بۇگىن ۋكراينانىڭ پرەزيدەنتى زەلەنسكي قازاقستان پرەزيدەنتى توقاەۆقا العىس ايتتى. بۇل تۋرالى ول ءوزىنىڭ Twitter پاراقشاسىندا جاريالادى، دەپ حابارلايدى “ادىرنا” ۇلتتىق پورتالى.
زەلەنسكي توقاەۆقا قازاقستاننىڭ ۋكرايناعا كورسەتىپ جاتقان گۋمانيتارلىق كومەگى ءۇشىن العىسىن ءبىلدىردى.
“مەن قازاقستان پرەزيدەنتىمەن تەلەفون ارقىلى سويلەستىم. ءبىز حالىقارالىق پلاتفورمالارداعى ىنتىماقتاستىقتى تالقىلادىق. مەن ۋكرايناعا گۋمانيتارلىق كومەك كورسەتكەنى ءۇشىن قازاقستانعا العىس ايتتىم”،- دەپ جازدى زەلەنسكي.
ال ءدال سول ۋاقىتتا رف سىرتقى ىستەر ءمينيسترى سەرگەي لاۆروۆ ماسكەۋدە تمد، ۇقشۇ، ەاەو جانە وداق مەملەكەتتەرىنىڭ اتقارۋشى قۇرىلىمدارىنىڭ باسشىلارىمەن كەزدەستى. ونىڭ ىشىندە يمانعالي تاسماعامبەتوۆ تە بار.
رەسەي تاراپى تاسماعامبەتوۆتى ودكب باسشىسى رەتىندە تولىق قولداۋ بىلدىرۋگە دايىن ەكەندەرىن ايتتى.
بۇل جونىندە Facebook بەلسەندىلەرى دە ۇندەمەي قالمادى.
“كەشەگى لۋكاشتىڭ قوقان-لوققىسى ءبىزدىڭ ەلدە كەرى رەاكتسيا بەرگەنىن ەندى ءتۇسىنىپ، مايپازداپ، تىگىسىن جاتقىزۋعا كىرىستى مە؟
ءبىر كۇندە، ءبىر ۋاقىتتا زەلەنسكيدىڭ پرەزيدەنتكە العىسى مەن لاۆروۆتىڭ تاسماعامبەتوۆكە قولداۋ ءبىلدىرۋى نە دەگەن سايكەستىك؟ نە دەگەن سيمۆوليزم؟”،- دەپ جازدى بەلسەندى وڭعار قابدەن.
