۇمكىندىكتەرىنىڭ شەكتەۋلىلىگى جانە وڭىرلەردەگى كولىك قاتىناسىنىڭ قولايسىزدىعى سياقتى ماسەلەلەر كوتەرىلدى. بۇل الەۋمەتتىك نىسانداردىڭ بولۋى عانا جەتكىلىكسىز ەكەنىن، ولاردىڭ تۇراقتى ءارى ساپالى قىزمەت كورسەتۋى ءۇشىن ءتيىستى جاعداي قالىپتاستىرۋ قاجەتتىگىن كورسەتەدى. وسىعان بايلانىستى «حالىقتىق قۇرىلىس» باستاماسىن جۇزەگە اسىرۋدا ءۇش باعىتقا ەرەكشە نازار اۋدارۋ قاجەت.

ءبىرىنشى – الەۋمەتتىك ينفراقۇرىلىم مەن كادرلىق قامتاماسىز ەتۋدى قاتار دامىتۋ. جاڭا مەكتەپتەر، مەديتسينالىق جانە الەۋمەتتىك مەكەمەلەر سالىنعاندا، ولاردى بىلىكتى پەداگوگتەرمەن، مەديتسينا قىزمەتكەرلەرىمەن، الەۋمەتتىك قىزمەتكەرلەرمەن جانە باسقا دا ماماندارمەن قامتاماسىز ەتۋ الدىن الا جوسپارلانۋى ءتيىس.

ەكىنشى – وڭىرلەردەگى الەۋمەتتىك تەڭسىزدىكتى تومەندەتۋ. الەۋمەتتىك ينفراقۇرىلىمنىڭ اۋماقتىق تۇرعىدان تەڭگەرىمدى دامۋى قالا مەن اۋىل اراسىنداعى ءبىلىم بەرۋ، مەديتسينالىق كومەك جانە الەۋمەتتىك قىزمەتتەرگە قولجەتىمدىلىك ايىرماشىلىعىن ازايتادى. بۇل اسىرەسە قارت ادامدار، مۇگەدەكتىگى بار ازاماتتار، از قامتىلعان وتباسىلار جانە ومىرلىك قيىن جاعدايعا تاپ بولعان ادامدار ءۇشىن ماڭىزدى.

ءۇشىنشى – ادام كاپيتالىن دامىتۋ جانە كاسىبي كادرلاردى تۇراقتاندىرۋ. قۇرىلىس سالاسىندا جاڭا جۇمىس ورىندارىنىڭ اشىلۋىمەن قاتار، الەۋمەتتىك سالادا دا كاسىبي ماماندارعا سۇرانىس ارتادى. سوندىقتان مامانداردى دايارلاۋ، قايتا دايارلاۋ، ولاردىڭ ەڭبەك جاعدايىن جاقسارتۋ جانە كاسىبي مارتەبەسىن كوتەرۋ مەملەكەتتىك ساياساتتىڭ ماڭىزدى بولىگى بولۋى كەرەك.

وسى ءۇش باعىتتىڭ ءوزارا بايلانىسى «حالىقتىق قۇرىلىس» باستاماسىنىڭ ۇزاق مەرزىمدى الەۋمەتتىك ناتيجەلەرىن قامتاماسىز ەتۋگە مۇمكىندىك بەرەدى.

پىكىرلەر