قازاقستاندىق ءانشى ديماش قۇدايبەرگەن 29 قاڭتاردا استانادا وتكەن ءباسپاسوز ءماسليحاتىندا قىتايداعى ەتنيكالىق قازاقتاردىڭ ماسەلەسى تۋرالى پىكىرىن ءبىلدىردى. ءباسپاسوز جيىنىندا ازاتتىق ءتىلشىسى انشىدەن ء"سىز الەمگە قىتاي نارىعى ارقىلى تانىلدىڭىز. قىتايداعى ەتنيكالىق قازاقتاردىڭ ماسەلەسى جايىندا بىلەسىز بە؟ ولاردىڭ ماسەلەسىن كوتەرۋ ويىڭىزدا بار ما؟ دەپ سۇرادى.
ديماش قۇدايبەرگەن بۇل سۇراققا:
- الەمنىڭ قاي تۇكپىرىندەگى قازاق بولماسىن - ءوزىمىزدىڭ اعايىندارىمىز جانە ولاردىڭ تاعدىرى ءبىز ءۇشىن ەشقاشان قىزىقسىز بولىپ قالمايدى. قولىمنان كەلسە، ءبارىن بەرە ەدىم، بىراق مەنىڭ قولىمنان كەلمەيدى، مەن تەك ءانشىمىن، ديپلومات ەمەسپىن. قازىر ءوزىمدى تەك ءانشى رەتىندە كورەم. بۇل ماسەلەدە الاڭدامايدى دەپ ويلاماڭىزدار. مەن دە بۇل ماسەلەنىڭ تەزىرەك شەشىلگەنىن قالايمىن، - دەپ جاۋاپ بەردى.
ديماش قۇدايبەرگەن ءباسپاسوز ءماسليحاتىن بيىل جازدا استانادا بەرەتىن "ارناۋ" جەكە كونتسەرتىنە ارناپ وتكىزدى. جيىندا ءانشى ءوزىنىڭ شىعارماشىلىق جۇمىستارى، جوسپارلارى تۋرالى ايتىپ، جۋرناليستەر ساۋالدارىنا جاۋاپ بەردى.
24 جاستاعى ءانشى ديماش قۇدايبەرگەن 2017 جىلى قىتايدا وتكەن I Am a Singer ءان بايقاۋىندا ەكىنشى ورىن الىپ، "ازياداعى ەڭ تانىمال ءانشى" نوميناتسياسى بويىنشا Top Chinese Music Awards جۇلدەسىن يەلەنگەن. سول جىلى شىلدەدە ديماش Asian Music Gala جۇلدەسىن "ەڭ تانىمال شەتەلدىك ءانشى" نوميناتسياسى بويىنشا العان.
قىتايدىڭ شىڭجاڭ وڭىرىندە ەتنيكالىق ازشىلىققا، ونىڭ ىشىندە ەتنيكالىق قازاقتارعا قىسىم جاساۋ تۋرالى دەرەكتەر 2017 جىلدىڭ ساۋىرىنەن باستاپ ءتۇسىپ جاتىر. ازاتتىق شىڭجاڭدا قاماۋعا الىنعان، قازاقستانعا ورالا الماي جاتقان قىتايداعى قازاقتار تۋرالى بىرنەشە رەت جازعان.
ديماش قۇدايبەرگەننىڭ ءباسپاسوز ءماسليحاتى
