استانادا 2023 جىلدىڭ 15-17 ناۋرىز ارالىعىندا «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىندا «بيومەديتسينا، ينجەنەريا ي تەحنولوگيالار» اتتى حII ناۋرىز كەزدەسۋلەرى ءوتتى.
ناۋرىز كەزدەسۋلەرى – وقۋشىلاردىڭ عىلىمي تالانتتارى مەن زەرتتەۋشىلىك شابىتتىرىن كوكتەم مەرەكەسىنىڭ ەڭ ماڭىزدى سالت-داستۇرلەرىمەن توعىستىراتىن «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ ايرىقشا ءداستۇرى. ناۋرىز كەزدەسۋلەرى 2011 جىلدان بەرى وتكىزىلىپ كەلەدى جانە زاماناۋي عىلىمنىڭ جاھاندىق باسىمدىقتارى ىشىندەگى ەڭ وزەكتى تاقىرىپتارىنا ارنالدى.
استانادا دەنساۋلىق ساقتاۋ سالاسىنا جاساندى ينتەللەكت، روبوتوتەحنيكا، ماشينالىق ويلاۋ جانە ۇلكەن دەرەكتەردى ەنگىزۋ جوبالارىمەن تابىستى جۇمىس ىستەپ كەلە جاتقان بارلىق زياتكەرلىك مەكتەپتەردىڭ جاس عالىمدارى جينالدى. مەكتەپ وقۋشىلارىنىڭ عىلىمي-زەرتتەۋ جۇمىستارى 3D-بيوپرينتينگكە، اقىلدى پروتەزدەر مەن بيوينتەرفەيستەردى جاساۋعا جانە زاماناۋي مەديتسينانىڭ باسقا دا وزەكتى باسىمدىقتارىنا ارنالادى.
وقۋ-اعارتۋ ءمينيسترى عاني بەيسەمباەۆ NIS-ءتىڭ ناۋرىز كەزدەسۋلەرىن ۇلكەن عىلىمعا جاسالعان العاشقى قادام دەپ اتادى.
– كۇلاش نوعاتايقىزى ءشامشيدينوۆانىڭ باستاماسىمەن جۇزەگە اسقان ناۋرىز كەزدەسۋلەرىنىڭ تاريحي ماڭىزى زور، سەبەبى ەلىمىزدە جاس عالىمداردىڭ بىرەگەي الاڭى پايدا بولدى. بىرنەشە جىلدان كەيىن ءبىز الەمدىك جاڭالىقتار اۆتورلارى مەن نوبەل سىيلىعىنىڭ لاۋرەاتتارىنىڭ اراسىنان بۇگىنگى قاتىسۋشىلاردىڭ ەسىمدەرىن ەستيتىنىمىزگە سەنىمدىمىن، – دەپ اتاپ ءوتتى عاني بەيسەمباەۆ.
«نازارباەۆ زياتكەرلىك مەكتەپتەرى» دببۇ باسقارما توراعاسى انۋار جانعوزين كەزدەسۋلەردىڭ باستى تاقىرىبىنا اينالعان بيومەديتسينا مەن دەنساۋلىق ساقتاۋ سالاسىنا جاساندى ينتەللەكت پەن ماشينالىق ويلاۋدى ەنگىزۋدىڭ وزەكتىلىگىن جانە جاس ونەرتاپقىشتاردىڭ جاھاندىق عىلىمنىڭ سۇرانىسقا يە باعىتتارى بويىنشا جۇمىس ىستەۋگە دەگەن ۇمتىلىسىن ەرەكشە اتاپ ءوتتى:
– ناۋرىز كەزدەسۋلەرى نازارباەۆ ۋنيۆەرسيتەتىنىڭ مەديتسينا مەكتەبى جانە ينجەنەريا مەن تسيفرلىق تەحنولوگيالار مەكتەبى، «University Medical Center» كورپوراتيۆتىك قورى انا مەن بالا ۇلتتىق عىلىمي ورتالىعى جانە قازاقستان رەسپۋبليكاسى پرەزيدەنتى ءىس باسقارماسىنىڭ مەديتسينالىق ورتالىعى اۋرۋحاناسىمەن سەرىكتەستىكتە وتۋدە. بيومەديتسينا، ينجەنەريا جانە تەحنولوگيا سالالارىنا بايلانىستى ماماندىقتاردى تاڭداعان وقۋشىلارىمىز مەن تۇلەكتەرىمىزدىڭ كوبى بىلىمدەرىن نازارباەۆ ۋنيۆەرسيتەتى مەن باسقا دا قازاقستاندىق جوعارى وقۋ ورىندارىندا جالعاستىرىپ، كەيىن وتاندىق عىلىم، مەديتسينا، فارماتسەۆتيكا، بيوينجەنەريا جانە تسيفرلىق تەحنولوگيالاردى ىلگەرىلەتۋ جولىندا جۇمىس ىستەۋدى جوسپارلاپ وتىر.
بۇگىندە جاساندى ينتەللەكت پەن BIG DATA مەديتسينادا رەۆوليۋياتسيا جاساۋدا. وسى قايتالانباس شارانىڭ بۇگىنگى قاتىسۋشىلارى بولاشاقتا ءبىزدىڭ ۋنيۆەرسيتەتتىڭ ستۋدەنتى اتانىپ، تەك قازاقستاندىق عانا ەمەس، الەمدىك عىلىمدى دا ناسيحاتتايتىنىنا ۇمىتتەنەمىز، – دەدى نازارباەۆ ۋنيۆەرسيتەتىنىڭ مەديتسينا جونىندەگى ۆيتسە-پرەزيدەنتى، مەديتسينا مەكتەبىنىڭ دەكانى ماسسيمو پينياتەللي.
ناۋرىز كەزدەسۋلەرى قاتىسۋشىلارىنا انا مەن بالا ۇلتتىق عىلىمي ورتالىعىنىڭ بالالار حيرۋرگياسى ءبولىمىنىڭ جەتەكشىسى داستان رۇستەموۆتىڭ بايانداماسى ەرەكشە شابىت بەردى. سپيكەر بالالار حيرۋرگياسىنىڭ ەرەكشەلىكتەرى مەن جاڭاشىلدىقتارى تۋرالى ايتىپ بەردى:
– قازىر قازاقستاندىق مەديتسينا قارقىندى دامىپ كەلەدى. بۇگىنگى كۇنى ەڭ كۇردەلى اعزانى اۋىستىرۋ وتالارىن جاساۋعا مۇمكىندىك بار. ءبىزدىڭ ورتالىقتا انا قۇرساعىندا جاتقان نارەستەلەرگە دە وتا جاساۋعا بولادى. ەلىمىزدە جانە دۇنيەجۇزىندە بالالار حيرۋرگياسى ماماندارى جەتىسپەيدى. ناۋرىز كەزدەسۋلەرىنىڭ قاتىسۋشىلارى بولاشاقتا ءبىزدىڭ ارىپتەستەرىمىزگە اينالادى دەپ سەنەمىز.
ايتا كەتەيىك شاراعا ءبىلىم بەرۋدى تۇراقتى دامىتۋ قورى جالپى ءبىلىم بەرەتىن 17 مەكتەپتىڭ وقۋشىلارىنىڭ دا جوبالارى ناۋرىز كەزدەسۋلەرىنە قاتىسۋىنا مۇمكىندىك جاسادى.
