دينارا سادۋاقاسوۆا استانا شاحمات فەدەراتسياسىنىڭ قۇرمەتتى پرەزيدەنتى بولىپ سايلاندى. بۇل تۋرالى ول ءوزىنىڭ Facebook پاراقشاسىندا حابارلادى، دەپ جازادى "ادىرنا" ۇلتتىق پورتالى.
"بۇگىن سىزدەرمەن جاقسى جاڭالىقپەن بولىسپەكشىمىن. استانا شاحمات فەدەراتسياسىنىڭ قۇرمەتتى پرەزيدەنتى بولىپ سايلاندىم. وعان سەبەپكەر، شاحماتقا جاناشىر، قولداۋشى استانا قالالىق فەدەراتسيا پرەزيدەنتى ابزال ساعىمباەۆ مىرزاعا راحمەت ايتقىم كەلەدى. ابزال ەكرامبەكۇلىنىڭ ۇسىنىسىمەن فەدەراتسيا قۇرىلتايشىلارى مەن اتقارۋ كوميتەتىنىڭ قىزمەتكەرلەرى ءبىر اۋىزدان قولدادى. وسى ماقساتتا مەن شاحماتتى ودان ءارى ناسيحاتتاپ، دامىتۋعا ماعان بىلدىرگەن سەنىمدەرىڭىز بەن ۇمىتتەرىڭىزدى اقتاۋعا تىرىسامىن. فيدە سپورت كوميسسياسىندا تاجىريبەسى بار يۋنيسەف-ءتىڭ ىزگى ەلشىسى رەتىندە ءوز ءبىلىمىم مەن ەنەرگيامدى بارىمشا شاحماتتىڭ كوركەيۋىنە جۇمسايمىن. شاحمات جۇرتشىلىعىنا سەنىم بىلدىرگەنى ءۇشىن العىس ايتامىن. سونداي-اق، ابزال ەكرامبەكۇلىمەن بىرلەسە جۇمىس جاساسا استانا شاحمات فەدەراتسياسى ودان دا بەلسەندى ءارى بەدەلى بيىك بولاتىنىنا سەنەمىن. الدا ءورشىل ماقساتتار تۇر. كوپ جۇمىس، ساتتىلىك تىلەيمىن",- دينارا سادۋاقاسوۆا.
"ادىرنا" ۇلتتىق پورتالى
