تمد باس حاتشىسىنىڭ جاڭادان تاعايىندالعان ورىنباسارى داۋرەن اباەۆتىڭ توراعالىعىمەن قىلمىسقا قارسى كۇرەس جونىندەگى 2024-2028 جىلدارعا ارنالعان بىرلەسكەن ءىس-شارالاردىڭ مەملەكەتارالىق باعدارلاماسىنىڭ جوباسىن بەكىتۋ جونىندەگى ساراپتاما توبىنىڭ وتىرىسى ءوتتى. بۇل تۋرالى تمد اتقارۋ كوميتەتىنىڭ ءباسپاسوز قىزمەتى سالىمدەدى، دەپ حابارلايدى “ادىرنۆ” ۇلتتىق پورتالى.
كەزدەسۋ قورىتىندىسى بويىنشا ساراپشىلار باعدارلاما جوباسىن تمد مەملەكەت باسشىلارى كەڭەسىنىڭ كەزەكتى وتىرىسىندا قاراۋعا شىعارۋعا كەلىستى.
داۋرەن اباەۆتىڭ ايتۋىنشا، مەملەكەتارالىق باعدارلاما جوباسى تمد مەملەكەتتەرى مەن ورگاندارىنىڭ قىلمىسقا قارسى كۇرەستەگى ىنتىماقتاستىعىن جاقسارتۋعا باعىتتالعان.
قۇجاتتا ترانسۇلتتىق قىلمىسقا قارسى كۇرەس بويىنشا ىنتىماقتاستىقتى ودان ءارى دامىتۋ تەتىكتەرى، تمد ەلدەرىنىڭ مودەلدىك زاڭناماسىن جەتىلدىرۋ ماسەلەلەرى قاراستىرىلعان.
"جوبادا كەلىسىلگەن ۆەدومستۆوارالىق، جەدەل-پروفيلاكتيكالىق ءىس-شارالاردى وتكىزۋ، بىرلەسكەن وقۋ-جاتتىعۋلارعا قاتىسۋ تاجىريبەسىن جالعاستىرۋ، قىلمىسقا قارسى كۇرەس سالاسىندا بەلسەندى اقپارات الماسۋ ماسەلەلەرىنە ەرەكشە كوڭىل بولىنگەن", - دەدى داۋرەن اباەۆ.
وتىرىسقا ازەربايجان، ارمەنيا، بەلارۋس، قازاقستان، قىرعىزستان، رەسەي، تاجىكستان، وزبەكستان، ىشكى ىستەر مينيسترلەرى كەڭەسى مەن تمد-عا مۇشە مەملەكەتتەر اۋماعىندا ۇيىمداسقان قىلمىسقا جانە قىلمىستىڭ باسقا دا قاۋىپتى تۇرلەرىمەن كۇرەستى ۇيلەستىرۋ بيۋروسىنىڭ، دوستاستىق اتقارۋ كوميتەتىنىڭ وكىلدەرى قاتىستى. كەڭەسكە قاتىسۋشىلار قۇجاتتى پىسىقتاپ، ساراپتامالىق دەڭگەيدە ونى بەكىتۋ ءراسىمىن اياقتادى.
