تۇركيادان كەلگەن قۇتقارۋشىلار ەلگە امان-ەسەن ورالدى

2738
Adyrna.kz Telegram

گازيانتەپ قالاسىنداعى جويقىن جەر سىلكىنىسىنىڭ سالدارىن جويۋعا جۇمىلدىرىلعان قازاقستاندىق قۇتقارۋشىلاردىڭ ءبىرىنشى ەشەلونى ەلگە امان-ەسەن ورالدى. بۇل تۋرالى قر تجم ءباسپاسوز قىزمەتى حابارلادى، دەپ جازادى "ادىرنا" ۇلتتىق پورتالى. 

قر تجم قۇتقارۋشىلارى  مەن اپاتتار مەديتسيناسى ورتالىعىنىڭ دارىگەرلەرى بار بورت الماتى اۋەجايىنا قوندى. ولاردى قازاقستاندىقتار،  تۋىستارى، دوستارى مەن ارىپتەستەرى كۇتىپ الدى.

مەملەكەت باسشىسىنىڭ تاپسىرماسى بويىنشا 7 اقپاندا قۇتقارۋ بولىمشەلەرىنىڭ كۇشتەرى مەن قۇرالدارى، ونىڭ ىشىندە قازاقستان تجم تەحنيكاسى، اپاتتار مەديتسيناسى ورتالىعىنىڭ دارىگەرلەرى جانە كينولوگيالىق ەسەپتوپتار العاشقىلاردىڭ ءبىرى بولىپ ەكى ەشەلونمەن جولعا شىعىپ، ەڭ كۇردەلى قيراعان وبەكتىلەردە ىزدەستىرۋ-قۇتقارۋ جۇمىستارىن جۇرگىزۋگە كىرىسكەن بولاتىن.  قازاقستاندىق قۇتقارۋشىلار توبىن تج ءبىرىنشى ۆيتسە-ءمينيسترى يبراگيم كۇلشىمباەۆ باسقاردى.

ەستەرىڭىزگە سالا كەتەيىك، تۇركيانىڭ ءۇش وڭىرىندە ىزدەستىرۋ-قۇتقارۋ جۇمىستارىن جۇرگىزۋ باستالعاننان بەرى قازاقستان تجم قۇتقارۋشىلارىنىڭ كۇشتەرى 7 ادامدى قۇتقاردى. قازا تاپقان 88 ادامنىڭ، ونىڭ ىشىندە 10 بالانىڭ دەنەسى شىعارىلدى.

قۇتقارۋشىلار قولمەن، سونداي-اق ينجەنەرلىك تەحنيكانى، اۆاريالىق-قۇتقارۋ جابدىقتارىن، شانتس اسپاپتارىن تارتا وتىرىپ، 250 مىڭنان تەكشە استام مەتر ۇيىندىلەردى بولشەكتەدى. تولىعىمەن قيراعان عيماراتتا قازاقستاندىق قۇتقارۋشىلار ادامداردىڭ ورنالاسقان جەرى مەن جاي-كۇيىن انىقتاۋ، ۇيىندىلەر استىندا زارداپ شەككەندەرمەن اۋديو بايلانىس ورناتۋ، قاجەتتى كومەكتىڭ كولەمى مەن سيپاتىن انىقتاۋ بويىنشا جۇمىستارىن جۇرگىزدى. قازاقستاندىق قۇتقارۋشىلاردىڭ ۇلكەن تەرەڭدىكتەگى ۇيىندىلەردىڭ استىنان زارداپ شەككەندەردى ەۆاكۋاتسيالاۋ ءۇشىن جول اشۋ جۇمىستارىن ورىنداپ،  جەدەل جانە ساۋاتتى ءىس - قيمىلدىڭ، سونداي-اق زارداپ شەككەندەردى بلوكتان شىعارۋ بويىنشا ۋاقتىلى قابىلدانعان شارالاردىڭ ناتيجەسىندە مۇمكىندىك تۋدى. قۇتقارۋشىلار قۇلاعان قۇرىلىس ماتەريالى مەن ءۇي جيھازىنىڭ قالدىقتارى،  تار ساڭىلاۋلار ارقىلى جولدى كەسىپ ءوتتى. ءۇيىندىنىڭ كوبىنەسە تىرەۋىشسىز بولاتىنىن جانە سالدارىنان قايتادان قۇلاۋعا اكەلۋى مۇمكىن ەكەنىن اتاپ ءوتۋ كەرەك. ۇيىندىلەر استىنداعى قوزعالىس كەزىندە قازاقستان تجم قۇتقارۋشىلارى ءۇيىندىنىڭ استىندا ادامدى ءوز دەنەسىمەن قالقالاعانىن دا  اتاپ وتكەن ءجون. قۇتقارۋشىلاردىڭ مۇنداي جۇمىسى وتە قاۋىپتى جانە جوعارى كاسىبيلىكتى، قىراعىلىق پەن جەدەلدىكتى تالاپ ەتەدى.

قۇتقارۋشىلار جۇمىسىندا ۇيىندىلەردى بولشەكتەۋ ءۇشىن ينجەنەرلىك تەحنيكا دا، زارداپ شەككەندەردى ىزدەۋ تەحنيكالىق قۇرالدارىن دا قولداندى. وسىلايشا، قيراعان عيماراتتاردىڭ استىندا ىزدەستىرۋ-قۇتقارۋ جۇمىستارىن جۇرگىزۋ كەزىندە قازاقستاندىق قۇتقارۋشىلار ۇيىندىلەر استىندا زارداپ شەككەندەردى ىزدەۋ ءۇشىن ارنايى جابدىق - اكۋستيكالىق اسپاپتى پايدالاندى. بۇل ۇيىندىلەردىڭ استىندا ءتىرى ادامداردى انىقتاۋعا ارنالعان زاماناۋي اكۋستيكالىق قۇرىلعى. قۇرىلعى كىشكەنە قوزعالىستاردى، تىنىس الۋدى، جۇرەك سوعۋىن جانە كەز-كەلگەن باسقا ءالسىز شۋدى ۇستايدى.

تجم قىزمەتكەرلەرىنىڭ قىزمەتىندە بارلىق قاجەتتى قۇتقارۋ جابدىقتارى: گيدراۆليكالىق جانە پنەۆماتيكالىق قۇرالدار، گيدراۆليكالىق دومكراتتار، پنەۆمودومكراتتار، سوققىلار، پەرفوراتورلار، جارىقتاندىرۋ اسپاپتارى، شاتىرلار، سپۋتنيكتىك تەرمينال، رامالىق مودۋل، اۆتوتەحنيكا، سونداي-اق تجم بىلىكتى دارىگەرلەرىنىڭ ۋاقتىلى مەديتسينالىق كومەك كورسەتۋىنە ارنالعان ءدارى-دارمەكتەر بولدى. توپ قاجەتتى جابدىقتارمەن دە، قۇتقارۋ جۇمىستارىن جۇرگىزۋدە كوپ جىلدىق تاجىريبەسى بار قۇتقارۋشىلارمەن دە جابدىقتالعان.

قازاقستان تجم اپاتتار مەديتسيناسى ورتالىعىنىڭ دارىگەرلەرى دە تاۋلىك بويى زارداپ شەككەندەرگە بىلىكتى مەديتسينالىق كومەك كورسەتتى. بارلىق جۇمىس كەزەڭىندە 200-گە جۋىق جەرگىلىكتى تۇرعىندار مەن قۇتقارۋشىلارعا، ونىڭ ىشىندە 30-عا جۋىق بالاعا مەديتسينالىق كومەك كورسەتىلدى. جەرگىلىكتى تۇرعىنداردا سترەسستىڭ جەدەل رەاكتسياسىمەن، گيپوتەرميامەن، تىنىس الۋ ورگاندارىنىڭ اۋرۋلارىمەن، سونداي-اق ءارتۇرلى جاراقاتتارمەن بايلانىستى اۋرۋلار باسىم بولدى. پنەۆموكاركاس مودۋلىنە نەگىزدەلگەن مەديتسينالىق پوست ىزدەۋ ناتيجەلەرىن كۇتكەن زارداپ شەككەندەردىڭ تۋىستارى ءۇشىن باسپانا بولدى. بۇل مودۋل قيراعان عيماراتتاردىڭ اراسىندا قالعان ادامدار ءۇشىن جىلىتۋ پۋنكتى رەتىندە دە پايدالانىلدى.

ءبىزدىڭ كينولوگيالىق ەسەپتوپتارىمىز ىزدەۋ-قۇتقارۋ جۇمىستارىندا دا تاماشا ناتيجەلەر كورسەتتى جانە ۇيىندىلەر استىنداعى ادامداردى ىزدەۋ كەزىندە وزدەرىنىڭ جوعارى بىلىكتىلىگىن راستادى. قۇتقارۋشى يتتەر-بەلگيالىق مالينۋا دجەيكوب، ليگا م سيريۋس جانە اكسەل، لابرادور چارلي كينگ، نەمىس وۆچاركاسى ميرتا، گرينپيس ەسىمدى بوردەر كوللي-نۇسقاۋشىلارمەن جانە قۇتقارۋشىلار جاساقتارىمەن بىرگە ءار ادامنىڭ ءومىرى ءۇشىن بىرنەشە كۇن بويى قيراعان نىسانداردا جۇمىس ىستەدى.

سونىمەن قاتار، مەملەكەت باسشىسىنىڭ تاپسىرماسى بويىنشا تۇركياعا گۋمانيتارلىق كومەك جىبەرىلدى. تابيعي اپات ايماعىنا زارداپ شەككەندەرگە كومەك كورسەتۋگە ارنالعان شاتىرلار، جىلىتۋ قۇرىلعىلارى، جىلى كيىمدەر جانە باسقا دا قاجەتتى زاتتار جىبەرىلدى. گۋمانيتارلىق كومەكتىڭ جالپى كولەمى 55 توننا. گۋمانيتارلىق جۇك اۋە كولىگىمەن تۇركيانىڭ گازيانتەپ قالاسىنا جونەلتىلدى.

تۇركياداعى ءبىزدىڭ كۇشتەرىمىز بەن قۇرالدارىمىز ورنالاسقان جەردەگى قازاقستان تجم جەدەل شتابىنىڭ جۇمىسىن اتاپ وتكەن ءجون. جەدەل شتابتىڭ جۇمىسى ءبىرىنشى كۇننەن باستاپ بەلسەندى رەجيمدە بولدى، ونىڭ نەگىزگى مىندەتتەرى تج ايماعىنداعى جاعداي تۋرالى دەرەكتەردى جيناۋ، وڭدەۋ جانە تالداۋ، قاجەتتى اقپاراتتى بەرۋ; تج دامۋىن جانە ولاردىڭ سالدارىن بولجاۋ; تج جويۋ ماسەلەلەرىن جەدەل شەشۋ بويىنشا ۇسىنىستار دايىنداۋ بولدى.

تۇركيا رەسپۋبليكاسىنىڭ اFAD جەر سىلكىنىسى سالدارىن جويۋ داعدارىس ورتالىعىمەن كەلىسىلىپ، قازاقستان رەسپۋبليكاسى تجم كۇشتەرىمەن ىزدەستىرۋ-قۇتقارۋ جۇمىستارى بارلىق وبەكتىلەردە اياقتالدى، كۇشتەر توپتاماسى تۇراقتى ورنالاسقان پۋنكتتەرگە قايتارىلادى.

تۇركياداعى ىزدەستىرۋ-قۇتقارۋ جۇمىستارىنا استانا جانە الماتى قالالارىنان، اقمولا جانە قاراعاندى وبلىستارىنان قۇتقارۋشىلار قاتىستى. تۇركيا تۇرعىندارىنىڭ تاراپىنان قازاقستاندىق قۇتقارۋشىلارعا كاسىبي، ۋاقتىلى جانە ناتيجەلى ىزدەستىرۋ-قۇتقارۋ جۇمىستارى ءۇشىن شىن جۇرەكتەن العىس سوزدەرى ايتىلدى.

"ادىرنا" ۇلتتىق پورتالى 

پىكىرلەر