پرەزيدەنت قاسىم-جومارت توقاەۆ Halyk توبىنىڭ جۇيە قۇراۋشى وتاندىق قارجى ۇيىمىنىڭ وكىلدەرى الەكساندر پاۆلوۆپەن جانە ءۇمىت شاياحمەتوۆامەن كەزدەسۋ وتكىزدى. مەملەكەت باسشىسى توپتىڭ اعىمداعى قىزمەتى، دامۋدىڭ پەرسپەكتيۆالىق جوسپارلارى تۋرالى اقپاراتتى تىڭدادى، وتاندىق بيزنەستى قولداۋ، قازاقستاننىڭ شەتەلدەگى ەكونوميكالىق جانە ىسكەرلىك بايلانىستارىن كەڭەيتۋدە توپتىڭ الەۋەتىن پايدالانۋ جونىندەگى ۇسىنىستاردى تىڭدادى.
الەكساندر پاۆلوۆ پەن ءۇمىت شاياحمەتوۆا مەملەكەت باسشىسىن ستراتەگيالىق جوسپارلارمەن تانىستىردى، Halyk Bank-ءتىڭ مەملەكەتتىڭ قارجىلىق ينفراقۇرىلىمىن قالىپتاستىرۋعا قاتىسۋى، Halyk توبىنىڭ ەكونوميكانىڭ ناقتى سەكتورىن كرەديتتەۋدەگى ۇستانىمدارى، تسيفرلىق قىزمەتتەردى ازىرلەۋ جانە ەنگىزۋ جونىندەگى مەملەكەتتىك ورگاندارمەن ءتيىمدى ءوزارا ءىس-قيمىل، ەۋرازيالىق وڭىردە، ونىڭ ىشىندە قاتىسۋشى ەلدەردى (رەسەي، گرۋزيا، قازاقستان، قىرعىزستان جانە وزبەكستان) جانە China Citic Bank-پەن ستراتەگيالىق سەرىكتەستىكتى قوسا العاندا، قارجىلىق جانە تسيفرلىق حاب رەتىندە توپتىڭ ىسكە اسىرىلعان الەۋمەتتىك جوبالارى تۋرالى ايتىپ بەردى.
«ءبىز مەملەكەت باسشىسىنا Halyk Bank-ءتىڭ قازاقستان ەكونوميكاسىن نەسيەلەندىرۋدەگى ورنى، شەتەلدىك ينۆەستورلار تاراپىنان كۇشتى حالىقارالىق ۇستانىمدار مەن سەنىم تۋرالى ەگجەي-تەگجەيلى حابارلادىق. زاڭدى تۇلعالاردىڭ كرەديتتەرى بويىنشا ەلەۋلى ۇلەس (52%), كۆازيمەملەكەتتىك سەكتور كومپانيالارىمەن بەلسەندى جۇمىس، كاسىپكەرلىكتى قولداۋدىڭ مەملەكەتتىك باعدارلامالارىنداعى كوشباسشىلىق تۋرالى ايتىپ بەردىك. ءبىز توپتىڭ مۇمكىندىكتەرىن، ونىڭ ايماقتىق وكىلدىگىن پايدالانا وتىرىپ، مەملەكەت پەن بيزنەستىڭ ءوزارا ءىس - قيمىلى تۋرالى كوزقاراسىمىزبەن تانىستىردىق»، - دەدى الەكساندر پاۆلوۆ.
«Halyk - ستەيكحولدەرلەردىڭ بارلىق ساناتتارى، سونىڭ ىشىندە مەملەكەت ءۇشىن سەنىمدى جانە ۋاقىتپەن تەكسەرىلگەن سەرىكتەس، ول تۇراقتىلىق پەن ءوسۋ كەزىندە دە، ءتۇرلى داعدارىستار مەن توتەنشە جاعدايلار كەزىندە دە ءتيىمدى جۇمىس ىستەۋ قابىلەتىن بىرنەشە رەت ايقىن كورسەتتى. ءبىزدىڭ بىرەگەي تاجىريبەمىز نارىقتاعى جاعدايدى دامىتۋ، ستراتەگيالىق مىندەتتەردى شەشۋ جانە كليەنتتەرىمىزدىڭ مۇددەسىنە يننوۆاتسيالىق ونىمدەر مەن قىزمەتتەردى ەنگىزۋ ءۇشىن قوسىمشا فاكتور رەتىندە پايدالانا وتىرىپ، بارىنشا ۇتقىر بولۋعا مۇمكىندىك بەرەدى، - دەپ اتاپ ءوتتى ءۇمىت شاياحمەتوۆا، - بۇگىنگى تاڭدا Halyk تسيفرلىق ەكوجۇيەسى - بۇل جەكە تۇلعالاردىڭ 9 ملن-نان استام بەلسەندى كليەنتتەرى، قازاقستاننىڭ ءىرى كومپانيالارىنىڭ 80%-ى. وسى جىلدىڭ وزىندە Halyk تسيفرلىق پلاتفورمالارى ارقىلى مەملەكەتتىك قىزمەتتەر 10 ملن-نان استام رەت پايدالانىلدى. سوڭعى جەتىستىكتەردىڭ ءبىرى - قمگ IPO ناتيجەلەرى، وندا جالپى وتىنىمدەردىڭ 71%-ى Halyk توبىنىڭ قوسىمشالارى ارقىلى بەرىلگەن.
بۇل توپتىڭ مەملەكەتتىك باستامالاردىڭ زاماناۋي سەرىكتەسى رەتىندەگى ءرولىن تاعى دا راستايدى. وسىعان بايلانىستى، Halyk توبىنىڭ قولدا بار مۇمكىندىكتەرىن ەسكەرە وتىرىپ، ءبىز مەملەكەت باسشىسىنا ءىرى وڭىرلىك قارجى توبىنىڭ مەملەكەتتىك رەفورمالاردى ىسكە اسىرۋعا قاتىسۋ پەرسپەكتيۆالارىن تالقىلاۋدى ۇسىندىق».
Halyk توبىنىڭ وكىلدەرى مەملەكەت باسشىسىنا كەزدەسۋ ءۇشىن العىسىن ءبىلدىردى، سونداي-اق كرەديتتەۋ نارىعىن ودان ءارى دامىتۋ جانە وتاندىق ەكونوميكانى قارجىلاندىرۋدى ىنتالاندىرۋ جونىندە بىرقاتار ۇسىنىستار ەنگىزدى.
پرەزيدەنت قولايلى ينۆەستيتسيالىق ورتا مەن بيزنەس-احۋالدى قۇرۋ، تسيفرلىق باستامالاردى كەڭەيتۋ جانە مەملەكەت، حالىق جانە بيزنەس مۇددەلەرىنە يننوۆاتسيالىق قىزمەتتەردى ەنگىزۋ ماسەلەلەرىندە مەملەكەتپەن ءوزارا ءىس-قيمىل جونىندەگى توپتىڭ وڭ تاجىريبەسىن ودان ءارى دامىتۋدىڭ ماڭىزدىلىعىن اتاپ ءوتتى.
