بىلتىرعى جىلى بۇكىل قازاقستاندى ەمەس، سپورت الەمىن قارا جامىلدىرعان دەنيس تەننىڭ ءىسى بويىنشا سوت وتىرىسى جالعاسۋدا.
باستى سوت وتىرىسى الماتى قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ءوتىپ جاتىر. دەنيستىڭ اناسى وكسانا تەن مۇنىڭ جاي كولىك ايناسىن ۇرلاۋ ەكەنىنە سەنبەيتىنىن ايتتى.
ء"بىرىنشى سەكۋندتان-اق مۇنىڭ جاي كولىك ايناسىن ۇرلاۋ ەكەنىنە سەنبەدىم. ولاي ويلاۋىما تەك انا جۇرەگى ەمەس، ىشكى تۇيسىك تە سەبەپ بولعان جوق... ىسپەن تانىستىم. تەرگەۋ مۇقيات جۇرگىزىلدى، قىلمىسكەرلەر تەز ارادا تابىلدى. وسىعان اتسالىسقاندارعا راقمەت ايتامىن. دەنيس ءۇشىن ماتەريالدىق قۇندىلىقتار ارتىق ەمەس. بۇل نۇسقامەن ەش كەلىسپەيتىن سەبەبىم مەن دەنيستىڭ قالاي ارەكەت ەتەتىنىن بىلەمىن", - دەيدى اناسى.
"مەنىڭ ويىمشا، بۇل تاپسىرىسپەن جاسالىپ وتىر. وعان كوپتەگەن دەرەك دالەل. دەنيستىڭ ول كۇنى جۇمىسى كوپ بولدى، 19 شىلدەدە دە قولى بوس بولعان جوق. بىزدە بارلىعى جازىلىپ تۇرادى. 23 شىلدەدە استاناعا ۇلكەن ءىس-شاراعا ۇشىپ كەتۋى ءتيىس بولاتىن", - دەدى وكسانا تەن.
ايىپتالۋشى جانار تولىباەۆانىڭ قورعاۋشىسى بۇل ايىپپەن كەلىسپەيدى. سوت ماجىلىسىنەن كەيىن جۋرناليستەرگە تۇسىنىكتەمە بەرگەن ادۆوكات امانگەلدى ساريەۆ «بۇل قىلمىسقا ەشكىمنىڭ، ءۇشىنشى، ءتورتىنشى ادامداردىڭ قاتىسى بارىنا دالەل جوق. مۇندا ادامدى ءولتىرۋ قۇرامى جوق. كوردىڭىزدەر عوي، تەلەفوندارى، اقشاسى، ايفونى، كولىكتىڭ ايناسى ءبارى قالعان. قاراقشىلىق جاساعىسى كەلسە، سۋمكانى بوساتىپ الىپ كەتپەي مە»، - دەپ جاۋاپ بەردى.
ايتا كەتەيىك، وسى ءىس بويىنشا سوت الدىنا ارمان قۇدايبەرگەنوۆ، نۇرالى قياسوۆ پەن جانار تولىباەۆا كەلدى.
ارمان قۇدايبەرگەنوۆ قر قىلمىستىق كودەكسىنىڭ 188-بابىنىڭ 2-بولىگى 2-تارماعى ("ۇرلىق") بويىنشا، 192-باپتىڭ 2-بولىگى 1,4-تارماقتارى ("قاراقشىلىق") بويىنشا، 99-باپتىڭ 2-بولىگى 7,8-تارماقتارى ("ادام ءولتiرۋ") بويىنشا ايىپتالىپ جاتىر.
نۇرالى قياسوۆ قر قىلمىستىق كودەكسىنىڭ 192-بابىنىڭ 2-بولىگى 1, 4 -تارماقتارى ("ۇرلىق") بويىنشا، 99-باپتىڭ 2-بولىگى 7,8-تارماقتارى ("ادام ءولتiرۋ") بويىنشا ايىپتالىپ جاتىر.
جانار تولىباەۆا قر قىلمىستىق كودەكسىنىڭ 188-بابىنىڭ 2-بولىگى 1-تارماعى ("ۇرلىق") بويىنشا جانە 434-باپ بويىنشا ("قىلمىس تۋرالى حابارلاماۋ") ايىپتالىپ جاتىر. قىلمىستىق ءىس 38 تومنان تۇرادى.
ەسكە سالايىق، بيىل 19 شىلدەدە الماتىدا بەلگىسىز بىرەۋلەر دەنيس تەندى پىشاقتاپ كەتكەن بولاتىن. وقيعا شامامەن 15.00-دە قۇرمانعازى مەن بايسەيىتوۆا كوشەلەرىنىڭ قيىلىسىندا بولعان. كەيىن قالالىق ءىىد وكىلدەرى دەنيس تەنگە اۆتوۇرىلار شابۋىل جاساعانىن مالىمدەدى. رەسمي مالىمدەمەدە ، سپورتشى ۇرىلاردىڭ ۇستىنەن تۇسكەن. ۇرىلاردىڭ ارتىنان قۋعان دەنيسكە كۇدىكتىلەر پىشاق جۇمساپ، سپورتشى، كوپ قان جوعالتقان. ول اۋرۋحانادا كوز جۇمدى.
"ادىرنا" ۇلتتىق پورتالى
