ماجىلىسكە وتكەن 6 پارتيا دەپۋتاتتارىنىڭ ءتىزىمىن جاريالادى. قازاقستان قوعامدىق دامۋ ينستيتۋتىنىڭ ساراپشىسى جاقسىبەك جيەناليەۆ سايلاناتىن دەپۋتاتتار ەندى ەلىمىزدى جاڭا ءبىر دەڭگەيگە كوتەرەدى دەگەن پىكىرىمەن ءبولىستى.
سايلاۋ ناۋقانى باستالعالى بەرى بىرقاتار پارتيانىڭ ۇگىت-ناسيحات جۇمىستارىن بەلسەندى اتقارعانىن كوردىك. سولاردىڭ ءبىرى «Amanat» پارتياسى بۇگىن كانديداتتارىنىڭ ءتىزىمىن ۇسىندى. قۇرامىنىڭ 50 پايىزى بۇرىنعى دەپۋتاتتاردان تۇرادى. ال قالعان 50 پايىزى قازاق ءتىلى ماسەلەسىن كوتەرىپ جۇرگەن ماكسيم روجين، الەۋمەتتىك ماسەلەلەرگە توقتالاتىن ماقسات تولىقباي، نارتاي ارالبايۇلى جانە ساياساتكەر سامات نۇرتازا سىندى ەلگە تانىمال ازاماتتاردان قۇرالعان. ال جاڭادان قۇرىلعان «Respublica» پارتياسى دا ەرەكشە كوزگە ءتۇسىپ، 6 مانداتىن بيلىككە وتكىزدى. ونىڭ قۇرامىندا بۇرىننان كەلە جاتقان ەلگە تانىمال كاسىپكەرلەر، تۇلعالار بار. ءوز باسىم پارتيالاردىڭ اتىنان سايلاناتىن دەپۋتاتتار وزەكتى ماسەلەلەردى شەشىپ، ەلىمىزدى جاڭا ءبىر دەڭگەيگە كوتەرەدى دەپ ويلايمىن، - دەدى جاقسىبەك اقتىلەۋۇلى.
سونداي-اق ساراپشى بيىلعى سايلاۋدىڭ ءبىر ەرەكشەلىگىنە توقتالدى.
وسى جولعى وتكەن سايلاۋدىڭ جاقسى جاڭالىقتارىنىڭ ءبىرى - «اۋىل» پارتياسىنىڭ بيلىككە ءوتۋى. حالىقتىڭ بۇل پارتياعا داۋىس بەرىپ، سەنىم بىلدىرگەنى ءبىزدى قۋانتادى. سەبەبى اۋىل ماسەلەسى قازىرگى تاڭدا وزەكتى بولىپ وتىر. ونى شەشۋ ءۇشىن بيلىككە اۋىلعا جاقىن، جاناشىر ماماندار كەلۋى ءتيىس، - دەدى ول.
سونىمەن قاتار جاقسىبەك جيەناليەۆ مۇمكىندىگى شەكتەۋلى جانداردىڭ ماسەلەسى قاشاندا ماڭىزدى ەكەنىن اتاپ ءوتتى.
ءار پارتيا سايلاۋ كەزىندە 30 پايىزدىق كۆوتا بويىنشا ءوز كانديداتتارىن ۇسىندى. ەندى دەپۋتاتتىق قىزمەتكە تاعايىندالاتىندارى مۇمكىندىگى شەكتەۋلى ازاماتتاردىڭ ماسەلەسىن شەشەتىن بولادى. مىسالى ولارعا ارنالعان قاراپايىم قالاداعى پاندۋستاردىڭ، ارنايى قوعامدىق دەمالىس ورىندارىنىڭ جوقتىعى بىلىنەدى. ءسويتىپ كەيدە سول جانداردىڭ قۇقىقتارى شەكتەلىپ جاتادى. سوندىقتان مۇمكىندىگى شەكتەۋلى جانداردىڭ ماسەلەسى نازاردان تىس قالماي، ماجىلىستە تالقىلانۋى قاجەت دەپ ەسەپتەيمىن، - دەيدى ول.
قازاقستان قوعامدىق دامۋ ينستيتۋتىنىڭ ساراپشىسى ماجىلىسكە 6 پارتيا وتەدى دەپ كۇتپەگەن.
نەگىزى دەپۋتاتتار سايلاۋىنا قاتىستى بولجامىم باسقاشا بولعان. بيلىككە 4 پارتيا وتەدى دەپ ويلادىم. ماعان باسقا دا ساراپشىلاردىڭ بولجامى وزگەشە بولعان سياقتى كورىنەدى. سەبەبى 7 پارتيانىڭ 6-ۋى پارلامەنتكە ءوتىپ كەتتى. بۇعان وتكەن جىلى سالعان ساياسي رەفورمالار مەن رەفەرەندۋمداعى پارتيالاردىڭ 5 پايىزدىق مەجەدەن اسىپ ءوتۋى سەبەپ بولىپ وتىر، - دەيدى جاقسىبەك اقتىلەۋۇلى.
