قازاقستان قۇتقارۋشىلار ۇيىندىلەردىڭ استىنان ءۇش ءتىرى ادامدى شىعاردى. بۇل تۋرالى تجم ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
ۆەدومستۆو ەكىنشى ەشەلون تۇركياعا كەلگەن ساتتەن باستاپ تاۋلىك بويى قۇتقارۋ جۇمىستارىن جۇرگىزىپ جاتقانىن اتاپ ءوتتى. ولارعا ىزدەۋ ورنى گازيانتەپ قالاسىنان 69 شاقىرىم جەردە ورنالاسقان نۋرداگى قالاسىنداعى تولىعىمەن قيراعان عيمارات بەكىتىلگەن.
بۇل نىساندا قازاقستاندىق قۇتقارۋشىلار ادامداردىڭ ورنالاسقان جەرى مەن جاي-كۇيىن انىقتاۋ، ۇيىندىلەر استىندا زارداپ شەككەندەرمەن اۋديو بايلانىس ورناتۋ، قاجەتتى كومەكتىڭ كولەمى مەن سيپاتىن انىقتاۋ بويىنشا جۇمىستارىن جۇرگىزدى.
«ماماندار ۇلكەن تەرەڭدىكتەگى ۇيىندىلەردىڭ استىنان زارداپ شەككەندەردى ەۆاكۋاتسيالاۋ ءۇشىن جول اشۋ جۇمىستارىن ورىنداپ، جەدەل جانە ساۋاتتى ءىس - قيمىلدىڭ، سونداي - اق زارداپ شەككەندەردى بلوكتان شىعارۋ بويىنشا ۋاقتىلى قابىلدانعان شارالاردىڭ ناتيجەسىندە بۇگىن تۇندە كولەمى 18 مىڭ تەكشە مەتردەن استام ءۇيىندىنىڭ استىنان ءۇش ءتىرى ادامدى - ەر ادام مەن ەكى ايەلدى شىعارۋعا مۇمكىندىك تۋدى. ادامدار دەرەۋ مەديتسينالىق قىزمەتتەرىنە جەتكىزىلدى»،—دەدى توتەنشە جاعدايلار مينيسترلىگى.
<
