اقۇشتاپ باقتىگەرەەۆا: "مۇحامەدجان تازابەككە "ابدەن اداسىپ بولدىڭ عوي!", – دەپ ەدىم، ميىعىنان كۇلدى دە قويدى"

"تاريحتىڭ قاي عاسىرىنان قارا جامىلعان قازاق قىزىن كوردىڭدەر؟ بەس رەت بايعا ءتيىپ، التىنشى كۇيەۋدەن بالا تۋ دەگەن ەشقاشان بولعان ەمەس. وتە جيىركەنىشتى نارسە. ايدىڭ-كۇننىڭ امانىندا قازاق قىزىنا تالاق بولاتىنداي نە كۇن تۋدى؟ بۇل – ۇلت باسىنا تونگەن ۇلكەن قاۋىپ. ەرتەڭ سولاردىڭ ىشىنەن اقشا ءۇشىن تەرروريست شىقپايتىنىنا كەپىل بار ما؟ بۇعان قاتاڭ زاڭ كەرەك. وبالى ەل اراسىنا ىرىتكى سالىپ، ارانداتىپ جۇرگەندەرگە كەلەدى. پالەن قاتىن الىپ، وزدەرى شەتتە ءجۇر عوي. بىردە مۇحامەدجان تازابەكتى كورىپ قالعاندا: «بالام-اي، قايتسايشى، ابدەن اداسىپ بولدىڭ عوي!»، – دەپ ەدىم، ميىعىنان كۇلدى دە قويدى. مويىنداماسا دا، كىنالى سولار. سولار اقشا ءۇشىن ءبارىن بۇزىپ كەتتى", - دەدى اقىن.

"بۇگىن جاستاردى ينتەرنەت پەن تەلەفون، الەۋمەتتىك جەلى تاربيەلەپ جاتىر. ونى شەشەسى دە قاراپ ۇلگەرمەيدى. اقپارات قۇرالدارى ءتۇرلى زومبىلىقتى ناسيحاتتايدى. وعان دا زاڭ تىيىم سالسا دەيمىن. وسىنىڭ ءبارى ۇلتتى ازدىرادى.

مىسالى، الگىندە ايتقان جاپونيا ازىپ تۇرعان جوق، اقش-تىڭ ءوزى كوپ نارسەگە تىيىم سالادى. ال بىزدە زاڭ جوق. تەلەارنادان تاربيەگە جات، ءپاتۋاسىز، كورگەنسىز حابارلار كورسەتەدى. بولماشى ءانشىنىڭ كۇيەۋگە تيگەنى كىمگە كەرەك؟ ءبۇتىن ۇلتتىڭ مازاسىن الاتىن شارۋا ەمەس قوي. مەيلى ءتيسىن، ول ونىڭ جەكە شارۋاسى. اينۇر تۇرسىنباەۆانىڭ «ديكي ارماننىڭ» دوسىنا ءتيىپ، تۇركيادا توي وتكىزىپ، بريلليانت تاراتقانى قازاق ۇلتىنىڭ ماقساتى ما؟ ايتپاۋ كەرەك، كورسەتپەۋ كەرەك، ءمان بەرمەۋ كەرەك. قازاق ۇلتى ۇلكەن جولدا كەتىپ بارا جاتقان كوش ەمەس پە؟ ونىڭ ارباسىنان ءتۇسىپ قالاتىن نارسە كوپ.

ولار – تۋعان جەرىن، نامىستى ساتقاندار، شەتەلدىك ازاماتقا تيگەن قىزدار، بەكبولات پەن مۇحامەدجاندار، اينۇرلار، اقشا قۋعاندار، تاعىسىن تاعى. بۇلاردىڭ قازاقتىڭ ۇلى كوشىنە قاجەتى جوق، ءتىپتى كىرىستىرمەۋ كەرەك. سوندىقتان قوعام، ۇكىمەت ۇلتتىق رۋحتى قايتسەم كوتەرەمىن، قازاقتى قايتسەم الىس عاسىرعا اپارامىن دەگەن دۇنيەنى ويلاۋ كەرەك.

قايتا قۇرۋ اقشا دەگەندى الىپ كەلدى. ءبارىن بۇزعان – اقشا. اقشا جۇرگەن جەردە ار مەن ابىروي سويلەمەيدى. بىراق اقشادان دا قىمبات نارسەلەر بار", - دەدى اقىن.