14 ناۋرىز – كورىسۋ كۇنى مەرەكەسى. شىمكەنتتە مەرەكە «استانا» الاڭىنان باستالدى. وندا قىستان شىققان جۇرتشىلىق ءبىر-بىرىمەن امان-ساۋلىق سۇراسىپ، ءتوس قاعىستىردى.
قالانىڭ ايشىقتى جەرى اباي ساياباعىندا دا شىمكەنت-تسيرك، اباي اتىنداعى قالالىق ورتالىق كىتاپحانا، شىمكەنت قالالىق ساياسي قۋعىن-سۇرگىن قۇرباندارىنىڭ مۋزەيى مەكەمەلەرى كورىسىپ، اننەن شاشۋ شاشىپ، دامنەن اۋىز ءتيدى. جينالعان قاۋىمنىڭ كوڭىل-كۇيى ەرەكشە. ۇلى اباي ايتقانداي، «قىرداعى ەل ويداعى ەلمەن ارالاسىپ، كۇلىمدەسىپ، كورىسىپ، قۇشاقتاسىپ» مارە-سارە بولىستى. ۇلتتىق كيىم كيگەن، دومبىراسىن اسىنعان كوپشىلىك قالا تۇرعىندارىنا مەرەكەنى سەزىندىردى.
– كورىسۋ – ادامداردىڭ ءبىر-بىرىنە امانداسىپ، جاقسىلىق تىلەيتىن قاۋىشۋ مەرەكەسى عانا ەمەس، جاسى ۇلكەندەرگە ىزەت كورسەتىپ، ءىلتيپات بىلدىرەتىن ىزگى امال. بۇل كۇننىڭ وسكەلەڭ ۇرپاقتى ىزەتتىلىك پەن مەيىرىمدىلىككە، اۋىزبىرشىلىك پەن كىشىپەيىلدىلىككە، تاتۋلىق پەن باۋىرمالدىققا باستايتىن تاعىلىمى مول. كوكتىڭ تىنىسىن تىڭداپ، جەردىڭ تامىرىن باسقان، تۇرمىس-تىرشىلىگى تابيعات-انامەن تىعىز بايلانىسقان حالقىمىز ءۇشىن كورىسۋ ءداستۇرى – جاڭارۋ مەن جاسامپازدىقتىڭ، ىرىc پەن بەرەكەنىڭ باستاۋى، – دەيدى قالا تۇرعىنى ماقسات امىربەكوۆ.
