وڭتۇستىك كورەيادا دەپورتاتسيادان قاشىپ كەتكەن قازاقستاندىق نۇرسۇلتان ىرىسباەۆقا ىزدەۋ جاريالاندى. ول تۋرالى اقپارات بەرگەن ادامعا ءىرى كولەمدە سىياقى بەرىلەدى. بۇل تۋرالى Korea Komek پابليگىندە جاريالانعان، دەپ حابارلايدى “ادىرنا” ۇلتتىق پورتالى.
اقپاراتقا بويىنشا، 18 جاستاعى نۇرسۇلتان ىرىسباەۆ اۋەجايدان قاشىپ كەتكەننەن كەيىن كولىككە ءمىنىپ كەتكەن. وعان جەرلەستەرى كومەكتەسۋى مۇمكىن. تۇركىستان قالاسىنىڭ تۋماسى قازىرگى ۋاقىتتا ينسان قالاسىندا جاسىرىنىپ ءجۇر دەگەن مالىمەت بار.
قازىرگى كەزدە كورەيانىڭ بارلىق جولدارىندا كۇشەيتىلگەن رەيدتەر باستالدى. ىرىسباەۆتى تابۋعا كومەك بەرگەن ادامعا 30 ميلليون ۆون (10 ميلليوننان استام تەڭگە) اقشالاي سىياقى بەرىلەدى.
"كومەك بەرگەن ادام زاڭسىز ميگرانت بولسا، وعان كورەيانىڭ وزىندە ۆيزا جاساپ بەرەمىز. اقپارات بەرگەن ادام قۇپيا كۇيىندە قالادى", - دەلىنگەن حابارلامادا.
جەرگىلىكتى پوليتسيا نۇرسۇلتاندى ءوز ەركىمەن بەرىلۋىن، ولاي جاساماعان جاعدايدا باسقا قازاقستاندىق ازاماتتارعا جانە قازاقستاندىق زاڭسىز ميگرانتتارعا قىسىم كورسەتىلەتىنىن حابارلادى. ال كورەياعا جاڭادان كەلەتىندەر ءۇشىن ەلگە كىرۋ ءتارتىبى كۇشەيتىلەدى.
نۇرسۇلتانعا كومەكتەسكەن ادامدار ءوز ەركىمەن بايلانىسقا شىقپاسا، ايىپپۇل ارقالاۋى مۇمكىن. وعان قوسا، كورەيادان دەپورتاتسيالانادى.
ايتا كەتەيىك، 26 ناۋرىز كۇنى تاڭعى ساعات 4:20-دا 18 جانە 21 جاستاعى ەكى قازاقستان ازاماتى دەپورتاتسياعا ارنالعان ۇشاققا وتىرماي قاشىپ كەتتى. ەكەۋى اۆتوبۋستىڭ تەرەزەسىنەن شىعىپ، تىكەندى سىم تارتىلعان قورشاۋدان سەكىرىپ كەتكەن. بىرەۋى ۇستالدى. ال ەكىنشىسى قاشىپ كەتتى.
