بۇگىن قالاداعى «كورمە» ورتالىعىندا شىمكەنت قالاسى، تۇركىستان، جامبىل جانە قىزىلوردا وبلىستارى تاۋار وندىرۋشىلەرىنىڭ وڭىرارالىق كورمە-جارمەڭكەسى باستالدى. كورمەدە حيميالىق، ماشينا جاساۋ، تاماق، جەڭىل، جيھاز ونەركاسىبى، قۇرىلىس ماتەريالدارى مەن اگرو-ونەركاسىپ كەشەنىنىڭ، جالپى 100-دەن استام كاسىپورىن ءوز ونىمدەرىن ۇسىنۋدا.
20-21 ناۋرىز ارالىعىنا جوسپارلانعان كورمە-جارمەڭكەنىڭ باستى ماقساتى – وتاندىق تاۋار وندىرۋشىلەردىڭ جوعارى ساپالى جانە باسەكەگە قابىلەتتى ونىمدەرىمەن كەڭىنەن تانىسۋ، جاڭا سەرىكتەستەر ىزدەۋ جانە ءوزارا ءتيىمدى كەلىسىمدەر جاساسۋ. وڭىرارالىق ءىس-شارا وتاندىق وندىرۋشىلەردى ناسيحاتتاۋعا باعىتتالعان جانە كاسىپورىنداردى دامىتۋعا، جاڭا تەحنولوگيالاردى ەنگىزۋگە جانە يمپورتتى الماستىراتىن ونىمدەردىڭ اسسورتيمەنتىن ارتتىرۋعا ىنتالاندىرۋدى كوزدەيدى.
شىمكەنت قالاسىنىڭ اكىمى مۇرات ايتەنوۆ جامبىل جانە قىزىلوردا وبلىستارىنىڭ الەۋەتتى كاسىپورىندارىنىڭ ونىمدەرىمەن تانىسىپ، كورمەنىڭ جۇمىسىنا ساتتىلىك تىلەدى. شاھار باسشىسى وتاندىق ونىمدەردى تانىتۋ، سەرىكتەستىكتى نىعايتۋدا مۇنداي كورمە الاڭداردىڭ ماڭىزى زور ەكەنىن اتاپ ءوتتى.
ايتا كەتسەك، كاسىپورىنداردىڭ قاتارىندا «راحات-شىمكەنت» جشس (كونديتەرلىك ونىمدەر), «شىمكەنتماي» اق (وسىمدىك ماي، مايونەز، تۇزدىق، سابىن), «ۆيزيت» الكوگولسىز سۋسىندار زاۋىتى» جشس (الكوگولسىز سۋسىندار), «بال تەكستيل» جشس (كىلەمدەر جانە كىلەم بۇيىمدارى), «شىمكەنت-كاشەمير» جشس (توقىما بۇيىمدارى (تۇيە جۇنىنەن جاسالعان كيىم جانە شۇلىق) جانە باسقا قالانىڭ تانىمال كومپانيالارى بار. سونىمەن قاتار، كورشى تۇركىستان، جامبىل جانە قىزىلوردا وبلىستارىنىڭ ونەركاسىپتىك كاسىپورىندارى ءوز ونىمدەرىن تانىستىرۋدا.
