تولەگەن بۇكىروۆتىڭ 70 جاسقا تولۋىنا وراي «قۇرىش تۇلعا» كىتابىنىڭ تۇساۋكەسەرى ءوتتى

2903
Adyrna.kz Telegram

29 قاراشا كۇنى جەزقازعاندا قازاقستاننىڭ قۇرمەتتى مەتاللۋرگى، تەحنيكا عىلىمدارىنىڭ كانديداتى، قاراعاندى وبلىسى جانە جەزقازعان قالاسىنىڭ قۇرمەتتى ازاماتى، «قازاقمىس» كورپوراتسياسى ارداگەرلەر كەڭەسىنىڭ جانە «قازاقتىڭ كەتبۇقاسى» قوعامدىق بىرلەستىگىنىڭ توراعاسى تولەگەن بۇكىروۆتىڭ 70 جاسقا تولۋىنا وراي جارىق كورگەن  «قۇرىش تۇلعا» كىتابىنىڭ تۇساۋكەسەرى ءوتتى، دەپ جازادى "ادىرنا" ۇلتتىق پورتالى. 

ءىس-شارا بارىسىندا جاس اقىن ءمادي ولجاباي تولەگەن بۇكىروۆكە ارناپ شىعارعان ءوز تۋىندىلارىن وقىپ، "اقىن ارناۋىن" پاش ەتتى. ودان ءارى قاراي تولەگەن نۇرماعانبەتۇلىنىڭ ءومىرى مەن ەڭبەك جولىن، ازاماتتىق ۇستانىمىنان  حابار بەرەتىن «جان سەرىگى – ادىلدىك پەن ادالدىق» اتتى بەينەبايان كورسەتىلدى. ءانشى عالىم مۇحانبەدين  «بالقاديشا» ءانىن ورىندادى.

تولەگەن بۇكىروۆتىڭ ەڭبەك جولىنداعى جەتىستىكتەرى مەن قوعامدىق جۇمىستاردا قول جەتكىزگەن تابىستارىن، ادامي بولمىس-ءبىتىمى مەن ازاماتتىق بەينەسىن ايشىقتايتىن سان الۋان جۇرەكجاردى جازبالار «قۇرىش تۇلعا» كىتابىنا جيناقتالعان. جۇرەكجاردى جازبالار 2022 جىلى «كاۋسار» باسپاسىنان جارىق كوردى.  «كاۋسار» باسپاسىنىڭ ديرەكتورى قۋات قۇرمانسەيىتوۆ ءوزىنىڭ قۇتتىقتاۋ ءسوزىن ارناپ، جىلى لەبىزىن ءبىلدىردى.

№10 ورتا مەكتەپتىڭ وقۋشىلارى دا تولەگەن بۇكىروۆتىڭ قۇرمەتىنە وزدەرىنىڭ قۇتتىقتاۋلارىن ايتىپ،

"بىزگە دە اڭىز – قۇرىش تۇلعا تۇعىرى،

ەرلىكپەنەن جازىلعان تەك عۇمىرى.

قادىرلى اعا، باسىلعان جوق ءالى دە

70 جاسقا تولعان تويدىڭ ءدۇبىرى.

 

80 جاسقا تالماي قادام باسىڭىز،

باقىت سىيلار بەل-بەلەستەن اسىڭىز.

جەڭىس پەنەن تابىس شىڭى سياقتى

قادىرلى اعا، ءسىزدىڭ 70 جاسىڭىز", - سىندى ولەڭ جولدارىن ارنادى.

 

تولەگەن نۇرماعانبەتۇلى  ەڭبەك جولىن سوۆەت ارمياسى قاتارىنداعى بورىشىن اتقارىپ كەلىسىمەن 1973 جىلى مىس زاۋىتىندا پەشتەر مەن گاز جۇرەتىن قۇبىرلاردى تازالاۋشى بولىپ باستاپ، بالقىتۋشى، اۋىسىم شەبەرى، بولىمشە باستىعى، تسەح باستىعى، ديرەكتوردىڭ ورىنباسارى، ودان كەيىن «جەزقازعانسيرەكمەت» كاسىپورنىنىڭ باس ديرەكتورى،«قازاقمىس» كورپوراتسياسىنىڭ ءبولىم باستىعى، باس مەتاللۋرگى، ءوندىرىس جونىندەگى ديرەكتور ورىنباسارى، جوبالاۋ توبىندا ينجەنەر-مەتاللۋرگ بولعان ءسىزدىڭ ەڭبەك جولىڭىز – مەتاللۋرگتەر ءۇشىن ءتالىمى مول ونەگە. وسى تۇستا، كەلەسى ءسوز كەزەگىن مىس بالقىتۋ زاۋىتىنىڭ مەتاللۋرگى دوسپانوۆ ءابدىراشيت الىپ، ءوزىنىڭ تولعانىسقا تولى ويلارىمەن ءبولىستى.

ازاماتىن ارداقتاي بىلگەن قالىڭ قاۋىمنىڭ، سونىڭ ىشىندە كەشەگى ەڭبەك مايدانىندا ەل اعاسىنان ءتالىم الىپ شىڭدالعان ىزەتتى ءىنى-ءىزباسارلار مەن شاكىرتتەردىڭ تولەگەن نۇرماعانبەتۇلىنا دەگەن قالتقىسىز قۇرمەتىنىڭ ايقىن ءبىر ايعاعى سانالاتىن «قۇرىش تۇلعا» كىتابىنىڭ تۇساۋ كەسۋ ءراسىمى ءوتىپ، كىتاپ لەنتاسىن قيۋ قۇرمەتى كەش يەسى بۇكىروۆ تولەگەن نۇرماعانبەتۇلى مەن زيالى قاۋىم وكىلدەرىنە بەرىلدى. 

"ادىرنا" ۇلتتىق پورتالى

پىكىرلەر