Shymkent qalasy sport jáne buqaralyq sportty damytýda tolaǵaı tabystarǵa qol jetkizip keledi. Osy baǵytta sporttyń materıaldyq-tehnıkalyq bazasyn nyǵaıtýda júıeli jumystar qolǵa alynǵan. Bıyl halyqaralyq jáne respýblıkalyq deńgeıdegi jarystardy ótkizýge arnalǵan 3 sporttyq nysan ashylady dep josparlanǵan. Jyl basynan beri eki nysan ashylyp, paıdalanýǵa berildi.
Solardyń biri – ústel tennısi sport kesheni. Qurylysty «Otaý Stroı» kompanııasy júrgizdi, nysannyń jalpy aýmaǵy 2 myń sharshy metrdi alyp jatyr. Jobanyń jalpy quny – 1,2 mlrd. teńge. Mamandandyrylǵan zalda 12 ústel qarastyrylǵan jáne tek aımaqta ǵana emes, respýblıka kólemindegi tennısshiler jarystarǵa daıyndalyp, oqý-jattyǵý jıyndaryn ótkizip, týrnırler uıymdastyra alady. Shaharda ústel tennısimen jalpy 2000-ǵa jýyq sportshy shuǵyldanady.
El ıgiligine berilgen sporttyq nysannyń taǵy biri – jańa atshabar. Ippodromda elimizdegi eń úlken báıge alańy bar. Aýmaǵynda 1 500 kórermenge arnalǵan trıbýna, at arenasy bar manejder, jabyq stend ǵımaraty, veterınarlyq blok, 300-den astam kólikke arnalǵan turaq qarastyrylǵan. Trıbýnanyń joǵary qabatynda ashyq terrasa bar. Uzyndyǵy 2012 metr jarys joly salynǵan. Kókparǵa, atpen sekirýge arnalǵan alańdar kvarty qumdarmen, tabıǵı tastarmen bezendirilgen. Álemdik standarttarǵa saı salynǵan jańa ııppodrom megapolıstegi halyqaralyq sport jáne oıyn-saýyq jarystary ótetin oryndardyń birine aınalyp otyr.
Jobadaǵy úshinshi nysan — «Metallýrg» stadıony. Qazirgi tańda stadıonnyń rekonstrýkııalaý jumystary aıaqtalýǵa taıaý. Joba quny – 3 813,5 mln. teńge. Jańartylǵan nysanda sportshylar úıi, oıyn túrlerine arnalǵan 2 sport zal, jekpe-jek sport túrlerine arnalǵan 2 sport zal, 1504 oryndyqty fýtbol stadıony qarastyrylǵan.
