Qazaqstandyq änşı Dimaş Qūdaibergen 29 qaŋtarda Astanada ötken baspasöz mäslihatynda Qytaidaǧy etnikalyq qazaqtardyŋ mäselesı turaly pıkırın bıldırdı. Baspasöz jiynynda Azattyq tılşısı änşıden "Sız älemge Qytai naryǧy arqyly tanyldyŋyz. Qytaidaǧy etnikalyq qazaqtardyŋ mäselesı jaiynda bılesız be? Olardyŋ mäselesın köteru oiyŋyzda bar ma? dep sūrady.
Dimaş Qūdaibergen būl sūraqqa:
- Älemnıŋ qai tükpırındegı qazaq bolmasyn - özımızdıŋ aǧaiyndarymyz jäne olardyŋ taǧdyry bız üşın eşqaşan qyzyqsyz bolyp qalmaidy. Qolymnan kelse, bärın bere edım, bıraq menıŋ qolymnan kelmeidı, men tek änşımın, diplomat emespın. Qazır özımdı tek änşı retınde körem. Būl mäselede alaŋdamaidy dep oilamaŋyzdar. Men de būl mäselenıŋ tezırek şeşılgenın qalaimyn, - dep jauap berdı.
Dimaş Qūdaibergen baspasöz mäslihatyn biyl jazda Astanada beretın "Arnau" jeke konsertıne arnap ötkızdı. Jiynda änşı özınıŋ şyǧarmaşylyq jūmystary, josparlary turaly aityp, jurnalister saualdaryna jauap berdı.
24 jastaǧy änşı Dimaş Qūdaibergen 2017 jyly Qytaida ötken I Am a Singer än baiqauynda ekınşı oryn alyp, "Aziiadaǧy eŋ tanymal änşı" nominasiiasy boiynşa Top Chinese Music Awards jüldesın ielengen. Sol jyly şıldede Dimaş Asian Music Gala jüldesın "eŋ tanymal şeteldık änşı" nominasiiasy boiynşa alǧan.
Qytaidyŋ Şyŋjaŋ öŋırınde etnikalyq azşylyqqa, onyŋ ışınde etnikalyq qazaqtarǧa qysym jasau turaly derekter 2017 jyldyŋ säuırınen bastap tüsıp jatyr. Azattyq Şyŋjaŋda qamauǧa alynǧan, Qazaqstanǧa orala almai jatqan Qytaidaǧy qazaqtar turaly bırneşe ret jazǧan.
Dimaş Qūdaibergennıŋ baspasöz mäslihaty
