استانا اكىمى باقىت سۇلتانوۆ اكىمدىك تاراپىنان بارلىق كومەك كورسەتىلىپ جاتقانىن ايتتى. قر پرەمەر-ءمينيسترى باقىتجان ساعىنتاەۆ ۇكىمەتتىڭ كەزەكتى وتىرىسىندا استاناداعى جويقىن ورتتەن قازا بولعان بەس قىزدىڭ اتا-اناسىنا كوڭىل ايتتى.
"جانتۇرشىگەرلىك جاعداي، ءبىر وتباسىنىڭ باسىنا تۇسكەن اۋىر قايعى. ايدىڭ-كۇننىڭ امانىندا بەس بىردەي بالاسىنان ايىرىلىپ قالعان اتا-اناسىنا قۇداي كۇش-قۋات بەرسىن دەيمىز. مارقۇم بولعان بالالاردىڭ اتا-اناسىنا، تۋعان-تۋىستارىنا قايعىرىپ كوڭىل ايتامىز. اللا مۇنداي جاعدايدى ەندى ەشكىمنىڭ باسىنا بەرمەسىن دەپ تىلەيىك", - دەدى ساعىنتاەۆ ۇكىمەت وتىرىسىن باستاماس بۇرىن.
استانا اكىمى باقىت سۇلتانوۆتىڭ ايتۋىنشا، بۇگىنگى كۇنى اكىمدىك تاراپىنان بارلىق كومەك كورسەتىلىپ جاتىر.
"اتاپ ايتساق، جەرلەۋ ءراسىمى، اس بەرۋ ۇيىمداستىرىلىپ، ماتەريالدىق جانە پسيحولوگيالىق تۇرعىدا كومەك كورسەتىلۋدە. ءتيىستى كوميسسيا قۇرىلدى. قازىرگى كۇنى اتا-انالارمەن دە جۇمىس ىستەپ جاتىرمىز", -دەدى سۇلتانوۆ.
ول مۇنداي قايعىلى جاعدايلار قايتالانباس ءۇشىن جۇيەلى تۇردە جۇمىستار جاسالىپ جاتقانىن اتاپ ءوتتى.
"كۇننىڭ كۇرت سۋىتۋىنا وراي جەر ۇيلەردە پەش جاققاننان كەيىن ءورت شىعۋ قاتەرلەرى ارتۋدا. سوندىقتان مۇنىڭ الدىن الۋ ءۇشىن اۋدان اكىمدەرى، توتەنشە جاعدايلار دەپارتامەنتى، پوليتسيا دەپارتامەنتى باسشىلارىنا بىرلەسىپ، تۇنگى رەيد جۇمىستارىن جۇرگىزۋ تاپسىرىلدى. وت جاعىپ وتىرعان جەر ۇيلەردىڭ تۇرعىندارىنا ءورت قاۋىپسىزدىگى ەرەجەلەرى ءتۇسىندىرىلدى", - دەپ ەسەپ بەردى اكىم.
ال ىشكى ىستەر ءمينيسترى قالمۇحانبەت قاسىموۆ ءورتتىڭ شىعۋ سەبەبىن اتادى.
"پەش جاققاندا قاۋىپسىزدىك ەرەجەلەرى ساقتالماعان، ءورت سودان شىعىپ وتىر. بالالار تۇنگى ۋاقىتتا قاراۋسىز قالعان... قازىرگى ۋاقىتتا مۇنداي جاعدايلار از ەمەس. جىلىتۋ ماۋسىمى وتكەن جىلدىڭ 15 قازانىندا باستالدى، سودان بەرى ءورت وقيعالارى ءبىرشاما ازايدى. ەڭ باستىسى قازا بولعانداردىڭ سانى ازايدى. الايدا ۋلى گازدان قازا بولعاندار سانى 12 پروتسەنتكە ارتىپ وتىر. جىل سايىن ءبىزدىڭ ورتكە قارسى قىزمەت پروفيلاكتيكالىق شارالار جۇرگىزەدى", - دەدى ول.
ءمينيستردىڭ ايتۋىنشا، سوڭعى بىرنەشە ايدا تج قىزمەتكەرلەرى 1 ميلليون 700 مىڭ جەكە ءۇيدى ارالاپ، 4 ميلليون اداممەن كەزدەسىپ، ءورت قاۋىپسىزدىگى ەرەجەلەرىن تۇسىندىرگەن.
قايعىلى وقيعا استانادا كوكتال-1 تۇرعىن ءۇي الابىنداعى جەر ۇيلەردىڭ بىرىندە 4 اقپانعا قاراعان ءتۇنى بولدى. ءورت سوندىرۋشىلەر وقيعا ورنىنا حابار تۇسكەننەن كەيىن جەتى مينۋتتان سوڭ جەتتى، بىراق ءۇي تولىعىمەن ورتەنىپ كەتتى. جانىپ كەتكەن ۇيدەن 2006, 2008, 2013, 2015 جانە 2018 جىلى تۋعان بالالاردىڭ دەنەسى تابىلدى. كوز جۇمعان بالالاردىڭ بارلىعى – قىزدار، ەڭ كىشىسىنىڭ تۋعانىنا ءۇش اي عانا بولعان.
ءورت شىققان كەزدە بالالاردىڭ اتا-اناسى ەكەۋى دە جۇمىستا بولعان – ايەل پلاستيكالىق كارتا شىعاراتىن زاۋىتقا تۇنگى اۋىسىمعا بارادى، ال وتاعاسىن تەحنيكالىق قىزمەت كورسەتۋ ستانتسياسىنا (ستو) جۇمىسقا شاقىرىپ العان.
