Byltyrǵy jyly búkil Qazaqstandy emes, sport álemin qara jamyldyrǵan Denıs Tenniń isi boıynsha sot otyrysy jalǵasýda.
Basty sot otyrysy Almaty qalasynyń qylmystyq ister jónindegi mamandandyrylǵan aýdanaralyq sotynda ótip jatyr. Denıstiń anasy Oksana Ten munyń jaı kólik aınasyn urlaý ekenine senbeıtinin aıtty.
"Birinshi sekýndtan-aq munyń jaı kólik aınasyn urlaý ekenine senbedim. Olaı oılaýyma tek ana júregi emes, ishki túısik te sebep bolǵan joq... ispen tanystym. Tergeý muqııat júrgizildi, qylmyskerler tez arada tabyldy. Osyǵan atsalysqandarǵa raqmet aıtamyn. Denıs úshin materıaldyq qundylyqtar artyq emes. Bul nusqamen esh kelispeıtin sebebim men Denıstiń qalaı áreket etetinin bilemin", - deıdi anasy.
"Meniń oıymsha, bul tapsyryspen jasalyp otyr. Oǵan kóptegen derek dálel. Denıstiń ol kúni jumysy kóp boldy, 19 shildede de qoly bos bolǵan joq. Bizde barlyǵy jazylyp turady. 23 shildede Astanaǵa úlken is-sharaǵa ushyp ketýi tıis bolatyn", - dedi Oksana Ten.
Aıyptalýshy Janar Tolybaevanyń qorǵaýshysy bul aıyppen kelispeıdi. Sot májilisinen keıin jýrnalısterge túsinikteme bergen advokat Amangeldi Sarıev «Bul qylmysqa eshkimniń, úshinshi, tórtinshi adamdardyń qatysy baryna dálel joq. Munda adamdy óltirý quramy joq. Kórdińizder ǵoı, telefondary, aqshasy, aıfony, kóliktiń aınasy bári qalǵan. Qaraqshylyq jasaǵysy kelse, sýmkany bosatyp alyp ketpeı me», - dep jaýap berdi.
Aıta keteıik, osy is boıynsha sot aldyna Arman Qudaıbergenov, Nuraly Qııasov pen Janar Tolybaeva keldi.
Arman Qudaıbergenov QR Qylmystyq kodeksiniń 188-babynyń 2-bóligi 2-tarmaǵy ("Urlyq") boıynsha, 192-baptyń 2-bóligi 1,4-tarmaqtary ("Qaraqshylyq") boıynsha, 99-baptyń 2-bóligi 7,8-tarmaqtary ("Adam óltirý") boıynsha aıyptalyp jatyr.
Nuraly Qııasov QR Qylmystyq kodeksiniń 192-babynyń 2-bóligi 1, 4 -tarmaqtary ("Urlyq") boıynsha, 99-baptyń 2-bóligi 7,8-tarmaqtary ("Adam óltirý") boıynsha aıyptalyp jatyr.
Janar Tolybaeva QR Qylmystyq kodeksiniń 188-babynyń 2-bóligi 1-tarmaǵy ("Urlyq") boıynsha jáne 434-bap boıynsha ("Qylmys týraly habarlamaý") aıyptalyp jatyr. Qylmystyq is 38 tomnan turady.
Eske salaıyq, bıyl 19 shildede Almatyda belgisiz bireýler Denıs Tendi pyshaqtap ketken bolatyn. Oqıǵa shamamen 15.00-de Qurmanǵazy men Baıseıitova kósheleriniń qıylysynda bolǵan. Keıin qalalyq IID ókilderi Denıs Tenge avtourylar shabýyl jasaǵanyn málimdedi. Resmı málimdemede , sportshy urylardyń ústinen túsken. Urylardyń artynan qýǵan Denıske kúdiktiler pyshaq jumsap, sportshy, kóp qan joǵaltqan. Ol aýrýhanada kóz jumdy.
"Adyrna" ulttyq portaly
