پوليتسيا استاناداعى ميتينگكە تۇسىنىكتەمە بەردى

26 قاراشا كەشكى ۋاقىتتا استاناداعى تۇنگى كلۋبتاردىڭ بىرىندە جاستارعا ارنالعان مادەني-بۇقارالىق ءىس-شارا ۇيىمداستىرىلدى. ۇيىمداستىرۋشى كاسىپكەر شاراعا 300-گە جۋىق جاستاردى جيناعان. بۇل تۋرالى Polisia.kz حابارلادى، دەپ جازادى "ادىرنا" ۇلتتىق پورتالى.  جيىن بارىسىندا ۇيىمداستىرۋشى جينالعاندارعا كورىنەۋ جالعان اقپارات بەرىپ، بەيبىت جينالىستار وتكىزۋدىڭ زاڭدا بەلگىلەنگەن ءتارتىبىن بۇزا وتىرىپ، ولاردى ءوزىنىڭ جەكە قۇقىققا قايشى ماقساتىنا قول جەتكىزۋ ءۇشىن زاڭسىز شەرۋگە شاقىرعان. ارانداتۋ ناتيجەسىندە قوعامدىق ءتارتىپ ورەسكەل بۇزىلىپ، كولىك جانە الەۋمەتتىك ينفراقۇرىلىمنىڭ تولىققاندى جۇمىس ىستەۋىنە كەدەرگى جاسالعان. جيىنعا قاتىسۋشىلار پوليتسيانىڭ زاڭسىز ارەكەتتى توقتاتۋ تۋرالى تالابىن ەسكەرمەي، داۋىس زورايتقىشتى قولدانعان، ۇيىمداستىرۋشىنىڭ شاقىرۋىمەن ءتارتىپتى بۇزۋدى جالعاستىرا بەرگەن. قالا تۇرعىندارىنىڭ قاۋىپسىزدىگىن قامتاماسىز ەتۋ ماقساتىندا پوليتسيا زاڭسىز ارەكەتتەردىڭ جولىن كەسۋ شارالارىن قابىلداۋعا ءماجبۇر بولدى. بۇل رەتتە زاڭسىز شەرۋگە قاتىسۋشىلار قىزمەتكەرلەرگە باعىنباي، قارسىلىق كورسەتتى. قازىرگى ۋاقىتتا كىنالى ادامدار انىقتالىپ، پوليتسياعا جەتكىزىلدى. ولاردىڭ ءىس-ارەكەتتەرىنە بەلگىلەنگەن تارتىپپەن قۇقىقتىق باعا بەرىلەدى.