“حالىققا پورتفەلىن كومەكشىسىنە ارقالاتىپ، ەسىگىن بىرەۋگە اشقىزىپ، تالتاڭداپ جۇرەتىن دەپۋتاتتار قاجەت ەمەس. پرەزيدەنتىمىزدىڭ ايتقان ادىلەتتى قازاقستانى بولۋ ءۇشىن، “امانات” پارتياسىنا حالىق سەنسىن دەسە، تۇبەگەيلى وزگەرۋ كەرەك”. بۇل پىكىردى قر جۋرناليستەر وداعىنىڭ مۇشەسى، “قارا شاڭىراق” ۇلتتىق تاربيە ورتالىعىنىڭ جەتەكشىسى، ەتنولوگ-تاريحشى تۇرار ساتتارقىزى ءوزىنىڭ فەيسبۋك پاراقشاسىندا جازدى، دەپ حابارلايدى “ادىرنا” ۇلتتىق پورتالى.
“پرەزيدەنتتىڭ سايلاۋىنان كەيىن جاڭا قازاقستان، ادىلەتتى قازاقستان دەپ جاتىرمىز. جاڭا قازاقستانعا جاڭا تۇلعالار كەرەك دەيمىز. وزگەرە الادى ما، الدە “باياعى جارتاس، سول جارتاس” بولىپ قالا بەرە مە؟ استانا قالاسىنان سەناتقا سايلانعان اقىلبەك كۇرىشباەۆتىڭ سەناتتاعى ورنى بوساپ، ول ورىنعا 3 كىسى ءتۇسىپتى. بولاشاق سەناتوردى قالا دەپۋتاتتارى داۋىس بەرىپ، قولداۋى كەرەك. ايتپاقشى، ءتۇسىپ جاتقان ءبىر ۇمىتكەر 60-تان اسقان ادام. ءوزى قالالىق دەپۋتات ەكەن. بىراق سول كىسىنىڭ حالىق اراسىندا ءجۇرىپ، ءبىر شارۋا جاساپ جۇرگەنىن كورمەپپىن. ءماسليحات وتىرىستارىنان دا كورمەيمىز. الەۋمەتتىك جەلىدە ءۇنسىز. حالىققا جاقىن ەمەس ادام وتپەيدى دەپ سەنگىم كەلەدى. 60 -تال ءتۇس دەيتىن دانا حالقىمىز. سەنات، پارلامەنت زەينەتكە شىققانداردىڭ دەمالىپ وتىراتىن “جۇمساق كرەسلوسى” بولماسا ەكەن. ءتىپتى بىرەۋى سەناتور، بىرەۋى ءماجىلىس، بىرەۋى ءماسليحات دەپۋتاتتارى بولعان اعايىندىلار بولعان. وسىنداي “شىرماۋىقتاي شىرمالعان” تۋىستىق، رۋلىق، اعايىندىق توقتاماي، ءبىز كوگەرمەيمىز.ويتە بەرسەك، ادىلەتتى قازاقستاننىڭ اۋىلى الىس.”،- دەپ جازدى تۇرار شاكەن.
ونىڭ ايتۋىنشا، جاڭا قازاقستانعا مەملەكەتتىك ءتىلدى ەركىن مەڭگەرگەن، حالىققا جاقىن دەپۋتاتتار قاجەت.
“جاڭا قازاقستانعا ەنەرگياسى تۇگەسىلگەن، حالىققا بەرەرى جوق دەپۋتات ەمەس، كۇش-قايراتى بار، حالىققا جاقىن، حالىققا ءسوزىن وتكىزە الاتىن دەپۋتاتتار كەرەك. پارتياعا جاڭاشىل، يدەياشىل، باستاماشىل تۇلعالاردى تارتۋ كەرەك. بۇرىنعى ەسكى سۇرلەۋدى تاريحقا جىبەرىپ، ادىلەتتى سايلاۋ جاساۋ كەرەك! مىندەتتى تۇردە مەملەكەتتىك تىلدە سويلەيتىن، حاريزماسى مىقتى بولسا، قۇبا-قۇپ. ايتپەسە، جۇرەكتەن شىقپاعان، بىرەۋ جازىپ بەرگەن سوزدەرىن مىڭق-مىڭق ەتىپ، قاعازعا قاراپ وقيتىندار ەندى حالىققا وتپەيدى. ولارعا حالىق ەندى سەنبەيدى. حالىققا پورتفەلىن كومەكشىسىنە ارقالاتىپ، ەسىگىن بىرەۋگە اشقىزىپ، تالتاڭداپ جۇرەتىن دەپۋتاتتار قاجەت ەمەس. ولاردىڭ زامانى ءوتتى”،- دەيدى تاريحشى.
تۇرار ساتتارقىزىنىڭ ايتۋىنشا، بيلىك حالىقتىڭ سەنىمىنەن شىعامىن دەسە، الداعى سايلاۋلار ءادىل ءوتۋى ءتيىس.
“پرەزيدەنتىمىزدىڭ ايتقان ادىلەتتى قازاقستانى بولۋ ءۇشىن، “امانات” پارتياسىنا حالىق سەنسىن دەسە، تۇبەگەيلى وزگەرۋ كەرەك. ەگەر داۋىس بەرۋ تازا، ءادىل وتسە عانا، حالىق سەنىمىنەن شىعا الاسىزدار. ەل پرەزيدەنتىنىڭ حالىققا بەرگەن ۋادەسىن ورىنداي الاسىزدار. پرەزيدەنتكە دەگەن ادالدىقتارىڭىزدى كورسەتە الاسىزدار. ەكى جول جوق، جول بىرەۋ-اق! ول جولدىڭ اتى - حالىق سەنىمى! بۇرىنعى سەنگىش، كونبىس حالىق جوق، حالىق وياندى. جوعالعان حالىق سەنىمىن قايتارۋ، حالىقتىڭ ۇددەسىنەن شىعۋ ءۇشىن الداعى سايلاۋلار، تاعايىنداۋلار تازا بولسىن. بۇل حالىقتىڭ ويى. ال بيلىك حالىقپەن ساناسۋعا مىندەتتى”،- دەپ اياقتادى ءسوزىن “قارا شاڭىراق” ۇلتتىق تاربيە بەرۋ ورتالىعىنىڭ جەتەكشىسى.
