اقتوبەدە گۋمانيتارلىق كوللەدجدىڭ 17 جاستاعى ستۋدەنتى پىشاقتان جارالانىپ اۋرۋحاناعا ءتۇستى. اقتوبە وبلىستىق پوليتسيا دەپارتامەنتىنىڭ حابارلاۋىنشا، 29 قاڭتار كۇنى ەكى كوللەدج وقۋشىلارى ءوزارا كيكىلجىڭگە كەلىپ، ءبىر ستۋدەنت ەكىنشىسىنە پىشاق سۇعىپ العان.
پوليتسيا بۇل دەرەك بويىنشا جەرگىلىكتى كوللەدجدەردىڭ بىرىندە وقيتىن 16 جاستاعى ستۋدەنت ۇستالعانىن حابارلادى. ونىڭ ۇستىنەن قىلمىستىق كودەكستىڭ 106-بابى («دەنساۋلىققا قاساقانا اۋىر زيان كەلتىرۋ») بويىنشا ءىس قوزعالعان.
اقتوبە وبلىستىق دەنساۋلىق ساقتاۋ دەپارتامەنتىنىڭ مالىمەتىنشە، 29 قاڭتار كۇنى وتكىر زاتتان اۋىر جارالانىپ اۋرۋحاناعا جەتكىزىلگەن ءجاسوسپىرىم ەسىن جيعان. قازىر ناۋقاستىڭ جاعدايى بىرقالىپتى.
جابىرلەنۋشى — اقتوبەدەگى گۋمانيتارلىق كوللەدجدىڭ 3-كۋرس ستۋدەنتى. كوللەدج ديرەكتورىنىڭ تاربيە ءىسى جونىندەگى ورىنباسارى گۇلبارشا جيەنقۇلوۆانىڭ ايتۋىنشا، جارالانعان ستۋدەنت كوللەدج جاتاقحاناسىندا تۇرمايدى. كوللەدجگە تۋىستارىنىڭ ۇيىنەن قاتىناپ وقيدى.
اقتوبەدە بيىل جاسوسپىرىمدەر جانجالداسىپ، ءبىر-بىرىنە پىشاق سالعان وسىمەن ەكىنشى وقيعا تىركەلىپ وتىر. 10 قاڭتار كۇنى اقتوبەنىڭ ەسكى زيرات اۋماعىندا 40 شاقتى وقۋشى توبەلەسىپ، اراسىندا جەرگىلىكتى ۋنيۆەرسيتەتتىڭ ءبىرىنشى كۋرس ستۋدەنتى جارالانعان. بۇل وقيعادان سوڭ قىلمىستىق كودەكستىڭ «بۇزاقىلىق» بابى بويىنشا قىلمىستىق ءىس قوزعالعان.
ال 26 قاڭتاردا اقتوبە وبلىسىنىڭ شالقار قالاسىندا ەكى مەكتەپتىڭ جوعارى سىنىپ وقۋشىلارى توبەلەسىپ، ءبىر وقۋشى ەكىنشىسىنە پىشاق سالعان. 10 سىنىپ وقۋشىسى اۋىر جارالانىپ، اۋرۋحاناعا جەتكىزىلگەن سوڭ ۇزاماي قايتىس بولعان.
دەرەككوز:ازاتتىق راديوسى
