بىرقاتار قازاقستاندىق بانك پرەزيدەنت قاسىم-جومارت توقاەۆ ايتقان شەتەلدىك 7 ترلن تەڭگەنى سىرتقا «ايداپ شىعارۋ» وپەراتسيالارىنا قاتىسى جوق ەكەنىن مالىمدەدى، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
اتاپ ايتقاندا، «وتباسى بانكىنىڭ» ءباسپاسوز قىزمەتى مۇنداي وپەراتسيالاردىڭ ولاردىڭ بانكىنە قاتىسى جوق ەكەنىن ايتتى. سونىمەن قاتار «حالىق بانك»، «التىن بانك»، «حوۋم كرەديت بانك» جانە «ەۋرازيالىق بانك» تە وزدەرىنىڭ اتالعان كۇماندى قارجى وپەراتسيالارىنا قاتىسى بارىن جوققا شىعاردى.
ەلىمىزدەگى ەڭ ءىرى ءارى كونە بانكتەردىڭ ءبىرى رەسمي تۇسىنىكتەمە بەرۋگە ۋاقىت سۇراسا، وزگە بانكتەر رەداكتسيادان ەلەكتروندى پوشتا ارقىلى رەسمي سۇراۋ جولداۋدى وتىنگەن. ال «بانك تسەنتركرەديت» جۋرناليستىك ساۋالعا ەرەكشە تالاپ قويعان جالعىز بانك بولىپ شىقتى.
قازتاگ دەرەگىنشە، بتسك جازباشا جاۋاپ الۋ ءۇشىن ءوتىنىش يەسىنىڭ اتى-جونىمەن قاتار، جسن، بايلانىس ءنومىرى جانە تولىق تۇرعىلىقتى مەكەنجايىن كورسەتۋدى تالاپ ەتكەن. بانك بۇل دەرەكتەر وتىنىشكە قول قويىلىپ، PDF فورماتىندا جولدانۋى قاجەت ەكەنىن حابارلاعان. ايتا كەتەرلىگى، مۇنداي تالاپتى باسقا بىردە-ءبىر بانك قويعان جوق.
