جۋرناليست، پروديۋسەر ينديرا تۇرسىنباي «قازاقستان» تەلەراديوكورپوراتسياسىنا قاراستى «Balapan» تەلەارناسىنىڭ ديرەكتورى قىزمەتىنە تاعايىندالدى. بۇل تۋرالى قازاقستان ۇلتتىق تەلەارناسى حابارلادى، دەپ جازادى "ادىرنا" ۇلتتىق پورتالى.
«قازىر «Balapan» تەلەارناسىنىڭ الدىندا تۇرعان نەگىزگى مىندەت - بالالار كونتەنتىن وندىرۋشىلەر اراسىنداعى باسەكەلەستىكتە الدا بولۋ، انيماتسيا ءوندىرىسىن كەڭەيتۋ. ول ءۇشىن ەڭ الدىمەن ونىمدەر ساپاسىن بۇدان ءارى ارتتىرۋ ماقساتى تۇر. بۇگىندە بالالار كونتەنتىن وندىرەتىن ءتۇرلى وتاندىق جانە الەمدىك جاڭا پلاتفورمالار پايدا بولدى، باسەكەلەستىك مىقتى بولعاندىقتان، تەلەوندىرىستە كرەاتيۆتى يدەيالاردى ىسكە اسىرۋ ماڭىزدى. بۇل باعىتتا نارىقتاعى جاڭاشىل مامان رەتىندە ينديرا تۇرسىنبايدىڭ تاجىريبەسى بالالار ارناسى ءۇشىن پايدالى بولادى دەپ سەنەمىز»، - دەدى كورپوراتسيانىڭ باسقارما ءتورايىمى ءلاززات تانىسباي.
Balapan تەلەارناسىنىڭ بۇرىنعى باسشىسى ماقپال جۇماباي ينديرا تۇرسىنبايعا ساتتىلىك تىلەدى.
"Balapan ارقاشان جۇرەگىمدە. قۇددى ءبىر بالام سەكىلدى. Balapan-سىز ءومىر ءسۇرۋدى ۇيرەنۋدىڭ ءوزى وڭاي بولماعانى راس. بۇل ۇياعا ءبىر رەت كىرسەڭ، جانىڭنىڭ جارتىسى وسىندا قالادى. تەلەارنانىڭ جاڭا باسشىسى ينديرا تۇرسىنبايعا تەك ساتتىلىك تىلەيمىن! سەنىم ارتامىز، جاڭالىقتار كۇتەمىز!", - دەپ جازدى ماقپال جۇماباي.
ەستەرىڭىزگە سالا كەتەيىك، ينديرا تۇرسىنباي 2003 جىلدان بەرى «Qazaqstan»، «استانا»، «ەۆرازيا»، «Almaty» تەلەارنالارىندا جۇرگىزۋشى، جۋرناليست، جاڭالىقتار ءتىلشىسى بولىپ ەڭبەك ەتكەن. سوڭعى جىلدارى جەكە پروداكشن كومپانيالاردا باسشىلىق قىزمەتتەر اتقاردى.
"ادىرنا" ۇلتتىق پورتالى
