ۇلىستىڭ ۇلى كۇنى – ناۋرىز مەيرامىن شىمكەنت قالالىق قازاقستان حالقى اسسامبلەياسى جىل سايىن ءداستۇرلى تۇردە اتاپ ءوتىپ ءجۇر. بۇگىن شىمكەنت قالالىق قحا جانىنداعى قۇرىلىمدار، ەتنومادەني بىرلەستىك وكىلدەرىنىڭ قاتىسۋىمەن «دوستىق ءۇيىنىڭ» الدىنا كيىز ءۇي تىگىلىپ، سالتاناتتى جيىن ۇيىمداستىرىلدى.
«ارمىسىڭ، ءاز – ناۋرىز!» اتتى سالتاناتتى شاراعا شىمكەنت قالالىق قازاقستان حالقى اسسامبلەياسى جانىنداعى 17 ەتنومادەني بىرلەستىكتىڭ توراعالارى مەن وكىلدەرى، 7 قوعامدىق قۇرىلىم — اقساقالدار كەڭەسى، انالار كەڭەسى، جۋرناليستەر مەن بلوگەرلەر كلۋبى، «اسسامبلەيا جاستارى» ۇيىمى، مەدياتسيا كەڭەسى، عىلىمي-ساراپشىلىق توپ، كاسىپكەرلەر ۇيىمىنىڭ مۇشەلەرى اتسالىستى.
— ناۋرىز مەيرامى — وتكەندى سارالاپ، بۇگىندى باعامدايتىن جانە كۇن مەن ءتۇن تەڭەلىپ، اينالا جاڭاراتىن يگى مەرەكە. ناۋرىز — ىنتىماق پەن بىرلىكتىڭ، دوستىقتىڭ مەرەكەسى. ەلىمىزدىڭ ىنتىماعىن نىعايتىپ، تاتۋلىعىن ساقتاۋدا ەڭبەك ەتىپ جۇرگەن قازاقستان حالقى اسسامبلەياسىنىڭ مۇشەلەرى مەن ەتنومادەني بىرلەستىك وكىلدەرىن ۇلىستىڭ ۇلى كۇنى — ناۋرىز مەرەكەسىمەن قۇتتىقتايمىن، - دەدى شىمكەنت قالالىق ىشكى ساياسات جانە جاستار ىستەرى جونىندەگى باسقارما باسشىسى م.شوتانوۆ.
جيىلعان قاۋىم «دوستىق ءۇيى» جانە «بىرلىك ءۇيى» اتاۋىمەن تىگىلگەن قوس كيىز ۇيگە باس سۇعىپ، وندا ەتنومادەني بىرلەستىك وكىلدەرى جايعان داستارحاننان ءدام الدى. سونداي-اق، «ناۋرىز كادەسى» ۇلەستىرىلىپ، ۇلتتىق ويىندار ويناتىلدى.
