ميگرانتتاردىڭ ەل ەكونوميكاسىنا تيگىزەر پايدالى تۇستارىن دا ەسكەرۋ قاجەت- گەننادي شيپوۆسكيح

3665
Adyrna.kz Telegram
فوتو: parlam.kz
فوتو: parlam.kz

قازاقستانعا وزگە ەلدەن قونىس اۋدارۋشىلار قازاق ءتىلى مەن سالت-ءداستۇرىن ۇيرەنۋى كەرەك. سونداي-اق، ەل ەكونوميكاسىنا پايداسىن تيگىزۋى قاجەت. بۇل پىكىردى ءماجىلىس دەپۋتاتى گەننادي شيپوۆسكيح “ادىرنا” ۇلتتىق پورتالىنا ايتتى. 

قازاق تىلىندە مۇدىرمەي سويلەيتىن دەپۋتاتتىڭ ايتۋىنشا، ميگرانتتاردىڭ ەل ەكونوميكاسىنا تيگىزەر پايدالى تۇستارىن دا ەسكەرۋ قاجەت.

ء“اربىر ماسەلەنىڭ ەكى جاعى بولادى. دۇرىس جاعى جانە بۇرىس جاعى. رەسەيدەن قونىس اۋدارۋشى ازاماتتار بولسىن، باسقا ەل بولسىن، دۇرىس جاعىن الىپ قارايتىن بولساق، بىرىنشىدەن، ەل ەكونوميكاسىنا پايدا تيگىزەتىن تۇسىن ويلاۋىمىز كەرەك. ماسەلەن، ەلىمىزدە بولماعان ماماندىقتاردىڭ ماماندارىنىڭ كەلۋى. ياعني، جاقسى مايتالمانداردىڭ كەلۋى ەلگە پايداسىن تيگىزەر ەدى. ولار قازاقستاننىڭ ماماندارىمەن تاجىريبە الماسادى. ناتيجەسىندە بىلىكتىلىك ارتىپ، ەكونوميكاعا پايدا تيگىزەر ەدى. ونى ەلىمىزدە دۇرىس جاعىنان پايدالانۋىمىز قاجەت. بۇل ەلىمىزدىڭ ەكونوميكاسىنا تاپتىرماس تاجىريبە ەكەنى ءسوزسىز.

مەن قر-نىڭ پارلامەنت ءماجىلىسىنىڭ 7-سايلانىم دەپۋتاتى بولىپ جۇرگەن كەزدە قازاقستان حالقى اسسامبلەياسىنىڭ بەلسەندى مۇشەلەرىمەن بىرلەسە وتىرىپ، ۇندەۋ جاساعان بولاتىنبىز. سول كەزدە ءبىز رەسەيدەن قونىس اۋدارۋشىلار عانا ەمەس، باسقا دا شەتەلدىك ازاماتتارعا  ەسكەرۋ كەرەك دۇنيەلەردى اتاپ وتتىك. ولارعا ەگەر ەلىمىزگە كەلىپ، قونىس اۋدارىپ نەمەسە ءبىر جۇمىسپەن كەلىپ جاتساڭىزدار، سىزدەر ارقاشان مىنانى بىلۋلەرىڭىز كەرەك: قازاق ەلىنىڭ قازاق جەرىنىڭ ءتىلى، ءدىنى، مادەنيەتى جانە سالت-ءداستۇرى اجىراماس بولىك جانە ءبىزدىڭ قاستەرلى دۇنيەمىز. سونى ساقتاۋ، قۇرمەتتەۋ كەرەك!”، -دەدى گەننادي شيپوۆسكيح.

پىكىرلەر