استانادا 13 قازان كۇنى ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ VI ءسامميتىءوتتى. شاراعا 50-گە جۋىق شەتەلدىك دەلەگاتسيا، ونىڭ ىشىندە 11 مەملەكەت باسشىسى كەلدى. بۇل تۋرالى قر پرەزيدەنتى جانىنداعى قسزي باس ساراپشىسى بولات اۋەلباەۆ “ادىرنا” ۇلتتىق پورتالىنا پىكىرىن ءبىلدىردى.
“اوسشك VI ءسامميتىنىڭ رەسمي اشىلۋى باستامالارعا تولى بولدى. بايانداماشىلار الەمدە بولىپ جاتقان وقيعالارعا قاتىستى ءوز ويلارىن ورتاعا سالىپ، ورىن الىپ وتىرعان پروبلەمالارعا ءوز پىكىرلەرىن ءبىلدىرىپ، ءوز ۇسىنىستارىن ورتاعا سالدى. بۇل كەزدەسۋدىڭ بارلىق ەرەكشەلىگىن كورسەتتى. وسىلايشا، وعان مۇشە بارلىق ەلدەر وزدەرىن ورتاق ازيالىق قاۋىپسىزدىكتى قالىپتاستىرۋ ۇدەرىسىنە مۇددەلى قاتىسۋشىلار رەتىندە كورسەتتى.
ءوز كەزەگىندە استانا ءسامميتىنىڭ توراعاسى قاسىم-جومارت توقاەۆ اوسشك جۇمىسىنىڭ ماڭىزدى باعىتتارىن اتاپ ءوتتى. بۇل ەكونوميكالىق جانە قارجىلىق قاتىناستاردىڭ تۇراقتى جۇيەسىن قۇرۋ، كليماتتىق كۇن ءتارتىبى، ازىق-تۇلىك قاۋىپسىزدىگى جانە گۋمانيتارلىق ولشەم.
راسىندا دا، قارقىندى دامىپ كەلە جاتقان ازيالىق ايماقتار مەن مەملەكەتتەر قازىرگى الەمدىك ۇدەرىستەردە ەرەكشە ورىن الا باستادى. ازيا ۇكىمەتتەرى ازيانىڭ جاھاندىق ۇدەرىسكە قوساتىن ەكونوميكالىق ۇلەسىنە سايكەس حالىقارالىق قاتىناستاردىڭ جاڭا تەڭ قۇقىلى جۇيەسىن قۇرۋعا ەرىك-جىگەرىن تۇراقتى تۇردە كورسەتە باستادى”،-دەدى ساراپشى.
سونداي-اق، ول استانا كونفەرەنتسياسىنىڭ العا قويعان ماقساتىندا ايتا كەتتى.
“ازيا ەلدەرىنىڭ جيىنتىق ەكونوميكالىق ءوسىمى وراسان زور. ءوندىرىستىڭ ينتەرناتسيوناليزاتسياسى، تسيفرلىق تەحنولوگيالار جانە بەلسەندى الەۋمەتتىك-ەكونوميكالىق ءوزارا بايلانىستار جاڭا مۇمكىندىكتەر تۋعىزىپ، ازيانىڭ جاڭا كەلبەتىن قالىپتاستىرادى. بۇل استانادا وتكەن سامميت 21 عاسىردىڭ كەلبەتىن ايقىنداي باستادى.
ەكونوميكالىق، قارجىلىق، ونەركاسىپتىك، كولىكتىك، لوگيستيكالىق جانە اقپاراتتىق جۇيەلەردى ينتەرناتسيونالداندىرۋ پروتسەسىندە كونسترۋكتيۆتى حالىقارالىق قاتىناستاردى قۇرۋعا سۇرانىس ارتىپ كەلەدى.
ءىس-شارانىڭ بارلىق قاتىسۋشىلارى ورتاق سەنىم شارالارىن ىلگەرىلەتۋ نيەتىن راستادى. بۇل تۇرعىدا قازاقستان تۇراقتى قاۋىپسىزدىك جۇيەسىن قالىپتاستىرۋعا جاردەمدەسۋ ساياساتىنا ادال بولىپ قالا بەرەدى!”،- دەپ ءسوزىن قورىتىندىلادى.
