شىمكەنتتەگى “كورمە” ورتالىعىندا جەرگىلىكتى تاۋار وندىرۋشىلەردىڭ كورمەسى ۇيىمداستىرىلىپ، بيزنەس قاۋىمداستىق وكىلدەرىنىڭ كەزدەسۋى ءوتتى. قالالىق كاسىپكەرلەر پالاتاسىنىڭ باستاماسىمەن ۇيىمداستىرىلعان شاراعا شاھار باسشىسى م.ايتەنوۆ، «اتامەكەن» ۇكپ باسقارما توراعاسىنىڭ ورىنباسارى-شىمكەنت قالالىق كاسىپكەرلەر پالاتاسىنىڭ ديرەكتورى تيمۋر ناقىپبەكوۆ، قۇقىق قورعاۋ ورگان قىزمەتكەرلەرى، سالالىق قۇرىلىم باسشىلارى مەن كاسىپكەرلەر قاتىستى.
ءۇشىنشى مەگاپوليستىڭ ەكونوميكالىق جانە الەۋمەتتىك دامۋىنىڭ نەگىزگى درايۆەرى - كاسىپكەرلىك سالاسى. شىمكەنتتەگى جالپى وڭىرلىك ءونىمنىڭ ۇشتەن ءبىر بولىگىن شاعىن جانە ورتا بيزنەس وكىلدەرى وندىرەدى.
بۇگىندە قالادا 95 مىڭنان استام بەلسەندى كاسىپكەرلىك سۋبەكتىلەرى جۇمىس ىستەيدى.
“رەسپۋبليكا بويىنشا 4-ءشى ورىندامىز، 180 مىڭنان استام ادام جۇمىسپەن قامتىلعان. بۇل دا ارينە سىزدەردىڭ ارقالارىڭىزدا”،-دەدى م.ايتەنوۆ سالتاناتتى شارانى اشۋ بارىسىندا.
جالپى جيىندا بىرقاتار وتكىر دە وزەكتى ماسەلەلەر قوزعالدى.
قىلمىستىق پروتسەسس سالاسىنداعى قيىندىقتار، كاسىپكەرلەردىڭ قۇقىقتارىن قورعاۋ جانە اكىمشىلىك كەدەرگىلەردى ازايتۋ، قالا قۇرىلىسىندا كەزدەسەتىن پروبلەمالار، ارنايى ەكونوميكالىق جانە يندۋستريالىق ايماقتارداعى جەر ۋچاسكەلەرىن قوسالقى جالداۋ جولدارى مەن جانار-جاعارمايعا ديففەرەنتسياتسيالىق باعانىڭ بەكىتىلۋىنە بايلانىستى تۋىنداعان سالىقتىڭ ەسەپتىلىگى، ت.ب كوپتەگەن ماسەلەلەر كوتەرىلىپ، كەزدەسۋ بارىسىندا ونىڭ شەشىلۋ جولدارى ايتىلدى.
كەزدەسۋ قورىتىندىسىمەن، ۇلتتىق كاسىپكەرلەر پالاتاسى كاسىپكەرلىكتى قورعاۋدىڭ ەكوجۇيەسىن قۇرۋ جوباسىن جۇزەگە اسىرۋدى باستادى.
بيزنەستى قورعاۋدىڭ ەكوجۇيەسى اياسىندا كاسىپكەرلىك سۋبەكتىلەرىنىڭ قۇقىعىن بۇزۋ فاكتىلەرىن جانە مەملەكەتتىك رەتتەۋدى جۇزەگە اسىرۋ كەزىندە قاجەتسىز اكىمشىلىك كەدەرگىلەردى ازايتۋعا باعىتتالعان ءبىرشاما ۇسىنىستار ازىرلەنەتىن بولدى.
