شىمكەنت قالاسى سپورت جانە بۇقارالىق سپورتتى دامىتۋدا تولاعاي تابىستارعا قول جەتكىزىپ كەلەدى. وسى باعىتتا سپورتتىڭ ماتەريالدىق-تەحنيكالىق بازاسىن نىعايتۋدا جۇيەلى جۇمىستار قولعا الىنعان. بيىل حالىقارالىق جانە رەسپۋبليكالىق دەڭگەيدەگى جارىستاردى وتكىزۋگە ارنالعان 3 سپورتتىق نىسان اشىلادى دەپ جوسپارلانعان. جىل باسىنان بەرى ەكى نىسان اشىلىپ، پايدالانۋعا بەرىلدى.
سولاردىڭ ءبىرى – ۇستەل تەننيسى سپورت كەشەنى. قۇرىلىستى «وتاۋ ستروي» كومپانياسى جۇرگىزدى، نىساننىڭ جالپى اۋماعى 2 مىڭ شارشى مەتردى الىپ جاتىر. جوبانىڭ جالپى قۇنى – 1,2 ملرد. تەڭگە. مامانداندىرىلعان زالدا 12 ۇستەل قاراستىرىلعان جانە تەك ايماقتا عانا ەمەس، رەسپۋبليكا كولەمىندەگى تەننيسشىلەر جارىستارعا دايىندالىپ، وقۋ-جاتتىعۋ جيىندارىن وتكىزىپ، تۋرنيرلەر ۇيىمداستىرا الادى. شاھاردا ۇستەل تەننيسىمەن جالپى 2000-عا جۋىق سپورتشى شۇعىلدانادى.
ەل يگىلىگىنە بەرىلگەن سپورتتىق نىساننىڭ تاعى ءبىرى – جاڭا اتشابار. يپپودرومدا ەلىمىزدەگى ەڭ ۇلكەن بايگە الاڭى بار. اۋماعىندا 1 500 كورەرمەنگە ارنالعان تريبۋنا، ات ارەناسى بار مانەجدەر، جابىق ستەند عيماراتى، ۆەتەرينارلىق بلوك، 300-دەن استام كولىككە ارنالعان تۇراق قاراستىرىلعان. تريبۋنانىڭ جوعارى قاباتىندا اشىق تەرراسا بار. ۇزىندىعى 2012 مەتر جارىس جولى سالىنعان. كوكپارعا، اتپەن سەكىرۋگە ارنالعان الاڭدار كۆارتستى قۇمدارمەن، تابيعي تاستارمەن بەزەندىرىلگەن. الەمدىك ستاندارتتارعا ساي سالىنعان جاڭا يپپودروم مەگاپوليستەگى حالىقارالىق سپورت جانە ويىن-ساۋىق جارىستارى وتەتىن ورىنداردىڭ بىرىنە اينالىپ وتىر.
جوباداعى ءۇشىنشى نىسان — «مەتاللۋرگ» ستاديونى. قازىرگى تاڭدا ستاديوننىڭ رەكونسترۋكتسيالاۋ جۇمىستارى اياقتالۋعا تاياۋ. جوبا قۇنى – 3 813,5 ملن. تەڭگە. جاڭارتىلعان نىساندا سپورتشىلار ءۇيى، ويىن تۇرلەرىنە ارنالعان 2 سپورت زال، جەكپە-جەك سپورت تۇرلەرىنە ارنالعان 2 سپورت زال، 1504 ورىندىقتى فۋتبول ستاديونى قاراستىرىلعان.
