Ulystyń Uly kúni – Naýryz meıramyn Shymkent qalalyq Qazaqstan halqy Assambleıasy jyl saıyn dástúrli túrde atap ótip júr. Búgin Shymkent qalalyq QHA janyndaǵy qurylymdar, etnomádenı birlestik ókilderiniń qatysýymen «Dostyq úıiniń» aldyna kıiz úı tigilip, saltanatty jıyn uıymdastyryldy.
«Armysyń, áz – Naýryz!» atty saltanatty sharaǵa Shymkent qalalyq Qazaqstan halqy Assambleıasy janyndaǵy 17 etnomádenı birlestiktiń tóraǵalary men ókilderi, 7 qoǵamdyq qurylym — Aqsaqaldar keńesi, Analar keńesi, Jýrnalıster men blogerler klýby, «Assambleıa jastary» uıymy, Medıaııa keńesi, Ǵylymı-sarapshylyq top, Kásipkerler uıymynyń músheleri atsalysty.
— Naýryz meıramy — ótkendi saralap, búgindi baǵamdaıtyn jáne Kún men Tún teńelip, aınala jańaratyn ıgi mereke. Naýryz — yntymaq pen birliktiń, dostyqtyń merekesi. Elimizdiń yntymaǵyn nyǵaıtyp, tatýlyǵyn saqtaýda eńbek etip júrgen Qazaqstan halqy Assambleıasynyń músheleri men etnomádenı birlestik ókilderin Ulystyń uly kúni — Naýryz merekesimen quttyqtaımyn, - dedi Shymkent qalalyq ishki saıasat jáne jastar isteri jónindegi basqarma basshysy M.Shotanov.
Jıylǵan qaýym «Dostyq úıi» jáne «Birlik úıi» ataýymen tigilgen qos kıiz úıge bas suǵyp, onda etnomádenı birlestik ókilderi jaıǵan dastarhannan dám aldy. Sondaı-aq, «Naýryz kádesi» úlestirilip, ulttyq oıyndar oınatyldy.
