ساياسي رەفورمالار ۇلتتىق قۇندىلىقتارىمىزدى جاڭعىرتۋعا تىڭ سەرپىن بەردى - قارين

2140
Adyrna.kz Telegram

"پرەزيدەنتتىڭ باستاماسىمەن ىسكە اسقان ساياسي رەفورمالار ۇلتتىق قۇندىلىقتارىمىزدى جاڭعىرتۋ ۇدەرىسىنە تىڭ سەرپىن بەردى". بۇل تۋرالى قر مەملەكەتتىك كەڭەسشىسى ەرلان قارين ءوزىنىڭ telegram-ارناسىندا جازدى، دەپ حابارلايدى "ادىرنا" ۇلتتىق پورتالى.

"بىلتىر 16-ناۋرىزدا پرەزيدەنت قاسىم-جومارت توقاەۆ ەلىمىزدى ساياسي جاڭعىرتۋدىڭ اۋقىمدى باعدارلاماسىن ۇسىندى. سودان بەرگى ءبىر جىلعا جەتپەيتىن ۋاقىتتا بۇرىن-سوڭدى قازاقستاندا بولماعان كەڭ كولەمدى وزگەرىس جاسالدى. بىرىنشىدەن، 1995 جىلدان بەرى العاش رەت جالپىۇلتتىق رەفەرەندۋم ءوتتى. حالقىمىز كونستيتۋتسيالىق رەفورماعا قولداۋ ءبىلدىردى. اتا زاڭداعى توعىز تاراۋدىڭ سەگىزىنە، 98 باپتىڭ 33-ىنە تۇزەتۋ ەنگىزىلىپ، باستى قۇجاتتىڭ ۇشتەن ءبىرى جاڭارتىلدى. سونداي-اق 7 كونستيتۋتسيالىق زاڭعا، 15 كودەكسكە جانە 29 زاڭعا وزگەرىستەر مەن تولىقتىرۋلار ەنگىزىلدى. ەكىنشىدەن، جاڭا ساياسي رەفورمالار قولعا الىندى. ەندى پرەزيدەنت 7 جىلدىق مەرزىمگە ءبىر رەت سايلانادى. سونداي-اق، مەملەكەت باسشىسى ساياسي پارتيانىڭ مۇشەسى بولا المايدى. پارلامەنت پەن ءماسليحاتتاردى جاساقتاۋ ءتارتىبى وزگەردى، ولاردىڭ وكىلەتتىگى كۇشەيدى. كونستيتۋتسيالىق سوت قۇرىلىپ، جۇمىس ىستەي باستادى. بۇل رەتتە اتالعان سوت مۇشەلەرىنىڭ وكىلەتتىك مەرزىمى پرەزيدەنت پەن پارلامەنت دەپۋتاتتارىنا قاراعاندا ۇزاعىراق بولادى",- دەپ جازدى قارين.

ساياسي پارتيالاردى تىركەۋ ءراسىمى جەڭىلدەتىلدى.

"ناتيجەسىندە ەكى جاڭا پارتيا تىركەلدى.  وسىلايشا، مەملەكەتتىك-ساياسي قۇرىلىمنىڭ جاڭا ۇلگىسى قالىپتاسىپ، بيلىك تارماقتارى اراسىندا تەپە-تەڭدىك ورنادى. ۇشىنشىدەن، ماڭىزدى مەملەكەتتىك ينستيتۋتتاردى جۇيەلى تۇردە قايتا قۇرۋ ۇدەرىسى اياقتالىپ كەلەدى. پرەزيدەنت جانە سەنات دەپۋتاتتارىنىڭ سايلاۋى ءوتتى. 19-ناۋرىزدا جاڭا ارالاس جۇيە (پارتيالىق ءتىزىم مەن ءبىر مانداتتى وكرۋگتەر) بويىنشا ءماجىلىس پەن ءماسليحاتتاردىڭ دەپۋتاتتارى سايلانادى. تورتىنشىدەن، ەلىمىزدىڭ اكىمشىلىك-اۋماقتىق قۇرىلىمى دا وزگەردى. اباي، جەتىسۋ جانە ۇلىتاۋ وبلىستارى قۇرىلدى. الماتى وبلىسىنىڭ ورتالىعى قوناەۆ قالاسىنا كوشتى. بەسىنشىدەن، مەملەكەت پەن ازاماتتىق قوعام اراسىندا سىندارلى ارىپتەستىك ورناتۋ جۇمىسى جالعاستى. بابالار جولىمەن ۇلتتىق قۇرىلتاي شاقىرىلۋىن وسى باعىتتاعى ىلكىمدى ىستەردىڭ دالەلى دەۋگە بولادى. ونىڭ العاشقى وتىرىسى ۇلت ۇياسى – ۇلىتاۋدا ءوتتى، ەكىنشى وتىرىسى كيەلى تۇركىستاندا وتەدى. ەڭ باستىسى، پرەزيدەنتتىڭ باستاماسىمەن ىسكە اسقان ساياسي رەفورمالار ۇلتتىق قۇندىلىقتارىمىزدى جاڭعىرتۋ ۇدەرىسىنە تىڭ سەرپىن بەردى. سونداي-اق، ازاماتتاردىڭ بەلسەندىلىگىن ارتتىرۋعا جانە ولاردىڭ ەلىمىزدى جان-جاقتى دامىتۋ ىسىنە اتسالىسۋىنا جول اشتى",- دەدى مەملەكەتتىك كەڭەسشى. 

"ادىرنا" ۇلتتىق پورتالى 

پىكىرلەر